fbpx
21/02/2019 galaxy unpack 2019

ເປີດໂຕ Samsung Galaxy S10 ໃນງານ Galaxy Unpack 2019


ວັນທີ 21 ກຸມພາ 2019 ເວລາ 2:00 ຕາມເວລາບ້ານເຮົາ. Samsung ໄດ້ຈັດງານ Galaxy Unpack ຕາມຂ່າວທີ່ອອກໃນຊ່ວງທີ່ຜ່ານມາ.

ໄຮໄລ້ຂອງງານແມ່ນຕະກູນ Samsung Galaxy S10 ນອກນັ້ນຍັງມີອຸປະກອນອື່ນໆອີກຫຼາຍຢ່າງ ທັງອຸປະກອນສວມໃສ່ ແລະ ພິເສດແມ່ນຈໍພັບໄດ້.

ຖ້າທ່ານຢາກເບິ່ງຍ້ອນຫຼັງກໍສາມາດເຂົ້າໄປເບິ່ງໄດ້ຕາມວິດີໂອດ້ານລຸ່ມ ຫຼື ອ່ານໄດ້ທີ່ບົດຄວາມທີ່ Yaklao.com ຈະສະຫຼຸບໃຫ້ທ່ານ.

Galaxy S10 ກໍເປີດໂຕຕາມຄາດ ມາພ້ອມກັບຈໍ 6.1ນິ້ວ QHD+ Dynamic AMOLED ຈໍໂຄ້ງ ແລະ 3 ກ້ອງປະກອບດ້ວຍເລນກວ້າ, ເລັນຊູມ ແລະ ເລັນທົ່ວໄປ ຄວາມລະອຽດຢູ່ທີ່ 16, 12, 12 ລ້ານພິກເຊວຕາມລຳດັຍ.

Galaxy S10

ຍັງມາພ້ອມກັບກ້ອງທີ່ລອຍເທິງໜ້າຈໍບໍ່ຕ້ອງມີແວ່ງມາກວນໃຈຄືກັບຄ້າຍໝາກໂປ່ມແວ່ງ ແຖມດ້ວຍລະບົບສະແກນລາຍນິ້ວມືແບບ Ultrasonic ທີ່ຝັງຢູ່ໃຕ້ຈໍ ສາມາດສະແກນລາຍນິ້ວມືຢູ່ໜ້າຈໍທັນທີ

ແຕ່ມີຂ່າວອອກມາວ່າຈະມີບັນຫາເວລາໃສ່ຟິມກັນແຕກ. Samsung Galaxy S10 ຍັງມາພ້ອມກັບ ໜ່ວຍຄວາມຈຳ 8ກິກ ແລະ ພື້ນທີ່ 512ກິກ ມີພະລັງງານ 3,400mAh ໃນລາຄາ 899 ໂດລາສະຫະລັດ.

ພ້ອມກັນນັ້ນກໍຍັງມີ Galaxy S10 Plus ແລະ Galaxy S10e

Galaxy S10 Plus ຈໍ 6.4ນິ້ວ QHD+ AMOLED. ກ້ອງໜ້າຄູ່ຖ່າຍພ້ອມກັນ 8ລ້ານພິກເຊວ ແລະ 10ລ້ານພິກເຊວ. ແບັດເຕີຣີ 4,100mAh ໜ່ວຍຄວາມຈໍາຈັດເຕັມທີ່ 12ກິກ ແລະ ພື້ນທີ່ເກັບຂໍ້ມູນເຕັມທີ່ເລີຍ 1TB (1000 ກິກ).

ລາຄາເປີດໂຕທີ່ 999 ໂດລາສະຫະລັດ. ສະເປັກໂດຍລວມກໍຄືກັນ ກັບ Galaxy S10 ແຕກຕ່າງກັນທີ່ຈໍ, ໜ່ວຍຄວາມຈຳ ແລະ ກ້ອງໜ້າຄູ່.

Galaxy S10e ນ້ອງນ້ອຍຂອງລຸ້ນ ມາໃນລາຄາທີ່ເບົາໆ 749 ໂດລາສະຫະລັດ ມີໜ້າຈໍຂະໜາດ 5.8ນິ້ວ Full HD+ AOMLED ກ້ອງຫຼັງຄູ່ 16ລ້ານພິກເຊວເປັນເລັນກວ້າງ ແລະ 12ລ້ານພິກເຊວເປັນເລັນປົກກະຕິ. ຂາດເລັນຊູມ.

