Posts by: bbell

ຣີວິວ The Nun

   |   By  |  No comments

ມາແລ້ວໆ !! ຫຼັງຈາກຫ່າງຫາຍຈາກການ ຣີວິວຫນັງມາດົນ ມື້ນີ້ກະຈະມາຂໍ ຣີວິວໜັງ ຜີຜັກຊີ ເອີ້ຍ!!! ຜີແມ່ຊີ. ໂດຍ ຜີແມ່ຊີຕົນນີ້ກະເປັນໜັງພາກແຍກຂອງ ຈັກກະວານໜັງ The Conjuring. ໂດຍໜັງ The Conjuring ເປັນໜັງທີ່ອ້າງອີງມາຈາກເລື່ອງແທ້ ແລະ ຈະມີໜັງຕຸ໊ກກະຕາຜີ ພາກແຍກຢ່າງ Annabelle. ສຳຫຼັບໃຜທີ່ເຄີຍເບິ່ງ The Conjuring 2 ມາແລ້ວອາດຈະຄຸ້ນເຄີຍກັບຜີແມ່ຊີຕົວນີ້ດີ ເພາະ ເຈ້ ເພິ່ນໄດ້ປະກົດຕົວໃນໜັງພາກນັ້ນ.

ເນື້ອເລື່ອງມີຢູ່ວ່າໃນປີ 1952 ໃນປາສາດແຫ່ງໜຶ່ງທີ່ ໂຣແມນເນຍ, ໄດ້ມີແມ່ຊີຄົນໜຶ່ງຕັດສິນໃຈຜູກຄໍຕາຍ. ທາງ ວາຕິກັນ ເລີຍໄດ້ສົ່ງ ແມ່ຊີຝຶກຫັດ ໄອຣີນ ແລະ ຫຼວງພໍ່ ເບີກ ໄປສືບຫາຕົ້ນຕໍສາເຫດ ຈົນຕ້ອງພົບກັບ ຜີສາດທີ່ຂຶ້ນມາຈາກນະລົກ ຢ່າງ ວາລັກ ຫຼື ຜີສາດໃນຄາບແມ່ຊີ.
ກ່ອນທີ່ໜັງຈະສາຍ, ຕ້ອງຍອມຮັບວ່າກະແສແຮງຫຼາຍ ຄົນ ແຊ ຢູ່ Facebook ຢ່າງສະໜັ່ນຫວັ່ນໄຫວ ແລະມີແຕ່ຄົນຕັ້ງໜ້າຕັ້ງຕາເບິ່ງ ບາດມາເບິ່ງແທ້ໆ ຮູ້ສຶກວ່າຜິດຫວັງຢູ່ຫຼາຍເຕີບ ຄວາມ ເຟລ ບອກໄດ້ເລີຍວ່າສໍ່າກັບໜັງ Annabelle ພາກ 1. ຖ້າໃຫ້ທຽບກັບຫນັງຜີ ພາກແຍກຂອງ The Conjuring ແອັດຄິດວ່າ ໜັງ Annabelle ພາກ 2 ດີທີ່ສຸດແລ້ວ. ໜັງບໍ່ມີຄວາມເປັນຕາຢ້ານປານໃດ ນອກຈາກຈຸດຂາຍທີ່ມີແຄ່ສຽງທີ່ເຮັດໃຫ້ເຮົາຕົກໃຈ ໜັງກະອອກແນວເດິມໆ ມຸກເກົ່າໆ ຈົນງ່າຍຕໍ່ການເດົາ ບາງສາກກະບໍ່ສົມເຫດສົມຜົນ ອັນທີ່ບໍ່ສົມເຫດສົມຜົນສຸດກະຄື ຊອມບີ້ ນິແຫລະ ແບບວ່າ ເຈົ້າອອກມາແຕ່ໃສ ນີ້ມັນໜັງຜີສາດ. ສ່ວນ ຜີແມ່ຊີ ໃນໜັງເລື່ອງນີ້ກະບໍ່ເປັນຕາຢ້ານຈັກໜ່ອຍ ບໍ່ຄືຕອນ ເພິ່ນ ປະກົດໂຕໃນ The Conjuring 2. ໃນ The Conjuring 2 ບອກໄດ້ເລີຍວ່າ ຜີແມ່ຊີ ຕົວນີ້ເຮັດໄວ້ໄດ້ຫຼອນຫຼາຍ. ແຕ່ວ່າໃນໜັງເລື່ອງນີ້ເປັນຕາຢ້ານແຕ່ຊ່ວງທຳອິດ ແຕ່ຊ່ວງກາງ-ທ້າຍໆ ບໍ່ປານໃດ ທັງໆທີ່ສະຖານທີ່ຖ່າຍທຳ ກະຫຼອນໆ ແຕ່ຜີກັບບໍ່ເປັນຕາຢ້ານເລີຍ. ແຕ່ຂໍ້ດີຄືນັກສະແດງທີ່ເປັນ ແມ່ຊີຝຶກຫັດ ໄອຣີນ ນິແຫລະ ເຈົ້າຄືມາໜ້າຮັກແທ້ ອອກມາສາກໃດນິ ແອັດບໍ່ກະພິບຕາເລີຍ ສ່ວນຫຼວງພໍ່ ເບີກ ກະເບິ່ງຊົງສິປາບຜີເກັ່ງ ແຕ່ແທ້ຈິງແລ້ວຄືກະສອບຊາຍ ດີໆ ນິເອງ

