fbpx
08/04/2019 ຜົນກະທົບທາງຈິດ ທີ່ນັກສຶກສາຕ້ອງປະເຊີນ

ຜົນກະທົບທາງຈິດ ທີ່ນັກສຶກສາຕ້ອງປະເຊີນ


ອີງຕາມແຫຼ່ງຂ່າວໃນຕ່າງປະເທດບອກວ່າ 11% ຂອງນັກສຶກສາແມ່ນມີບັນຫາສຸຂະພາບທາງຈິດ. ຈາກຜົນສຳຫຼວດໃນປີທີ່ຜ່ານມາ ຂອງສະມາຄົມສຸຂະພາບຈິດໄດ້ແຈ້ງໃຫ້ຮູ້ວ່ານັກສຶກສາສ່ວນຫຼາຍແມ່ນໄດ້ຮັບຜົນກະທົບຫຼາຍໆດ້ານເຊິ່ງມີຜົນຕໍ່ການດຳລົງຊີວິດຂອງພວກເຂົາ.

ນັກສຶກສາປະຈຸບັນຕ້ອງໄດ້ປະເຊີນກັບບັນຫາຕ່າງໆນາ ລວມທັງຄ່າຮຽນ ແລະ ຄ່າຄອງຊີບທີ່ສູງຂຶ້ນເລື້ອຍໆ ເຊິ່ງບີບໃຫ້ພວກເຂົາຕ້ອງຫາວຽກເຮັດງານທຳເພື່ອແບ່ງເບົາພາລະຄອບຄົວ ແລ້ວຍັງຕ້ອງເອົາໃຈໃສ່ຕໍ່ການຮຽນເພື່ອໃຫ້ໄດ້ຜົນການຮຽນທີ່ດີ.

ງານ State Wellness ຈັດຂຶ້ນທີ່ Kent State University ສະຫະລັດອາເມລິກາ ໄດ້ມີການກ່າວເຖິງບັນດາເລື່ອງລາວທີ່ນັກສຶກສາປະຈຸບັນຈະຕ້ອງໄດ້ຕໍ່ສູ້ໃຫ້ຜ່ານພົ້ນໄປ ເຊິ່ງມີດັ່ນີ້

  1. ຄວາມກົດດັນໃນການເລືອກສາຍຮຽນ ແລະ ຮຽນໃຫ້ຈົບຕາມທີ່ກຳນົດໄວ້
  2. ຄວາມຮູ້ສຶກໃນການມີສ່ວນຮ່ວມໃນສັງຄົມ ແລະ ສະຖາບັນ
  3. ສັງຄົມອອນລາຍ ແລະ ຄວາມເປັນຈິງ
  4. ການຈັດສັນເວລາເຮັດວຽກເພື່ອຫາເງິນຈ່າຍຄ່າຮຽນ ແລະ ຄ່າໃຊ້ຈ່າຍປະຈຳວັນ
  5. ຄວາມສົມດູນຂອງຊີວິດ
  6. ມິດຕະພາບ ແລະ ຄວາມສຳພັນ

ສັງເກດເຫັນບໍວ່າຄວາມກົດດັນທີ່ນັກສຶກສາຕ້ອງພົບພໍ້ບໍ່ແມ່ນມີແຕ່ໃນຫ້ອງຮຽນ ແລະ ການສອບເສັງເພື່ອໃຫ້ໄດ້ຜົນທີ່ດີເທົ່ານັ້ນ. ຊີວິດປະຈຳວັນເອງກໍເປັນສິ່ງທີ່ກົດດັນນັກສຶກສາພໍສົມຄວນ.

ສິ່ງທີ່ຜູ້ປົກຄອງຄວນເຮັດ

ຜູ້ປົກຄອງເອງນອກຈາກຕິດຕໍ່ກັບລູກຫຼານຂອງຕົນເອງເປັນປະຈຳແລ້ວ ຍັງຕ້ອງຕິດຕໍ່ປະສານຫາຄູພ້ອມ ເພື່ອທີ່ຈະໄດ້ເຂົ້າໃຈບັນຫາທີ່ນັກສຶກສາມີ ແລ້ວຫາທາງອອກໃຫ້ທັນທ່ວງທີ ກ່ອນທີ່ຈະເຂົາຈະເສຍຜູ້ເສຍຄົນໄປ. ໃນຖານະພໍ່ແມ່ ບໍ່ແມ່ນປ່ອຍເຂົາໃຫ້ໄປໃຊ້ຊີວິດຄົນດຽວເພື່ອຈະໄດ້ຮຽນຮູ້ຊີວິດໄວໜຸ່ມ ແຕ່ຄວນຈະສົ່ງເສີມ ແລະ ປ່ອຍໃຫ້ເຂົາໄດ້ຮູ້ຈັກຄິດ ຮູ້ຈັກຕັດສິນໃຈດ້ວຍຕົນເອງຕັ້ງແຕ່ຕອນເຂົາຍັງນ້ອຍ ເພື່ອພໍ່ແມ່ຈະໄດ້ແນະນຳເຂົາໃຫ້ຖືກທີ່ຖືກທາງ ເມື່ອເວລາທີ່ເຂົາຕ້ອງກ້າວອອກຈາກບ້ານ ພວກເຂົາກໍສາມາດກ້າວຂາອອກຈາກບ້ານໄດ້ຢ່າງໝັ້ນໃຈ.

