fbpx
12/08/2019 ເຮົາກຳລັງສອນໃຫ້ເດັກຮູ້ອ່ານ-ຂຽນ ແຕ່ເປັນຫຍັງບໍ່ສອນໃຫ້ຮູ້ຄິດ yaklao ຢາກເລົ່າ

ເຮົາກຳລັງສອນໃຫ້ເດັກຮູ້ອ່ານ-ຂຽນ ແຕ່ເປັນຫຍັງບໍ່ສອນໃຫ້ຮູ້ຄິດ


ຫຼາຍໆຄົນນັ່ງຈົ່ມວ່າໂຮງຮຽນຢູ່ລາວມັນເປັນຈັ່ງຊັ້ນຈັ່ງຊີ້ ເປັນຫຍັງການສຶກສາບ້ານເຮົາມັນຄືບໍ່ທຽບເທົ່າບ້ານເພິ່ນ ແລ້ວ ຍາມໃດປະເທດຈະພັດທະນາໄປໄດ້ ຖ້າຍັງຈົ່ມຢູ່ແບບນີ້ແຕ່ບໍ່ມີຜູ້ໃດລົງມືເຮັດລົງມືກະທຳຫຍັງຈັກຢ່າງ. ຈົນເກີດເປັນທີ່ມາຂອງບົດຄວາມນີ້ ເຊິ່ງຂຽນຂຶ້ນມາເພື່ອໃຫ້ທຸກຄົນຄຳນຶງເຖິງບັນຫາທີ່ມີຄືເຮົາກຳລັງສອນໃຫ້ເດັກຮູ້ອ່ານຂຽນ ແຕ່ເປັນຫຍັງບໍ່ສອນໃຫ້ຮູ້ຄິດ

Key Points

  1. ການສອນເດັກກ່ອນໄວຮຽນບໍ່ຈຳເປັນຕ້ອງອ່ານຂຽນສະເໝີໄປ ຄວນເນັ້ນທີ່ຈິນຕະນາການ ແລະ ສຳພັດທັງ 5 ຂອງພວກເຂົາໃຫ້ມີປະສິດຕິພາບທີ່ດີຂຶ້ນ

  2. ບັນຫາການສຶກສາບໍ່ໄດ້ຢູ່ທີ່ສະຖານສຶກສາ ແຕ່ມັນຢູ່ໃນສະຖານບັນຄອບຄົວຂອງແຕ່ລະຄົນ ວ່າມີການອົບຮົມບົ່ມສອນກັນມາແນວໃດ

  3. ປະເທດລາວກຳລັງຫຼົງທາງໃນການສຶກສາ ເນັ້ນທີ່ການແຂ່ງວິຊາການ ການແຂ່ງຂັນຮຽນເກັ່ງ ການອ່ານຂຽນ ຈົນລືມອີກຢ່າງໜຶ່ງຄືການຄິດແບບວິພາກ

ໃນໂລກທີ່ພວມໝູນໄປໜ້າຢ່າງໄວວາ ການສຶກສາຂອງນາໆປະເທດກໍມີການປັບປຸງປ່ຽນແປງໄປເທື່ອລະຂັ້ນ ເຊິ່ງກໍເຊັ່ນດຽວກັບປະເທດເຮົາທີ່ ສສກ ກໍພະຍາຍາມຢ່າງຍິ່ງໃນການປະຕິຮູບການສຶກສາຊັ້ນສູງໃຫ້ທັດທຽມກັບປະເທດອ້ອມຂ້າງ ເພື່ອໃຫ້ມີແຮງງານທີ່ມີຝີມືທຽບເທົ່າກັບເພື່ອນບ້ານ.

ແຕ່ໃນຄວາມເປັນຈິງແລ້ວ ການປະຕິຮູບການສຶກສາທີ່ດີນັ້ນຄວນເລີ່ມຈາກຄູສອນ ແລ້ວເປັນຄູສອນເດັກກ່ອນໄວຮຽນ ເພື່ອໃຫ້ພວກເຂົາໄດ້ພັດທະນາເດັກ ແລະ ກຽມພ້ອມເດັກໃຫ້ປະເຊີນກັບການຮຽນທີ່ຂຸ້ນຂ້ຽວໃນສັງຄົມແຫ່ງການແຂ່ງຂັນນີ້.

ດັ່ງທີ່ຜູ້ປົກຄອງຫຼາຍໆຄົນນ່າຈະໄດ້ເຫັນຄືວຽກບ້ານເດັກນ້ອຍອະນຸບານ ແຕ່ເຕັມໜ້າປຶ້ມ ໃຊ້ເວລາເປັນຊົ່ວໂມງກວ່າຈະເຮັດວຽກບ້ານທັງໝົດແລ້ວ ແທນທີ່ຈະເອົາເວລາເລົ່ານັ້ນເພື່ອຫຼິ້ນກິດຈະກຳ ຫຼື ມ່ວນຊື່ກັບຄົນໃນຄອບຄົວ.