ສະຫຼຸບ ໜັງບໍ່ເຖິງຂັ້ນຫ່ວຍ ກະພໍເປັນເບິ່ງຢູ່ ແຕ່ບໍ່ອາດທຽບເທົ່າ The Conjuring ທັງ 2 ພາກ ແລະ Annabelle 2 ໄດ້. ໃຜທີ່ຄາດຫວັງໄວ້ສູງອາດຈະຜິດຫວັງ ເພາະໜັງ The Conjuring ເຂົາມາດຕະຖານດີຢູ່ແລ້ວ.
ຄະແນນລວມ 6/10

ຣີວິວ Mission Impossible: Fallout

   |   By  |  No comments

ກະຖືວ່າເດິນທາງມາໄດ້ກວ່າ 22 ປີແລ້ວ ສຳຫຼັບ ຫນັງພາລະກິດສ່ຽງຕາຍ ທີ່ແຕ່ລະພາລະກິດ ເກືອບຈະເປັນໄປບໍ່ໄດ້ ຈາກ Mission Impossible ພາກທຳອິດໃນປີ 1996, Mission Impossible 2 ໃນປີ 2000, Mission Impossible 3 ໃນປີ 2006, Mission Impossible 4: Ghost Protocal ປີ 2011 ແລະ Mission Impossible 5: Rogue Nation ປີ 2015. ເຖິງວ່າລຸງ ທອມ ຄູສ ຈະອາຍຸ 56 ແລ້ວ ແລ້ວລາວກະຍັງມາຮັບໜ້າທີ່ສ່ຽງຕາຍຕໍ່ ພາກນີ້ກະຖືວ່າເປັນພາກທີ 6 ແລ້ວ ໃນຊື່ພາກວ່າ Mission Impossible: Fallout … Continue reading

ຕົວຢ່າງ ໜັງໃໝ່ 4 ເລື່ອງຈາກ Wanner Brothers

   |   By  |  No comments

ເມື່ອທ້າຍອາທິດທີ່ຜ່ານມາ ທາງ ໜັງ Wanner Brother ໄດ້ປ່ອຍຂອງ ໂດຍການລົງ ຕົວຢ່າງໜັງທັງ 4 ເລື່ອງ ໃນມື້ດຽວ

  1. Shazam
  2. Aquaman
  3. Fantastic Beasts: The Crimes of Grindelwald
  4. Godzila: King of the Monsters

… Continue reading

ເຈນສ໌ ກັນ ຖືກປົດຈາກຕຳແໜ່ງຜູ້ກຳກັບ Guardians of the Galaxy Vol 3

   |   By  |  No comments

ກາຍເປັນຂ່າວໃຫຍ່ ແລະ ເຮັດໃຫ້ແຟນໆໜັງ Guardians of the Galaxy ຜິດຫວັງ, ເສຍໃຈ ແລະ ເສຍດາຍໄປຕາມໆກັນ ເມື່ອ ເຈມສ໌ ກັນ ຜູ້ກຳກັບໜັງ Guardians of the Galaxy ທັງ 2 ພາກ ຖຶກ Marvel Studios ປົດອອກຈາກການເປັນຜູ້ກຳກັບ Guardians of the Galaxy Vol 3 ທີ່ກຳລັງຈະສາຍອີກບໍ່ກີ່ປີ ສາເຫດມາຈາກທາງຄ່າຍໜັງໄດ້ເຂົ້າໄປຂຸດຄົ້ນປະຫວັດການໂພສຢູ່ twitter ຂອງລາວທີ່ເຄຍໂພສໃນສະໄໝກ່ອນ.

ໂດຍໂພສສ່ວນຫຼາຍຈະເປັນການໂພສ ກ່ຽວກັບການເວົ້າເລື່ອງການເມືອງຕາມແບບມຸກຕະຫຼົກອອກໄປໃນທາງເສຍໆ ຫາຍໆ ແລະ ທີ່ໜັກສຸດກະຄືການໂພສແນວລະເມີດທາງເພດ ທີ່ສຳຄັນແຟນໆກະຄົງເສຍດາຍໄປຕາມໆກັນ ເພາະຫາຜູ້ກຳກັບໃໝ່ ບໍ່ປານໃດດອກ ຈັ່ງໃດທາງຄ່າຍກະຫາໄດ້ໃໝ່ຢູ່ແລ້ວ ແຕ່ເສຍດາຍຄວາມສາມາດຂອງລາວ ທີ່ເຮັດໄວ້ໄດ້ດີໃນ Guardians of the Galaxy, Guardians of the Galaxy Vol 2. ໂດຍທາງ ເຈມສ໌ ກັນ ໄດ້ອອກມາປະກາດແຕ່ເດືອນກ່ອນແລ້ວ ວ່າ ບົດໜັງ Guardians of the Galaxy Vol 3 ແລ້ວໆ.

ແຕ່ທາງ Studios ອາດຈະບໍ່ເອົາຫຍັງນຳທີ່ເປັນຂອງລາວອີກຕໍ່ໄປ ແລະ ກຳໜົດການສາຍກະອາດຈະເລື່ອນໄປອີກໜ່ອຍໜຶ່ງ. ກະຕ້ອງຕິດຕາມກັນຕໍ່ໄປວ່າໃຜຊິມາກຳກັບແທນ.

