fbpx
22/02/2019 ຖາມຫາສາມັນສຳນຶກ ໃນການຖິ້ມຂີ້ເຫຍື້ອ

ຖາມຫາສາມັນສຳນຶກ ໃນການຖິ້ມຂີ້ເຫຍື້ອ


ງານບຸນວັດພູເປັນງານທີ່ຍິ່ງໃຫຍ່ ຈັດຂຶ້ນທຸກປີ ແລະ ມີຜູ້ສະແຫວງບຸນຢ່າງຫຼວງຫຼາຍເຂົ້າຮ່ວມ ເຮັດໃຫ້ກາຍເປັນແຫຼ່ງທ່ອງທຽວທີ່ໜ້າດຶງດູດ ແລະ ໜ້າຈັບໃຈສຳລັບຜູ້ທີ່ເຂົ້າຊົມ.

ແນ່ນອນ, ເມື່ອມີຄົນ ກໍຕ້ອງມີຄວາມເສຍຫາຍ ເພາະມະນຸດຖະນັດສ້າງຄວາມເສຍຫາຍ ເຊິ່ງຄວາມເສຍຫາຍໃນນີ້ໝາຍເຖິງທັດສະນີຍະພາບທີ່ເສຍຫາຍ ມີດອກໄມ້ປຼາສຕິກປະດັບປະດາໄປທົ່ວວັດພູ ນັກທ່ອງທ່ຽວທັງພາຍໃນ ແລະ ຕ່າງປະເທດຕາງກໍຈົ່ມເປັນສຽງດຽວກັນວ່າເປື້ອນເປີ.

ຖາມວ່າໃຜຈະເປັນຄົນຮັບຜິດຊອບ ຄືບໍ່ມີໜ່ວຍງານໃດມາອານາໄມ ມາມ້ຽນມັດໃຫ້ຈົບໃຫ້ງາມ ຂັ້ນເທິງຄືບໍ່ດູແລໃຫ້ເປັນລະບຽບແດ່.

ສຳລັບທີມງານ yaklao ຄິດວ່າເລື່ອງການຖິ້ມຂີ້ເຫຍື້ອມັນບໍ່ແມ່ນເລື່ອງຂອງລັດຖະບານ ມັນບໍ່ແມ່ນເລື່ອງຂອງໜ່ວຍງານໃດໜຶ່ງ ແຕ່ມັນເປັນເລື່ອງຂອງທຸກຄົນທີ່ຈະຕ້ອງໄດ້ເອົາໃຈໃສ່ ຈະຕ້ອງໄດ້ສົ່ງເສີມໃຫ້ຖິ້ມຂີ້ເຫຍື້ອເປັນທີ່ເປັນທາງ ດີແທ້ແມ່ນໃຫ້ຫຼຸດຜ່ອນຂີ້ເຫຍື້ອເທົ່າທີ່ຈະເປັນໄປໄດ້.

ຝາກເຖິງຜູ້ຈັດງານທຸກໆງານ ແລະ ປະຊາຊົນທຸກໆຄົນລອງໄປຄິດເບິ່ງວ່າຈະເປັນແນວໃດ ຖ້າຫາກເຮົາອອກຮູບແບບງານໄຮ້ຂີ້ເຫຍື້ອ ເຊັ່ນ: ບຸນທາດຫຼວງໄຮ້ຂີ້ເຫຍື້ອ, ບຸນບັ້ງໄຟໄຮ້ຂີ້ເຫຍື້ອ ຫຼື ເທດສະການອື່ນໆກໍໄດ້ ມັນຄົງຈະເປັນການດີບໍ່ໜ້ອຍເລີຍ ອານຸລັກສິ່ງແວດລ້ອມ ແລະ ຮັກສາທັດສະນີຍະພາບໄປໃນໂຕເລີຍ.