ເວົ້າໄປແລ້ວກໍເໝືອນກັບຊົກກຳປັ້ນເຂົ້າໜ້າໂຕເອງ ເພາະວ່າພໍ່ແມ່ທຸກຄົນຕ່າງກໍເປັນຄົນເລືອກໃຫ້ລູກຮຽນທີ່ໂຮງຮຽນດັງ ເສຍເງິນເທົ່າໃດກໍຍອມ ຂໍໃຫ້ລູກຕົນໄດ້ອ່ານຂຽນເປັນໄວທີ່ສຸດ ໂດຍລືມໄປວ່າເດັກນ້ອຍ 5 ປີລົງມາ ແມ່ນຕ້ອງການເຮັດກິດຈະກຳທີ່ຕ້ອງໃຊ້ປະສາດສຳພັດ ແລະ ໃຊ້ຈິດຕະນາການເຊັ່ນ ການປີນປ່າຍ, ການໄດ້ສຳພັດກັບວັດຖຸຊະນິດຕ່າງໆ, ການໄດ້ລະບາຍສີ ປະສົມສີ, ໄດ້ລົງມືເຮັດໃນສິ່ງຕ່າງໆທີ່ເຂົາບໍ່ເຄີຍເຮັດ.

ສະຖາບັນຄອບຄົວກໍເປັນອີກບ່ອນທີ່ຄວນເອົາໃຈໃສ່ ພໍ່ແມ່ບາງຄົນກໍເອົາແຕ່ເຮັດວຽກຫາເງິນຈົນບໍ່ມີເວລາໃຫ້ລູກ ບາງຄົນກໍປ່ອຍລູກຫຼິ້ນໂທລະສັບຈົນກາຍເປັນເດັກສະມາທິສັ້ນ ເຊິ່ງເລື່ອງຈິງທີ່ໜ້າເສົ້າກໍຄືພໍ່ແມ່ມັກຮ້າຍວ່າລູກຕິດມືຖື ທັ້ງໆທີ່ໂຕເອງເປັນຄົນຍື່ນໃຫ້ເຂົາຕັ້ງແຕ່ນ້ອຍ.

ຄົນເປັນພໍ່ເປັນແມ່ຕ້ອງເປັນທຸກຢ່າງໃຫ້ລູກ ເປັນເພື່ອນຫຼິ້ນ, ເປັນຄູ ຫຼື ເປັນໂຕລະຄອນໃນຈິນຕະນາການຂອງເຂົາ. ໃນບາງຄອບຄົວກໍມີແຕ່ຫ້າມ ມີແຕ່ຮ້າຍເວລາເດັກເຮັດຫຍັງຜິດ. ບາງຄອບຄົວກໍຊໍ້າພັດໂອໂພດຈົນເປັນເດັກຜູ້ດີຕີນແດງ. ບາງຄອບຄົວຊໍ້າພັດປ່ອຍປະລະເລີຍບໍ່ສົນໃຈຫຍັງໃນໂຕເດັກ. ແລ້ວທັງໝົດກໍມາໂທດວ່າໂຮງຮຽນສອນບໍ່ດີ ຫຼື ໝູ່ຢູ່ໂຮງຮຽນພາເວົ້າຄຳຫຍາບ ເປັນຕົ້ນ.

ທາງໂຮງຮຽນ ແລະ ຜູ້ປົກຄອງຄວນທີ່ຈັບມືກັນ ຫຼື ໂຮງຮຽນຄວນຈະເຊີນພໍ່ແມ່ຜູ້ປົກຄອງມາແນະນຳວິທີການຮຽນການສອນ ໃຫ້ທາງໂຮງຮຽນ ແລະ ຄອບຄົວສອນໄປໃນທິດທາງດຽວກັນ ແລ້ວຊ່ວຍກັນຜັກດັນເດັກໄປໃນທາງທີ່ຖືກທີ່ຄວນຕາມຄວາມຕ້ອງການຂອງເຂົາ.