ຣີວິິວ The Incredibles 2

   |   By  |  No comments

ຣີວິິວ The Incredibles 2

ຕັ້ງວ່າ 14 ປີ ທີ່ປະໃຫ້ເຮົາລໍຄອຍ ກັບອະນິເມຊັ່ນ The incredible ຄອບຄົວຮີໂຣ່ ພິທັກໂລກ ປີ 2004 ຕອນນັ້ນແອັດມິນກະຍັງເລາະຍິງໝາກບີ ແລະ ໂດດຍາງ ຢູ່ເລີຍ. ໂດຍເລື່ອງລາວຂອງພາກກ່ອນມີຢູ່ວ່າ ເມື່ອຊຸປເປີ້ຮີໂຣ່ ຖືກລັດຖະບານປະເມິນວ່າຜິດກົດໝາຍ ພໍ່ບ້ານໃຈກ້າທີ່ເປັນອະດີດຊຸປເປີຮີໂຣ່ ຢ່າງ ບ໊ອບ ແລະ ເຮເລນ ເມຍຂອງລາວ ຕ້ອງຈຳໃຈຢູ່ຢ່າງຄົນທຳມະດາຈຽມເນື້ອຈຽມຕົວ ທັງທີບ໊ອບຕ້ອງການອອກມາເຮັດພາລະກິດຊ່ວຍເຫຼືອຄົນແຕ່ກະເຮັດບໍ່ໄດ້ ອາລົມປະມານວ່າ ຢ່າງກາຍຮ້ານຊິ້ນດາດໃນຊ່ວງຫຸຼດນ້ຳໜັກແຕ່ເຂົ້າໄປກິນບໍ່ໄດ້ ເພາະບໍ່ມີເງິນ.

 

ແຕ່ມີມື້ໜຶ່ງ ກະມີຜູ້ຍິງຄົນໜຶ່ງວ່າຈ້າງມອບພາລະກິດໃຫ້ ບ໊ອບ ແຕ່ທັງໝົດກະເປັນແຜນການຈາກຕົວຮ້າຍທີ່ຊີ່ ຊິນໂດນ ເຊິ່ງ ຊິນໂດນ ເຄີຍເປັນແຟນພັນແທ້ຂອງ ບ໊ອບ ຕັ້ງແຕ່ຍັງນ້ອຍ ແຕ່ໂດນ ບ໊ອບ ເມິນໃສ່ຕະຫຼອດ ເລີຍ ຄຽດແຄ້ນ ເຮັດໃຫ້ແມ່ລູກສາມຢ່າງ ເຮເລນ ຫຼື ອີກນາມໜຶ່ງຄື Elastic Girl ຕ້ອງພາລູກໆລາວອອກໄປຊ່ວຍພໍ່. ພາກໜຶ່ງໄດ້ສຽງຕອບຮັບທີ່ດີຫຼາຍ ຈາກຄົນເບິ່ງ ແລະນັກວິຈານ ໂດຍກວາດລາງວັນໄດ້ 67 ລາງວັນ.
ມາໃນປີ 2018 ນີ້ ພວກເຮົາຈະໄດ້ພົບກັບຄອບຄົວນີ້ອີກຄັ້ງ ກັບພາລະກິດໃໝ່ ໂດຍເນື້ອເລື່ອງພາກໃໝ່ນີ້ ຈະຕໍ່ຈາກພາກກ່ອນພຽງແຄ່ 1 ນາທີຫຼັງຈາກຈົບພາກກ່ອນ. ເມື່ອຄອບຄົວຊຸປເປີຮີໂຣ່ນີ້ ຕ້ອງກັບມາຢູ່ແບບຄົນທຳມະດາອີກຄັ້ງ ແຕ່ກະໄດ້ຄວາມຊ່ວຍເຫຼືອຈາກຊາຍຜູ້ໜຶ່ງ ທີ່ຕ້ອງການ ແມ່ລູກສາມຢ່າງ Elastic Girl ອອກໄປເຮັດພາລະກິດປົກປ້ອງຊາວເມືອງໆ ໜຶ່ງ ເພື່ອຮຽກຮ້ອງສິດທິຂອງຊຸປເປີຮີໂຣ່ຄືນ ໂດຍປ່ະໃຫ້ ບ໊ອບ ຕ້ອງເບິ່ງແຍງລູກຜູ້ດຽວ ເລື່ອງລາວຊິເປັນຈັ່ງໃດຕໍ່ ເອົາເປັນວ່າໄປຊື້ປີ້ຮັບຊົມເອງ