ຈາກເພຈ ສຽງທັມ VOICE
#ເປັນພາບທີ່ເສົ້າໃຈມີຄົນສົ່ງຂ່າວມາຫລັງແລ້ວງານບຸນນະມັດສະການຜາສາດຫີນວັດພູຝຣັ່ງຈົ່ມຂີ້ເຫຍື້ອເຕັມເທິງວັດພູ???
ໃນບຸນນະມັດສະການຜາສາດຫີນວັດພູຜ່ານໄປບໍ່ພໍເທົ່າໃດມື້ ສິ່ງທີ່ຫລົງເຫລືອໄວ້ຄືເສດຂີ້ເຫຍື້ອຈາກ ແມ່ຄ້າມາຕັ້ງຮ້າຍຂາຍເຄື່ອງແດ່,​ມາຈາກຄົນຊື້ ຄົນຂາຍ ກິນແລ້ວກາຖິ້ມໄປທົ່ວທີບແດ່ ແລະ ອີກຫລາຍປັດໃຈອີກ ທີ່ນຳວັດຖຸສິ່ງຂອງ ເຄື່ອງຢູ່ຄົວກິນ ທີ່ມາກຽມໄວ້ໃນງານບຸນ,​ເຊິ່ງຫລັງແລ້ວງານພາບກໍ່ເປັນດັ່ງທີ່ເຫັນ ເຮັດໃຫ້ຄົນ ລາວ ແລະ ຕ່າງປະເທດມາທ່ຽວຜາສາດຫິນວັດພູຫລັງແລ້ວງານ ເຫັນແລ້ວ ຫົດຫູ່ ແລະ ເສົ້າໃຈ ແລະ ຖາມກັນວ່າ ນີ້ບໍ່ຜາສາດຫີນວັດພູຫລັງແລ້ວງານ.
ໃນຈິດສຳນິກຂອງຄົນຂາຍ ກັບ ຄົນຊື້ ແລະ ມາເລາະງານ ( ພໍ່ຄ້າ ແມ່ຄ້າ),​ຂາຍແລ້ວມີແຕ່ຢາກໄດ້ ແຕ່ແລ້ວງານກໍ່ຖິ້ມໄວ້ຄິດວ່າຊິມີຫນ່ວຍງານອື່ນມາເກັບມາອານາໄມ ແຕ່ກໍ່ເປັນພາບແບບນີ້ທຸກໆປີ???,​ ຜາສາດຫີນວັດພູໄດ້ພຽງຊື່ວ່າມໍລະດົກໂລກຂອງລາວ ແຕ່ບໍ່ໄດ້ ສົມຊື່ວ່າມໍລະດົກໂລກທາງ ຄວາມສະອາດ ແລະ ຄວາມສວຍງາມທາງປູສະນິຍະສະຖານເກົ່າແກ່.​??

ມີຕົວຢ່າງໃຫ້ເຫັນທີ່ປະເທດຍີ່ປຸ່ນ ມີງານສະຫຼອງທີ່ນັກກິລາຫຼຽນທອງໂອລິມປິກ ໄດ້ແຊ້ມສະເກັດນໍ້າແຂງ ຢູຊູຣຸ ຮັນຍູ (Yuzuru Hanyu) ແລ້ວມີການເດີນຂະບວນອ້ອມເມືອງເຊັນໄດ ມີຜູ້ເຂົ້າຮ່ວມກວ່າແສນຄົນ ທີມງານເທດສະບານກໍຈັດກຳລັງອາສາສະມັກພັນຄົນ ພ້ອມຖົງຢາງເພື່ອເກັບຂີ້ເຫຍື້ອ ແຕ່ປາກົດວ່າເກັບໄດ້ພຽງແຕ່ 6 ຖົງເທົ່ານັ້ນ. ເພາະປະຊາຊົນທຸກຄົນພ້ອມໃຈກັນຮັກສາຄວາມສະອາດ ບໍ່ຖິ້ມຂີ້ເຫຍື້ອຊະຊາຍ ແລ້ວຍັງເກັບຂີ້ເຫຍື້ອຂອງຕົນເອງກັບບ້ານນຳ ເຮັດໃຫ້ງານນັ້ນເປັນການເດີນຂະບວນທີ່ສະອາດທີ່ສຸດໃນໂລກ ເພາະວ່າຄອບຄົວຂອງ ຮັນຢູ ຂໍແຟນໆວ່າໃຫ້ພາກັນຮັກສາຄວາມສະອາດ ບໍ່ໃຫ້ຖິ້ມຂີ້ເຫຍື້ອຊະຊາຍ.

https://www.khaosod.co.th/sports/news_1012430

ສ່ວນອີກກໍລະນີທີ່ແຟນບານຍີ່ປຸ່ນພາກັນເກັບຂີ້ເຫຍື້ອຂອງຕົນເອງຫຼັງຈາກຊົມເຕະບານແລ້ວ

ແລ້ວພວກເຮົາປະຊາຊົນລາວ ຈະຊ່ວຍກັນເຮັດໃຫ້ບ້ານເຮົາສະອາດໄດ້ບໍ່?

ຂໍຂອບໃຈພາບຈາກ ສຽງທັມ Voice


ປະກອບຄຳເຫັນ

This site uses Akismet to reduce spam. Learn how your comment data is processed.