fbpx
12/07/2019 ຖວທ ແຈ້ງໃຫ້ທຸກໜ້າຂ່າວອອນລາຍ ໃຫ້ສ້າງຕັ້ງເປັນທາງການ

ຖວທ ແຈ້ງໃຫ້ທຸກໜ້າຂ່າວອອນລາຍ ໃຫ້ສ້າງຕັ້ງເປັນທາງການ


ຖືວ່າເປັນການປະກາດຄຳສັ່ງຂອງ ກະຊວງ ຖະແຫຼງຂ່າ ວັດທະນະທຳ ແລະ ທ່ອງທ່ຽວ ທີ່ຫາກໍຈໍ້າກາໝາດໆມາ ໃຫ້ທຸກໆໜ້າຂ່າວອອນລາຍ ຈົ່ງສ້າງຕັ້ງເປັນທາງການ ຢ່າງຖືກຕ້ອງຕາມລະບຽບຂັ້ນຕອນ ແລະ ກົດໝາຍ.

ອ້າງອີງຈາກ https://laoedaily.com.la/55145/ ທີ່ໄດ້ແຈ້ງວ່າໃຫ້ທຸກໆເວັບໄຊ້ ແລະ ເພຈ ທີ່ເຜີຍແຜ່ຂໍ້ມູນຂ່າວສານອອນລາຍທຸກປະເພດ ຕ້ອງໄດ້ໄປຂຶ້ນທະບຽນໃຫ້ຖືກຕ້ອງເປັນລາຍລັກອັກສອນຕາມລະບຽບການ ໂດຍມີເນື້ອໃນດັ່ງນີ້:

  • ອີງໃສ່ກົດໝາຍສື່ມົນຊົນ (ສະບັບປັບປຸງ) ເລກທີ 01/ສພຊ ລົງວັນທີ 04 ພະຈິກ 2016,
  • ອີງໃສ່ດຳລັດວ່າດ້ວຍ ການຈັດຕັ້ງ ແລະ ການເຄື່ອນໄຫວ ຂອງກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ສະບັບເລກທີ 95/ນຍ, ລົງວັນທີ 09 ມີນາ 2017;
  • ອີງຕາມ ຂໍ້ຕົກລົງ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຫ້ອງການກະຊວງ, ສະບັບເລກທີ 312/ຖວທ ລົງວັນທີ 28 ມີນາ 2018;

ຫ້ອງການ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຂໍຖືເປັນກຽດແຈ້ງມາຍັງການຈັດຕັ້ງ, ບຸກຄົນ ແລະ ນິຕິບຸກຄົນຊາບທົ່ວເຖິງກັນວ່າ:

  1. ໃນໄລຍະຜ່ານມາ ມີການຈັດຕັ້ງ, ບຸກຄົນ ແລະ ນິຕິບຸກຄົນ ໄດ້ສ້າງໜ້າຂ່າວບໍລິການຂໍ້ມູນຂ່າວສານແກ່ສັງຄົມ ແລະ ກຳນົດຊື່ເອີ້ນໂດຍພາລະການ ໂດຍບໍ່ໄດ້ຮັບອະນຸຍາດຢ່າງຖືກຕ້ອງຕາມກົດໝາຍ ຈາກອົງການຄຸ້ມຄອງສື່ມວນຊົນ ເຊິ່ງມີທັງຂ່າວທີ່ມີຄວາມຈິງ, ມີປະໂຫຍດ ແລະ ມີທັງຂ່າວປອມ, ຂ່າວອະກຸສົນ, ຂ່າວບິດເບືອນຄວາມຈິງ ອັນໄດ້ສ້າງຄວາມສັບສົນໃຫ້ສັງຄົມ ເປັນຕົ້ນ: ໜ້າຂ່າວອອນລາຍ ໃນເຟດສບຸກ (Facebook) ທີ່ໃສ່ນາມຕົນເອງວ່າ “Support Priminister Thongloun Sisoulth” ເຊິ່ງພາຍຫຼັງໄດ້ປ່ຽນຊື່ມາເປັນ “ມວນຊົນລາວ support” ທີ່ສຳນັກຂ່າວສານປະເທດລາວ ໄດ້ໃຫ້ຂ່າວໃນວັນທີ 26/06/2019 ຜ່ານມາ, ໂທລະໂຄ່ງ, ABC Laos News ສຳນັກຂ່າວເອບີຊີລາວ ແລະ ອື່ນໆ.
  2. ເພື່ອເສີມຂະຫຍາຍດ້ານຄຸນປະໂຫຍດ ແລະ ຈຳກັດດ້ານຫຍໍ້ທໍ້ຂອງສື່ສັງຄົມອອນລາຍ ຫຼື ໜ້າຂ່າວອອນລາຍ, ຖ້າບຸກຄົນ, ນິຕິບຸກຄົນ ແລະ ການຈັດຕັ້ງ ໄດ້ສ້າງໜ້າຂ່າວອອນລາຍຜ່ານພາຫະນະສື່ປະເພດຕ່າງໆ (Platform) ບໍລິການສັງຄົມຜ່ານມາແລ້ວ ຫຼື ບຸກຄົນ, ນິຕິບຸກຄົນ ແລະ ການຈັດຕັ້ງ ມີຈຸດປະສົງຈະສ້າງຕັ້ງ ເວບໄຊ, ໜ້າຂ່າວອອນລາຍ (Web Page) ຜ່ານພາຫະນະສື່ປະເພດຕ່າງໆ (Platform) ເພື່ອບໍລິການສັງຄົມ ກໍສາມາດເຮັດໄດ້ ແຕ່ຕ້ອງໄດ້ແຈ້ງຈຸດປະສົງ, ຂໍອະນຸຍາດເຄື່ອນໄຫວຈາກ ກົມສື່ມວນຊົນ ກະຊວງ ຖວທ, ພະແນກ ຖວທ ແຂວງ ແລະ ນະຄອນຫຼວງ ເພື່ອອອກໃບອະນຸຍາດເຄື່ອນໄຫວຢ່າງຖືກຕ້ອງຕາມກົດໝາຍ ແລະ ລະບຽບການ. ທຸກການເຄື່ອນໄຫວບໍລິການຂໍ້ມູນຂ່າວສານແກ່ສັງຄົມ ຜ່ານສື່ສັງຄົມອອນລາຍທຸກປະເພດ ໂດຍບໍ່ໄດ້ຮັບອະນຸຍາດຈາກອົງການຄຸ້ມຄອງສື່ມວນຊົນ ແມ່ນຜິດກົດໝາຍ ແລະ ລະບຽບການ.