ໃນພາກ 2 ນີ້ ກະຖືວ່າເຮັດໄດ້ດີຫຼາຍທາງດ້ານ ກຣາຟຟິກ ພາບລະອຽດ ແລະ ງາມກວ່າພາກກ່ອນ
ແຖມຍັງຮູ້ສຶກປະທັບໃຈທີ່ກັບມາໄດ້ເຫັນຕົວລະຄອນເກົ່າແຕ່ບໍ່ເຖົ້າ. ພາກນີ້ກະໃຫ້ຂໍ້ຄິດຫຼາຍຢ່າງຢູ່ ບໍ່ວ່າຈະພາລະທາງດ້ານຄອບຄົວຂອງຄົນເປັນພໍ່ ທີ່ຕ້ອງເຮັດທຸກວິຖີທາງເພື່ອທີ່ຈະເຂົ້າໃຈລູກ ແລະ ຍັງເຮັດໃຫ້ເຮົາຮູ້ອີກວ່າ ຜູ້ຍິງ ກະສາມາດເປັນຜູ້ນຳໄດ້. ສ່ວນທາງດ້ານສາກແອກຊັ່ນ, ສຽງດົນຕີ ກະຊິມີຄືໆ ພາກເກົ່າຢູ່. ສ່ວນເນື້ອເລື່ອງຂອງໜັງຝອຍຫຼາຍໜ່ອຍໜຶ່ງ ເຮັດໃຫ້ເຮົາຫາວນອນບາງຊ່ວງ ຫຼື ເປັນຍ້ອນແອມັນເຢັນ? ເນື້ອເລື່ອງກະຄ່ອນຂ້າງຈະເດົາງ່າຍແນ່. ແຕ່ໜັງທີ່ປ່ະໃຫ້ເຮົາຄອຍດົນຈັ່ງຊີ້ ກະບໍ່ໄດ້ມີຂໍ້ເສຍສະເໝີໄປ ຖ້າເຈົ້າພົບກັບລູກຊາຍຫຼ້າຂອງ ບ໊ອບ ແລະ ເຮເລນ ເຈົ້າຈະຈັບຕາເບິ່ງນ້ອງຄົນນີ້ແບບບໍ່ຄາດສາຍຕາ ແລະ ຈະລົບຂໍ້ເສຍຂອງໜັງພາກນີ້ໄປເລີຍ.

ພາບຈາກພາກ 1

ສະຫຼຸບ ໄປເບິ່ງໂລດບໍ່ເປັນຕາເສຍດາຍເງິນດອກ ເດັກນ້ອຍເບິ່ງໄດ້ ຜູ້ໃຫຍ່ເບິ່ງດີ ແຕ່ຜູ້ໃຫຍ່ຕ້ອງໃຫ້ຄຳແນະນຳເດັກນ້ອຍ ເພາະເດັກນ້ອຍລຸ້ນນີ້ ຂະເຈົ້າເກິດບໍ່ທັນພາກໜຶ່ງ ຖ້າຢາກອິນກັບໜັງ ຫຼື ຮູ້ຈັກຕົວລະຄອນໃຫ້ກັບໄປເບິ່ງພາກໜື່ງກ່ອນ.
ຄະແນນລວມ 8/10

 

ສາກນນີ້ໂດນໃຈ

 

ຣີວິວ Jurassic world: Fallen Kingdom

   |   By  |  No comments

ຢາກເລົ່າມາອີກແລ້ວ ເທື່ອນີີ້ມາ ຣິວິວ Jurassic world: Fallen Kingdom

 

ຫຼັງຈາກໃນປີ 1993 ຄວາມຝັນຂອງຄົນຮັກໄດໂນເສົາ ກະເປັນຈິງ ເມື່ອໄດ້ພົບກັບ ຫນັງ Jurassic Park ທີ່ກວາດລາຍໄດ້ໄປລວມແລ້ວ 1,029 ລ້ານຫຼຽນ ທົ່ວໂລກ ໂດຍມີ ພາກ ສອງ ຢ່າງ Jurassic Park: The lost world ໃນປີ 1997 ແລະ Jurassic Park 3.

ໃນປິ 2001 ຕາມມາ ເຊິ່ງ 2 ພາກ ຫຼັງນີ້ ລາຍໄດ້ບໍ່ຄ່ອຍດີປານໃດ ຈົນຮອດປີ 2015 ແຟນຫນັງໄດ້ພົບກັບພາກຕໍ່ອີກຄັ້ງ ໂດຍປ່ຽນຊື່ເປັນ Jurassic world ທີ່ກວາດລາຍໄດ້ໄປ 1,670 ລ້ານຫຼຽນ ທົ່ວໂລກ ຂຶ້້ນຕິດອັນດັບ 4 ຂອງຫນັງທຳເງິນຕະຫຼອດການ.

ມາໃນປີນີ້ ພວກເຮົາຈະໄດ້ເບິ່ງ ພາກຕໍ່ອີກຄັ້ງ ໃນຊື່ Jurassic world: Fallen Kingdom ຫນັງພາກນີ້ເລົ່າເລື່ອງລາວ 3 ປິ ຫຼັງຈາກພາກກ່ອນ ທີ່ເກາະສວນສະຫນຸກ ອິສຕັນນູບຣາ ເກິດອຸບັດຕິເຫດ ຈາກ ອິໂດໄມນັສ ເຣັສ (ໄດໂນເສົາພັນຜະສົມທີ່ໂຫດຫ້ຽມ) ຖະລົ່ມ ເກາະນີ້ ເລີຍຖືກປະໃຫ້ຮ້າງ ໂດຍມີແຕ່ ໄດໂນເສົາປົກຄອງ ແຕ່ໄດໂນເສົາເຫຼົ່ານັ້ນຕ້ອງມາພົບຄວາມຊວຍຈາກພູເຂົາໄຟລະເບິດບົນເກາະທີ່ຈະນຳພາໃຫ້ພວກມັນສູນພັນ. ໂດຍການທີ່ຈະຊ່ວຍຊີວິດໄດໂນເສົາໄດ້ນັ້ນ ແຄຣ໌ ເດີຣິ່ງ (ນາງເອກ ພາກກ່ອນ) ໄດ້ຊອກຫາທີມກູ້ໄພ ໂດຍ ປະກອບດ້ວຍ ໂອເວ່ນ ເກດີ້ ທີ່ເປັນອາດີດ ຄູເຝິກ ແຣັບເຕີ້(ພະເອກ ພາກກ່ອນ) ຮ່ວມນຳ. ການກູ້ຊີບ ໄດໂນເສົາ ຊິສຳເລັດ ຫຼື ບໍ່ ເອົາເປັນວ່າໄປເບິ່ງເອົາເອງ.

