fbpx
20/06/2019 ຂ້ອຍຈະບໍ່ກັບໄປປະເທດລາວອີກ

ຂ້ອຍຈະບໍ່ກັບໄປປະເທດລາວອີກ


ປະເທດລາວ ດິນແດນສວຍງາມ ອຸດົມໄປດ້ວຍທຳມະຊາດ ແລະ ຊັບພະຍາກອນທຸກຢ່າງ. ເໝາະແກ່ການທ່ອງທ່ຽວແບບອານຸລັກ ແລະ ເປັນອັນດັບໜຶ່ງໃນຮ້ອຍຂອງບັນດາປະເທດທີ່ຄວນໄປທ່ອງທ່ຽວ

ແຕ່ໆໆໆໆ…. ກໍເກີດເລື່ອງຂຶ້ນຈົນໄດ້ ເມື່ອມີນັກທ່ອງທ່ຽວຊາວອາເມລິກາຄົນໜຶ່ງ ຊື່ວ່າ ນາງ ອໍຣາ ໄດ້ເດີນທາງມາທ່ອງທ່ຽວທີ່ປະເທດລາວໃນໄລຍະເວລາ 10 ມື້. ແຕ່ປະສົບການທີ່ລາວໄດ້ຮັບນັ້ນຊ່າງບໍ່ໜ້າພູມໃຈເລີຍ.

1. ເລື່ອງຫຼອກລວງ ຕົ້ນຕຸ໋ນ ໂກງ

ເລີ່ມຈາກຈຸດທຳອິດຂອງນັກທ່ອງທ່ຽວເລີຍຄືເດີ່ນບິນ ລາວໄດ້ເອີ້ນໃຊ້ບໍລິການລົດແທັກຊີຂອງສະໜາມບິນ ແຕ່ດ້ວຍລາຄາທີ່ແພງຮອດ 10ໂດລາ ໃນໄລຍະທາງພຽງ 2ກມ ກັບກະເປົ໋າອີກ 17ກກ ນາງເລີຍຕັດສິນໃຈຍ່າງໄປໂຮງແຮມ.

ລົດເມກໍເປັນອີກບ່ອນທີ່ນາງຖືກ ນາງເລົ່າວ່າລົດເມໄດ້ຈອດທີ່ໝູ່ບ້ານແຫ່ງໜຶ່ງ ຫ່າງຈາກສະຖານີລົດເມປະມານ 3ກມ ແລ້ວຖາມເອົາຄ່າໂດຍສານເພີ່ມອີກຄົນລະ 2ໂດລາ ເພື່ອທີ່ຈະໄປສົ່ງໃຫ້ຮອດສະຖານີລົດເມ ນາງເລີຍຕັດສິນໃຈຍ່າງລຸຍຝົນໄປສະຖານີລົດເມ.

ທີ່ວັງວຽງນາງກໍຖືກແບບດຽວກັນ ແຕ່ເປັນເວລາ 11:00ກາງຄືນ.

ຍັງມີອີກຫຼາຍລາຍການທີ່ນາງຖືກ ສາມາດເຂົ້າໄປອ່ານໄດ້ທີ່ບ໊ອກຕົ້ນສະບັບ

2. ລາຄາຕຸກໆກໍຈັ່ງແມ່ນແສນແພງ

ນາງໄດ້ຈ້າງຕຸກໆ ແຕ່ລາຄາກໍຊິປະມານ 15ໂດລາ ພາຍໃນໄລຍະເວລາ 15ນາທີ. ນາງບອກວ່າສາມາດຕໍ່ລອງໄດ້ ແຕ່ບໍ່ແມ່ນກັບຕຸກໆໃນລາວ. ເພື່ອການເດີນທາງໃນເມືອງ ນາງເລືອກທີ່ຈະໃຊ້ລົດເມຫຼາຍກວ່າ.

3. ເກືອບຖືກຫຼັກເຄື່ອງ

ທີ່ວັງວຽງ ນາງກໍຖືກງັດປະຕູຫ້ອງພັກ ແຕ່ໂຊກດີທີ່ນາງບໍ່ປະສິ່ງຂອງມີຄ່າໄວ້ໃນຫ້ອງ ບໍ່ດັ່ງນັ້ນນາງຄົງຈະໝົດໂຕແນ່ນອນ. ນາງຮູ້ສຶກຖືກຄຸກຄາມຢ່າງໜັກໜ່ວງການການກະທຳຂອງໂຈນໃນຄັ້ງນີ້.

4. ຕ້ອງກຽມພ້ອມທຸກຢ່າງ

ຜູ້ຄົນໃນປະເທດລາວລ້ວນແຕ່ຄາດເດົາໄດ້ຍາກ ນາງພົບກັບປະສົບການທີ່ບໍ່ດີກັບຜູ້ຄົນທີ່ບໍ່ດີໃນປະເທດລາວ. ແຕ່ນາງກໍບອກວ່ານາງມັກທຳມະຊາດໃນປະເທດລາວແຮງ ຍົກເວັ້ນຜູ້ຄົນນັ້ນລະທີ່ບໍ່ປະທັບໃຈ.

5. ສະຫຼຸບ

ນາງສະຫຼຸບວ່າປະເທດລາວເປັນປະເທດທີ່ສວຍງາມ ແຕ່ເປັນຄວາມໂຊກຮ້າຍຂອງນາງເອງທີ່ມາພົບປະຜູ້ຄົນທີ່ບໍ່ດີ ພົບກັບປະສົບການທີ່ບໍ່ໜ້າປະທັບໃຈ. ແຕ່ບໍ່ແມ່ນວ່າທຸກຄົນຈະພົບແບບນີ້ ນາງແນະນຳວ່າຢ່າງໜ້ອຍກໍໃຫ້ມາທ່ອງທ່ຽວລາວລອງເບິ່ງ ມາແບບເປີດໃຈ.

ແອັດມິນກໍຄິດວ່າປະສົບການທີ່ນາງພົບນັ້ນມີສ່ວນເປັນຈິງ ເພາະມີໝູ່ຊາວຕ່າງຊາດຂອງແອັດມິນທີ່ມາທ່ຽວກໍເຄີຍພົບປະສົບການແບບນັ້ນ. ຢາກຝາກເຖິງປະຊາຊົນລາວທຸກຄົນ ໃຫ້ຮ່ວມໃຈກັນເປັນເຈົ້າພາບທີ່ດີ ຕ້ອນຮັບແຂກຕ່າງຊາດດ້ວຍນໍ້າຈິດນໍ້າໃຈເອື້ອເຟື້ອເຜື່ອແຜ່ ບໍ່ໂກງບໍ່ກິນ ບໍ່ຖືວ່າເຂົາເປັນບໍ່ເງິນບໍ່ຄຳແລ້ວຊິໄປກອບໂກຍເອົາ.

ປີທ່ອງທ່ຽວລາວ ແຕ່ນັກທ່ອງທ່ຽວຈົ່ມແບບນີ້ ບໍ່ຮູ້ວ່າລັດຖະບານຈະແກ້ໄຂແນວໃດນໍ້…

Source: https://dailytravelpill.com/why-i-will-never-go-back-to-laos-the-ugly-truth


ປະກອບຄຳເຫັນ

This site uses Akismet to reduce spam. Learn how your comment data is processed.