ຄູອາຈານກໍຄວນເບິ່ງແຍງຢ່າງໃກ້ຊິດ

ໃນຖານະຄູແມ່ນຕ້ອງໄດ້ເບິ່ງແຍງລູກສິດຂອງຕົນເອງໃຫ້ທົ່ວເຖິງ ທັງເລື່ອງການຮຽນ ແລະ ຈິດໃຈຂອງເຂົາ ເນື່ອງຈາກວ່າຈິດໃຈທີ່ເບີກບານ ຍ່ອມສົ່ງຜົນດີຕໍ່ການຮຽນ ແຕ່ຖ້າຫາກຈິດໃຈທີ່ບໍ່ດີ ຜົນການຮຽນກໍຍ່ອມຕົກຕໍ່າເຊັ່ນກັນ. ການທີ່ພວກເຂົາຕ້ອງປ່ຽນຈາກການສຶກສາໃນລະບົບສາມັນ ມາເຂົ້າສູ່ລະບົບວິຊາຊີບນັ້ນ ຕ້ອງໄດ້ມີການປັບໂຕຂ້ອນຂ້າງຫຼາຍພໍສົມຄວນ ສະນັ້ນຄູອາຈານຕ້ອງເບິ່ງແຍງຢ່າໃຫ້ຂາດສາຍຕາ.

ຈະຮູ້ໄດ້ແນວໃດວ່າມີບັນຫາທາງຈິດ

ຈາກເວັບໄຊ Metal Illness ໄດ້ລະບຸໃຫ້ຮູ້ວ່າບັນດາອາການທາງຈິດສະແດງອອກດັ່ງລຸ່ມນີ້

  • ຮູ້ສຶກເສົ້າ ຫຼື ສິ້ນຫວັງ
  • ສັບສົນ ຂາດສະມາທິ
  • ຮູ້ສຶກເປັນຫ່ວງ, ຢ້ານ ຫຼື ກັງວົນ
  • ອາລົມແປປວນສູງ ບຶດດີ ບຶດຮ້າຍ
  • ຕີໂຕຫ່າງຈາກສັງຄົມ ໝູ່ເພື່ອນ ຫຼື ກິດຈະກຳຕ່າງໆ
  • ເມື່ອຍ ອ່ອນລ້າ ແລະ ນອນບໍ່ຫຼັບ
  • ຮູ້ສຶກແປກແຍກຈາກໂລກແຫ່ງຄວາມເປັນຈິງ
  • ມີບັນຫາເລື່ອງຄວາມສຳພັນກັບຜູ້ຄົນ
  • ຕິດເຫຼົ້າ ຫຼື ຕິດຢາ
  • ກິນເຂົ້າບໍ່ແຊບ
  • ມັກໃຊ້ຄວາມຮຸນແຮງ ແລະ ໃຈຮ້າຍງ່າຍ
  • ຄິດຢາກຂ້າໂຕຕາຍ

ຖ້າຫາກນັກສຶກສາ ຫຼື ຜູ້ໃດທີ່ມີອາການຂ້າງເທິງນັ້ນ ກໍຄວນພົບແພດໂດຍດ່ວນ ບັນຫາເລື່ອງສຸຂະພາບຈິດບໍ່ແມ່ນເລື່ອງນ້ອຍທີ່ຈະເບິ່ງຂ້າມ ເພາະດາລານັກຮ້ອງທີ່ມີຊື່ສຽງຫຼາຍຄົນກໍຂ້າໂຕຕາຍຍ້ອນມີບັນຫາທາງຈິດ.

ຖ້າຄິດວ່າໂຕເອງມີບັນຫາຄວນຫາທາງອອກໂດຍດ່ວນ ຫຼື ປຶກສາ yaklao.com

ແຊບົດຄວາມນີ້ອອກໄປໃຫ້ໝູ່ຂອງທ່ານເພື່ອເຕືອນສະຕິ


ປະກອບຄຳເຫັນ

This site uses Akismet to reduce spam. Learn how your comment data is processed.