ເປິດເລື່ອງມາຫນັງກະຄ່ອນຂ້າງຕື່ນເຕັ້ນ ໄດ້ເຫັນສັດໃນຕຳນານ 2 ໂຕ ຈາກພາກກ່ອນ ຫຼັງຈາກສາກນັ້ນແລ້ວ ຫນັງກະອອກຈະນ່າເບື່ອຫນ່ອຍຫນື່ງ ເນື່ອງຈາກ ການປູເນຶ້ອເລື່ອງ ແຕ່ພໍຮອດ 15% ຂອງເລື່ອງເຈົ້າຈະບໍ່ຜິດຫວັງແນ່ນອນ ຄັກສຸດແມ່ນສາກຕາມລ່າໄດໂນເສົາ ພັນຕ່າງໆ ຈາກໂລເຄຊັ່ນໃນແຜນທີ່ ອາລົມປະມານວ່າຕາມຈັບໂປເກມ່ອນ ໃນເກມ Nintendo.

ໃນຫນັງມີສາກໃຫ້ລຸ້ນລະທຶກຫຼາຍສາກ ແບບວ່າລຸ້ນຈົນຕົວເກັງພູ້ນແຫລະ. ເຖິງຫນັງຊິສາຍ Dark ປານໃດ ແຕ່ ກະມີສາກໂສກເສົ້າໃຫ້ເຮົາເຫັນຢູ່ ໂດຍສະເພາະ ສາກ…………………….ນັ້ນ (ຈົ່ງຕື່ມຄຳໃນຊ່ອງວ່າງ ເມື່ອ ທ່ານໄປເບິ່ງມາແລ້ວ) ແລະ ສາກ ຄວາມຜູກພັນຂອງ ໂອເວ່ນ ແລະ ບລູ (ແຣັບເຕີ້ ທີ່ໂອເວ່ນ ເຝິກມາແຕ່ນ້ອຍ) ໃນພາກນີ້ເດັ່ນທີ່ສຸດກະຄືຊິແມ່ນ ບລູ ນິ ແຫລະ. ສ່ວນ ພາກນິ້ ເຮົາຈະໄດ້ເຫັນໄດໂນເສົາກວ່າ 17 ສາຍພັນ ແລະ ບໍ່ຕ້ອງຫ່ວງ ແຕ່ລະຕົວສົມຈິງແນ່ນອນ ເພາະທີມງານເພິ່ນກັບມາໃຊ້ຫຸ່ນຍົນໄດໂນເສົາຈຳລອງຄຶພາກເກ່ົາ ເຮັດໃຫ້ເຮົາຮູ້ສຶກວ່າໄດ້ເບິ່ງໂຕແທ້. ສຳຫຼັບໃຜທີ່ຄິດວ່າເນື້ອເລື່ອຈະມີແຕ່ການກູ້ຊີບ ໄດໂນເສົາ ເຈົ້າອາດຄິດຜິດ ເພາະ ອາດຈະມີເງື່ອນງຳບາງຢ່າງກະເປັນໄດ້.

ສະຫຼຸບ Jurassic world: Fallen Kingdom ອາດບໍ່ສົມບູນແບບຄືພາກກ່ອນ ແຕ່ພາກນີ້ກະມີສາກ ສະຫຍອງຂວັນຫນ່ອຍຫນຶ່ງມາທົດແທນ, ມີມຸມເສົ້າ ແລະ ກະຍັງມີສາກຫນີໄດໂນເສົາ ຫຼາຍໆສາກຄື ພາກກ່ອນໆ ໃຜທີ່ຫຼົງໄຫຼ ໃນ ກະປອມຍັກ ຫ້າມພາດບໍ່ວ່າປະການໃດ

ນິແມ່ນ ອິນໂດໄມນັສ ເຣັສ ຈາກພາກກ່ອນ

ຄະແນນລວມ 9/10

 