ສະເປັກກໍຈັດມາແບບເບົາໆສົມລາຄາ ໜ່ວຍຄວາມຈຳ 6ກິກ ແລະ 8ກິກ ຄວາມຈຸຢູ່ທີ່ 256ກິກ ແລະ ແບັດກໍຖືວ່າທົນໃນລະດັບໜຶ່ງ 3,100mAh. ສ່ວນສະແກນລາຍນິ້ວມືຈະຖືກຍ້າຍມາຢູ່ທີ່ດ້ານຂ້າງໂຕເຄື່ອງເຊິ່ງບໍ່ຄ່ອຍຄັກປານໃດ.

ພິເສດແມ່ນ Galaxy S10 5G

ເຊິ່ງເປັນໂທລະສັບທີ່ມີເທັກໂນໂລຊີ 5G ຈໍ 6.7ນິ້ວ ແບັດ 4,500mAh ແຕ່ບ້ານເຮົາຄົງຕ້ອງອົດໃຊ້ເພາະບໍ່ທັນມີ 5G

Samsung Galaxy Fold

ທີເດັດອີກຢ່າງໃນງານແມ່ນ Samsung Galaxy Fold ຫຼື ທໍລະສັບຈໍພັບໄດ້ ເອ້… ຫຼື ຈະເອີ້ນວ່າແທັບເລັດຈໍພັບໄດ້ ໂອ້ຍ!!!! ງົງ.

ຈໍ 4.6ນິ້ວ ແລະ 7.3ນິ້ວ ອັນນີ້ບໍ່ແມ່ນສອງເຄື່ອງໄດ໋ ແຕ່ແມ່ນເຄື່ອງດຽວທີ່ສາມາດພັບ ແລະ ເປີດອອກເປັນສອງຂະໜາດຈໍ ມາພ້ອມໜ່ວຍຄວາມຈຳ 12ກິກ ແລະ ພ້ອມທີ່ຈັດເກັບ 512ກິກ

ມີພະລັງງານຢູ່ທີ່ 4,380mAh ສະໜັບສະໜູນ 5G ມາໃນລາຄາ 1,980 ໂດລາສະຫະລັດ

Samsung Galaxy Watch Active

ໃຜໆກໍໃສ່ໂມງ Samsung ເລີຍເປີດໂຕ Samsung Galaxy Watch Active ທີ່ມີຄວາມສາມາດກັນນໍ້າເລິກໄດ້ເຖີກ 50ແມັດ ແລະ ສາມາດຕິດຕາມຄວາມຄຽດສະສົມ, ອັດຕາການເຕັ້ນຂອງຫົວໃຈ.

ໂຕເຄື່ອງເຮັດດ້ວຍອາລູມີນຽມຊັ້ນດີ ດ້ານໃນກໍມີ One UI ໃຊ້ງານງ່າຍສະດວກ ເໝາະກັບນັກກິລາເປັນຢ່າງຍິ່ງ ເພາະມີສາຍຢາງໃຫ້ໃຊ້ນຳ. ສ່ວນລາຄາແມ່ນຍັງບໍ່ທັນແນ່ນອນ

Samsung Galaxy Buds

ໃນທີ່ສຸດກໍປ່ອຍອອກມາຕາມຄ້າຍໝາກໂປ່ມແວ່ງ ຫູຟັງໄຮ້ສາຍ ສາມາດຟັງເພງໄດ້ຍາວນານ 6ຊົ່ວໂມງ ແລະ ໂທລົມສາຍໄດ້ 5ຊົ່ວໂມງ

ມາພ້ອມກ່ອງສວຍງາມ ທີ່ສາມາດສາກຫູຟັງໄດ້ໂດຍທີ່ບໍ່ຕ້ອງສຽບສາຍ. ລາຄາເປີດໂຕທີ່ 149 ໂດລາສະຫະລັດ.

ນັ້ນຄືທັງໝົດທີ່ yaklao.com ໄດ້ຮວບຮວມມາໃຫ້ ຖ້າຄິດວ່າຄັກກໍຂໍຄົນລະແຊແດ່ເດີ້

source: https://www.techradar.com/news/heres-everything-that-launched-at-samsung-unpacked-2019

ປະກອບຄຳເຫັນ

This site uses Akismet to reduce spam. Learn how your comment data is processed.