ເຈົ້າໜ້າທີ່ຄຸ້ມຄອງສື່ມວນຊົນຢູ່ສູນກາງ ແລະ ທ້ອງຖິ່ນ ໄດ້ກະກຽມ ມີແບບຟອມລະອຽດເພື່ອປະກອບໃຫ້ເຈົ້າຂອງໜ້າຂ່າວ (Admin)

ດັ່ງນັ້ນ, ຈຶ່ງໄດ້ແຈ້ງມາເພື່ອຊາບ ແລະ ພ້ອມກັນຈັດຕັ້ງປະຕິບັດຕາມເນື້ອໃນຂ້າງເທິງໃຫ້ໄດ້ຮັບຜົນດີ.

ຫົວໜ້າຫ້ອງການ

ທ່ານ ບຸນເພັງ ສຸພາບ.

 

 

ຈາກການອ່ານແຈ້ງການດັ່ງກ່າວ ແອັດສະຫຼຸບໄດ້ຄື ມັນມີເພຈຂ່າວ ແລະ ເວັບຂ່າວທີ່ໃຫ້ຂໍ້ມູນເປັນເທັດ ລວມທັງສ້າງຄວາມບິດເບືອນໃຫ້ແກ່ສັງຄົມ, ຕົວະຍົວະ ຫຼອກລອງ ປັ່ນປ່ວນ ສ້າງກະແສດ້ານລົບໃຫ້ກາຍເປັນປາກົດການຫຍໍ້ທໍ້ ຈຶ່ງເກີດມີແຈ້ງການສະບັບນີ້ຂຶ້ນມີ.

ແຕ່ແອັດຍັງສົງໄສຄື ເວັບຄື yaklao.com ຂອງເຮົາ ເຊິ່ງເປັນເວັບທີ່ໃຫ້ຄວາມຮູ້ແກ່ສັງຄົມ ບໍ່ໄດ້ມີການສ້າງຄວາມທີ່ບິດເບືອນ ບໍ່ໄດ້ມີການຕົວະຍົວະ ປຸກປັ່ນ ກໍຈຳເປັນຕ້ອງໄດ້ໄປຈົດທະບຽນນຳບໍ?

ເຮັດເວັບ ກໍເຮັດເພາະວ່າມັກ ແລະ ຢາກເຜີຍແຜ່ສິ່ງທີ່ຕົນເອງຮູ້ໃຫ້ເປັນປະໂຫຍແກ່ສັງຄົມ ຍອມຈົກຖົງເສຍເງິນຕົນເອງເຮັດ ບໍ່ໄດ້ຜົນຕອບແທນອັນໃດທີ່ເປັນເງິນຄຳເລີຍແມ້ແຕ່ນ້ອຍ.

ເພື່ອນໆ ແລະ ລູກເພຈ ຄິດວ່າແນວໃດກັບແຈ້ງການນີ້?

ສະແດງຄຳຄິດເຫັນໄດ້ ແຕ່ຕ້ອງສ້າງສັນເດີ້.


Tagged on:

ປະກອບຄຳເຫັນ

This site uses Akismet to reduce spam. Learn how your comment data is processed.