ຣີວິວ Dead Pool 2

  |   By  |  No comments

yaklao-deadpool2

ຢາກເລົ່າ.ຄອມ ມື້ນີ້ຈະມາ ຣີວິວ Dead Pool 2 ເຊິ່ງກໍກັບມາອີກຄັ້ງ ກັບ ນັກຂ້າຊຸດແດງຮັດໄຂ່ສຸດກຽນໃນຕຳນານ ມາໃນພາກນີ້ເພິ່ນບໍ່ໄດ້ມາດ່ຽວໆ ແຕ່ມາເປັນທີມ ເລື່ອງມີຢູ່ວ່າ ໃນໂລກອະນາຄົດ ມີຊາຍແຂນເຫຼັກຜູ້ຫນຶ່ງຊື່ວ່າ ເຄເບິ້ລ ທີ່ຮັບບົດໂດຍ Josh Brolin (ຜູ້ທີ່ຮັບບົດທານອສ ໃນ Avengers Infinity War) ໄດ້ຂ້າມເວລາມາໂລກປັດຈຸບັນເພື່ອມາຂ້າ ເດັກຊາຍຜູ້ຫນຶ່ງທີ່ເປັນມະນຸດກາຍພັນ ແລະ ນັ້ນກະເປັນຫນ້າທີ່ຂອງ ເດດ ພູລ ແລະ ທີມຂອງເພິ່ນ ທີ່ປະກອບດ້ວຍມະນຸດກາຍພັນທີ່ມີຄວາມສາມາດຕ່າງໆ ບາງຕົວກະເກັ່ງ ແຕ່ບາງຕົວ……………………..ເອົາເປັນວ່າໄປເບິ່ງເອົາເອງກະແລ້ວກັນ ພ້ອມກັນນັ້ນຍັງມີ ທີມ X-Men ບາງສ່ວນເຂົ້າມາແຈມນຳອີກ


ໃນຕົວຫນັງນັ້ນປະກອບດ້ວຍມຸກຕະຫຼົກໂປກຮາບັກຫຼາຍໆ ທີ່ຈະເຮັດໃຫ້ເຈົ້າຫົວ. ພະເອກກະກຽນເກິນຄຳບັນຍາຍ ຈົນຢາກເຂົ້າໄປຕົບຫູ ບໍ່ວ່າຈະລໍ້ລຽນຫນັງຕ່າງໆ ແບບບໍ່ເກງໃຈ ແຕ່ກະມີບາງມຸກທີ່ຍັງບໍ່ເຂົ້າໃຈປານໃດ ແລະກະຍັງມີສາກແອັກຊັ່ນເລືອດສາດ ທີ່ບໍ່ເຫມາະ ສຳຫຼັບເດັກນ້ອຍ ແລ້ວເຮົາຍັງຈະໄດ້ເຫັນຕົວລະຄອນລັບຕ່າງໆ ທີ່ໂຜ່ມາໃຫ້ເຫັນແວບໆ ແຕ່ທີ່ຄັກສຸດກະຄື ສາກ Post Credit ທີ່ສຸດຍອດຈົນຢາກອຸທານວ່າ “ຈັ່ງຊີ້ກະໄດ້ຫວາ!!!”


ສະຫຼຸບ ພາກນີ້ອາດຈະບໍ່ຄັກເທົ່າ ພາກຫນຶ່ງເນື່ອງຈາກມຸກຕະຫຼົກຫຼາຍໂພດ ເຮັດໃຫ້ຊອກເນື້ອຫາຂອງຫນັງບໍ່ໄດ້ປານໃດ ແຕ່ກະບໍ່ເຖິງກັບຫ່ວຍ. ໄປເບິ່ງໂລດບໍ່ເສຍດາຍເງິນແນ່ນອນ

ປ. ລ. ຫນັງບໍ່ເຫມາະ ກັບ ຄົນອາຍຸຕ່ຳກວ່າ 18

ຄະແນນ 7.5/10

ຣີວິວ Avenger Infinity War

   |   By  |  No comments

ມື້ນີ້ yaklao.com ຈະມາ ຣີວິວ Avenger Infinity War ແບບບໍ່່ສະປອຍ

ສິ້ນສຸດການລອຍຄໍ ແລະ ລໍຄອຍ ກັບ ຫນັງຟອມຍັກທີ່່ ເດິນທາງມາຮອດ 10 ປີ ຈາກ ຕົ້ນກຳເນິດ ໄອອອນແມນ ໃນປີ 2008 ແລະ ຫນັງຊຸບເປີ້ ຮີໂຣ່ອີກຫຼາຍລວມເປັນ 18 ເລື່ອງ.  ພາກນີ້ບໍ່ເຮັດໃຫ້ຜິດຫວັງອິຫລີ ເປັນສຸດຍອດຂອງສຸດຍອດຫນັງລວມຊຸບເປີ້ ຮີໂຣ່ ແຕ່ຖ້າຈະໃຫ້ອິນ ຫຼື ຮູ້ຈັກກັບຕົວລະຄອນແນະນຳໃຫ້ກັບໄປເບິ່ງຫນັງເກົ່າຕາມຮູບຢູ່ລຸ່ມ ເພາະວ່າທາງ Marvel Studio ເພິ່ນໄດ້ເຄີຍປະກາດວ່າຈະ ບໍ່ມີສາກເລົ່່າເຫດການພາກກ່ອນໆ ຍ້ອນຫຼັງ ແຕ່ຖາມວ່າ “ຖ້າຂ້ອຍບໍ່ເຄີຍເບິ່ງຫນັງພາກເກົ່າເດ ມັນຊິມ່ວນບໍ່?” ບອກເລີຍວ່າ ມ່ວນຄືກັນ

 ຣີວິວ Avenger Infinity War - YakLao.com

 

 ຣີວິວ Avenger Infinity War - YakLao.com

 ຣີວິວ Avenger Infinity War - YakLao.com

ເນື້ອເລື່ອງມີຢູ່ວ່າ ຕົວຮ້າຍທີ່ຊື່ ທານອສ (ເປັນຊາວດາວໆຫນຶ່ງ) ຕ້ອງການລວບລວມອັນຍະມະນີ ອິນຟິນິຕີ້ສະໂຕນໃຫ້ຄົບ 6 ເມັດ ເຊິ່ງແຕ່ລະເມັດມີພະລັງແຕກຕ່າງກັນ ແຕ່ຖ້າລວມໄດ້ຮອດ 6 ເມັດຢາມໃດ ຜູ້ນັ້ນຈະມີພະລັງທີ່ສາມາດລ້າງຈັກກະວານໄດ້