ໃນການຮຽນອ່ານຂຽນກໍເປັນເລື່ອງທີ່ດີ ເພາະວ່າເປັນການສ້າງຄວາມພ້ອມໃຫ້ກັບເດັກ. ມັນຈະດີກວ່ານີ້ບໍ່ ຖ້າເຮົາສອນໃຫ້ເຂົາໄດ້ຮູ້ຄິດ ຮູ້ຕັດສິນໃຈດ້ວຍຕົນເອງ ແລະ ສອນໃຫ້ເຂົາມີວິໄນ ເຊັ່ນວ່າ: ມ້ຽນເກີບເອງ ຈັດກະເປົາເອງ, ກິນເຂົ້າເອງ, ເວລາລົ້ມກໍໃຫ້ເຂົາລຸກເອງ, ຫຼິ້ນຂອງຫຼິ້ນແລ້ວຕ້ອງຮູ້ຈັກມ້ຽນ, ເວລາພົບບັນຫາງ່າຍໆກໍໃຫ້ເຂົາໄດ້ລອງເຮັດດ້ວຍຕົນເອງສາກ່ອນ ຖ້າຫາກບໍ່ໄດ້ແທ້ໆ ເຮົາຈຶ່ງຍື່ນມືເຂົ້າໄປຊ່ວຍ.

ເວລາທີ່ເດັກຖາມ ເຂົາມັກຈະຖາມດ້ວຍຄວາມຢາກຮູ້ຢາກເຫັນ ແຕ່ຄຳຕອບທີ່ໄດ້ກັບເປັນຄຳວ່າຖາມເຮັດຍັງ?” “ຖາມຫຼາຍແທະ ລຳຄານ?ທ່ານບໍ່ຄິດແດ່ບໍ່ວ່າມັນຈະຈຳຝັງໃຈຂອງເຂົາໄປຈົນຮອດຍາມເປັນຜູ້ໃຫຍ່ຈົນເປັນຄົນບໍ່ກ້າຖາມຫຍັງເລີຍ.

ສະນັ້ນ, ໃນຖານະຜູ້ໃຫຍ່ ເຮົາຄວນໃຫ້ຄຳຕອບແກ່ເຂົາ ເປັນບ່ອນທີ່ເຂົາສາມາດປຶກສາໄດ້ເວລາມີບັນຫາ ໃຫ້ເຂົາໄດ້ກ້າລົມກ້າເວົ້າ ກ້າທີ່ຈະຖາມ ພໍເມື່ອເຖິງຍາມໄວລຸ້ນທີ່ເປັນຫົວລ້ຽວຫົວຕໍ່ ເຂົາກໍຈະກ້າທີ່ຈະຖາມຜູ້ປົກຄອງ ແທນທີ່ຈະໄປຖາມໝູ່ລຸ້ນດຽວກັນ. ແລ້ວທ່ານຈະບໍ່ເສຍໃຈພາຍຫຼັງ.

ການສອນໃຫ້ເຂົາຮູ້ຈັກຄິດແບບວິພາກ ລົງເລິກໄປເປັນຊັດສ່ວນເລີ່ມຈາກເລື່ອງງ່າຍໆເຊັ່ນວ່າລູກຮູ້ບໍ່ວ່າເປັນຫຍັງປາຈຶ່ງຢູ່ໃນນໍ້າແລ້ວໃຫ້ເຂົາຕອບ ເຖິງມັນຈະເປັນຄຳຕອບທີ່ຜິດກໍຢ່າ ຂໍພຽງໃຫ້ເຂົາໄດ້ຄິດດ້ວຍຕົນເອງ ນັ້ນຄືຈຸດທີ່ສຳຄັນ. ເວລາຖາມໃຫ້ Start with why ກໍຄືເລີ່ມຕົ້ນຄຳຖາມວ່າ ຍ້ອນຫຍັງ? ເປັນຫຍັງ? ເພາະເຫດໃດ? ປະມານນີ້ເປັນຕົ້ນ

ສຸດທ້າຍແລ້ວກໍຝາກຄຳຖາມໃຫ້ບັນດາທ່ານລອງກັບໄປຖາມເບິ່ງວ່າ ການສຶກສາໃນປະເທດເຮົານີ້ກຳລັງເດີນໄປທາງໃດ? ເປົ້າໝາຍແມ່ນຫຍັງ? ແລ້ວຈະບັນລຸເປົ້າໝາຍນັ້ນຮ່ວມກັນໄດ້ແນວໃດ? ທ່ານເລີ່ມປ່ຽນແປງຈາກໃນຄອບຄົວຂອງທ່ານເອງ ຫຼື ຍັງ?

ການສຶກສາຂອງປະເທດລາວຂຶ້ນຢູ່ໃນມືຂອງພວກເຮົາທຸກຄົນ

ເຮົາມາສອນໃຫ້ເຂົາຮູ້ຈັກຄິດ ແທນທີ່ຈະສອນອ່ານ-ຂຽນຢ່າງດຽວ ພ້ອມໆກັນເນາະ


ປະກອບຄຳເຫັນ

This site uses Akismet to reduce spam. Learn how your comment data is processed.