 ຣີວິວ Avenger Infinity War - YakLao.com

ເປົ້າຫມາຍຂອງອ້າຍ ທານອສ ເຮົາກະຄື ລ້າງສິ່ງມີຊີວິດໃນຈັກກະວານອອກເຄິ່ງຫນຶ່ງ ເພື່ອໃຫ້ຈັກກະວານດຸ່ນດ່ຽງ ແລ້ວກະເປັນຫນ້າທີ່ຂອງ ອະເວນເຈີ້ ທີ່ຕ້ອງຢຸດ ອ້າຍ ທານອສ ບໍ່ໃຫ້ລວບລວມຈົນຄົບ. ເນື້ອເລື່ອງໃນຫນັງຄ່ອນຂ້າງມືດມົນ ກວ່າພາກກ່ອນໆ ແຕ່ກໍ່ມີມຸກຕະຫຼົກມາເປັນໄລຍະ ເພື່ອໃຫ້ຜ່ອນຄາຍ ຈາກຄວາມຄຽດທີ່ວ່າ ອະເວນເຈີ້ ຈະຊະນະ ອ້າຍ ທານອສ ໄດ້ຈັ່ງໃດ. ແລ້ວກໍ່ໃນເລີ່ອງມີເລື່ອງເຊິໄພຊ໌ຢູ່ບັກຫຼາຍໆ ແລ້ວກະຍັງລຸ້ນຕະຫລອດ ວ່າໃຜຊິເປັນກະສອບຊາຍໃຫ້ ອ້າຍ ທານອສ ຈັດຫນັກ. ຫນັງມັນໃຫ້ຄວາມມັນເຮົາເກືອບທຸກໆ 5 ນາທີ ສາມາດເຮັດໃຫ້ເຮົາມ່ວນເກືອບຕະຫລອດທັງເລື່ອງ ໂດຍສະເພາະຕອນຈົບທີ່ສຸດຄັກ (ຫນັງຈົບບໍໍ່ຟ້າວລຸກເທື່ອເດີ້ ເພາະມີສາກເຊີໄພຊ໌ທ້າຍ ເຄດິດ)

ສ່ວນທາງດ້ານຕົວລະຄອນນິ ຜູ້ກຳກັບເພິ່ນເຮັດວຽກບ້ານມາດີ ສາມາດແບ່ງຕົວລະຄອນເອກໃຫ້ເດັ່ນເທົ່າກັນ ແຕ່ອາດຈະມີ ຮີໂຣ່ ບາງຕົວທີ່ບົດຍັງບໍ່ຫຼາຍປານໃດ ແຕ່ວ່າຄົນທີ່ເດັ່ນທີ່ສຸດໃນເລຶ່ອງກະຄື ອ້າຍ ທານອສ ນິແຫລະ ແບບວ່າ ໂອ້ໂຫ້ !! ເຈົ້າຄືມາເກັ່ງແທ້ !!!!! ເປັນຕົວຮ້າຍທີ່ມີຄວາມທະເຢີທະຢານສູງ ແລະ ບົດຫຼາຍ ຈົນຢາກຕັ້ງຊື່ຫນັງໃຫມ່ວ່າ The Thanos: Infinity War ທີ່ອ້າຍເພິ່ນຢາກລ້າງຈັກກະວານ ກະມີເຫດຜົນຂອງເພິ່ນຢູ່ ອັນນີ້ຕ້ອງໄປຫາຄຳຕອບເອງໃນຫນັງ ທາງດ້ານຮີໂຣ່ ເອງເພິ່ນກະມີການປາກົດໂຕເທ່ໆ ຫຼາຍຄົນຢູ່
ສະຫຼຸບ ເປັນຫນັງທີ່ສຸດຍອດ ຈົນຢາກເຂົ້າໄປກອດຂາຜູ້ກຳກັບ ແລ້ວ ກ່າວ ຂອບໃຈ ທີ່ເຮັດຫນັງແບບນີ້ມາໃຫ້ເບິ່ງ ເຮັດໃຫ້ເຮົາຮູ້ສຶກບໍ່ຢາກໃຫ້ມັນຈົບໄວເລີຍ ຕອນຢູ່ໃນໂຮງ ແລະ ຢາກໃຫ້ພາກໃຫມ່ສາຍໄວໆ

 ຣີວິວ Avenger Infinity War - YakLao.com

ຄະແນນລວມ 10/10 (ທີ່ຈິງຢາກໃຫ້ກາຍ 10)

ເວັບ yaklao.com ຮັບຣີວິວສິນຄ້າ ຫຼື ບໍລິການຕ່າງໆ ສົນໃຈຕິດຕໍ່ພວກເຮົາໄດ້ https://yaklao.com/contact-us/

ຣີວິວຫນັງ Rampage

   |   By  |  No comments

 

ປີໃຫມ່ນີ້ ກະຖືກວ່າອາກາດຮ້ອນຫຼາຍ ແຕ່ບໍ່ຢາກປຽກ ກະເລີຍຂໍແຫກດ່ານນຳ້ຕັ້ງວ່າຫຼາຍດ່ານເພື່ອເຂົ້າໄປຕາກແອຢູ່ໂຮງຮູບເງົາເພື່ອມາເບິ່ງສັດຖະລ່ມຕຶກ

ແຣມເພຈ ເປັນຫນັງທີ່ເຮັດມາຈາກເກມຕູ້ໃນປີ 1986 ສະໄຫມນັ້ນແອັດຍັງເປັນລົມເປັນແລ້ງຢູ່ ກວ່າຈະມີຄົນໃຈກ້າເອົາມາເຮັດເປັນຫນັງ ເນີ້ອເລື່ອງວ່າດ້ວຍ ເດວິສ ໂອໂຄເຢ່ ໄດ້ເກັບລິງສີເຜືອກໂຕຫນິ່ງທີ່ຊື່ George ມາລ້ຽງ ແລ້ວສອນໃຫ້ມັນໃຊ້ພາສາມືໄດ້ George ເປັນມິດກັບມະນຸດ ແລະ ກະຍັງມັກຢອກມະນຸດ(ແຕ່ George… ບາງເທື່ອມຶງກະກວນxີນເກີນໄປ) ແຕ່ແລ້ວມາວັນຫນຶ່ງ ບໍລິສັດຊີ່ວ່າ ເອັນເນີຈີນ ໄດ້ທຳການທົດລອງຢູ່ອະວະກາດ ໄດ້ເອົາ ດີເອັນເອ ສັດຈາກຫຼາຍຊະນິດມາລວມກັນເພື່ອຫວັງຊິເຮັດຢາຮັກສາໂລກ ແຕ່ກະເກິດການຜິດພາດເຮັດໃຫ້ ຢາທົດລອງຕົກມາຍັງໂລກ 3 ຈຸດ 1. ແມ່ນຕົກໃສ່ຝູງຫມາປ່າ 2. ຕົກໃສ່ແມ່ນຳ້ ໂດນເຂ້ໂຕຫນຶ່ງ ແລະ ສຸດທ້າຍຜູ້ທີ່ຖືກເລກເຕັມໆເລີຍກະຄີ George. ເຊິ່ງຜົນລັບກະຄີເຮັດໃຫ້ສັດພວກນີ້ມີຮ່າງກາຍໃຫຍ່ໂຕ ແລະ ດຸຮ້າຍປ່າເຖື່ອນ ແລ້ວ ເດວິສພະເອກຂອງເຮົາຊິຢຸດ George ໄດ້ຈັ່ງໃດ ໄປຕິດຕາມຊົນເອົາເດີ້

ໃນສ່ວນສາກແອັກຊັ່ນຂອງຫນັງນິຈັດຫນັກຈັດເຕັນຕັ້ງແຕ່ກາງເລື່ອງຍັນທ້າຍເລື່ອງ ຕັ້ງແຕ່ສາກໄລ່ລ່າສັດໄປຈົນເຖິງສາກຕຶກຖະລົ່ມທະລາຍ ນີ້ແຫລະ ທີ່ຂະເຈົ້າເອິ້ນວ່າ “ລະເບິດພູເຂົາ ເຜົາຕູບ ກັນຊາ” ຄືແບບວ່າຜູ້ກຳກັບໃສ່ມາບໍ່ຍັ້ງ ມີເທົ່າໃດໃສ່ມາຫມົດ  ເຖິງວ່າເນື້ອຫາຊິບໍ່ຫຼາຍ ແຕ່  ຄະແນນສາກແອັກຊັ່ນເອົາໄປເລີຍ 10/10

 

ສ່ວນທາງດ້ານຕົວລະຄອນຢ່າງ ເດວິສ  (The rock) ເປັນນັກສະແດງໃນດວງກະດອງໃຈຂອງແອັດເລີຍ ຄືແບບຊິເທ່ໄປໃສ ສ່ວນຕົວຮ້າຍກະສຸດຈະເລ່ຫຼ່ຽມ ແຜນຫຼາຍ ແຕ່ທີ່ຄັກສຸດແມ່ນໂຕເຂ້ ທີ່ໂຕໃຫຍ່ກວ່າສັດອີກ 2 ໂຕ

ສະຫຼຸບ ແຣມເພຈ ເປັນຫນັງຂອງຄໍຫນັງ ແອັກຊັ່ນ ມີສາກແອັກຊັ່ນສ່ຽງຕາຍຫຼາກຫຼາຍໃຫ້ລຸ້ນລະທຶກຈົນຖົງປ໊ອບຄອນອາດເຮ່ຍລົງພື້ນໄດ້ເລີຍ ເຖິງຫຼາຍຄົນອາດຈະຮູ້ສິກຜິດຫວັງກັບຫນັງທີ່ເຮັດມາຈາກເກມ ແຕ່ຫນັງນີ້ບໍ່ເຮັດໃຫ້ຜິດຫວັງແນ່ນອນ ສຸດທ້າຍ ແລະ ທ້າຍສຸດ ຖ້າບໍ່ມີບ່ອນໄປ ຫຼື ຫມູ່ບໍ່ຊວນໄປນຳ້ ກະໄປຕາກແອເຢັນໆ ເພື່ອໄປເບິ່ງ ສາລະຄະດີສັດໂລກໄດ້ເດີ້

 

ຄະແນນລວມ 9/10