fbpx
09/08/2019 Galaxy Note 10 | 10+ by Yaklao ຢາກເລົ່າ

ສຳພັດຈິງ Galaxy Note 10 | 10+ ກັບຄວາມປະທັບໃຈ 7 ຂໍ້


ໄດ້ໄປສຳພັດມາແລ້ວກັບ Galaxy Note 10 | 10+ ໃນງານ Samsung Galaxy ທີ່ ໂຮງແຮມ ຄຣາວ ພຼາຊາ ເຊິ່ງຈັດຂຶ້ນໂດຍ ຊໍາຊຸງປະເທດລາວ ແອັດເລີຍຈະມາສຳພັດຈິງ Galaxy Note 10 | 10+ ກັບຄວາມປະທັບໃຈ 7 ຂໍ້.

Key Points

  1. Looks – ຮູບຊົງ ສີສັນ ພາຍນອກ
  2. Performance – ປະສິດຕິພາບການເຮັດວຽກ
  3. Dex – ການໃຊ້ງານແທນຄອມພິວເຕີ້ໄດ້ເລີຍ
  4. Live Focus – ໜ້າຊັດຫຼັງເບຼີ
  5. Stabilizer – ກັນສັ່ນປານມືອາຊີບຖ່າຍເອງ
  6. AR Doodle – ຄວາມຟຸ້ງຟິ້ງ ມຸ້ງມິ້ງ
  7. S Pen – ໄມ້ຄະທາເວດມົນ

1. Looks – ປະທັບໃຈໃນ ຮູບຊົງ ສີສັນ ພາຍນອກ

Galaxy Note 10 | 10+ by Yaklao ຢາກເລົ່າ
ສີສັນອັນສວຍງາມຂອງ Aura Glow

ຕ້ອງບອກເລີຍວ່າສີສັນສົນໃສຈີດຈາດ ຟ້ຽວຟາດ ສະຕາຍໄວລຸ້ນກັບແບບສຸດໆ ມີມາໃຫ້ເລືອກກັນ 3 ສີ ຄື Aura Glow ແວວວັບປານແກ້ວ, Aura Black ດຳເຫຼື້ອມສຸຂຸມ, Aura White ຂາວດຸດໄຂ່ມຸກ, ແລະ Aura Pink ຊົມພູ້ຊົມພູ.

ເລື່ອງຂະໜາດນີ້ຕ້ອງບອກວ່າຖືກໃຈສຸດ ເພາະເຮັດມາສອງຂະໜາດຄື 6.3 ນິ້ວ ສຳລັບ Note 10 ແລະ 6.8 ນິ້ວ ສຳລັບ Note 10+. ຕອບໂຈດຄົນຄືແອັດ ທີ່ມັກໃຊ້ປາກກາ S Pen ແຕ່ບໍ່ມັກຂະໜາດໃຫຍ່.

2. Performance – ປະທັບໃຈໃນ ປະສິດຕິພາບການເຮັດວຽກ

Galaxy Note 10 | 10+ by Yaklao ຢາກເລົ່າ
ຈໍກວ້າງໃຫຍ່ເຕັມຂອບ

ດ້ານປະສິດຕິພາບນິຮັບປະກັນວ່າໄຫຼລື່ນມື່ນຫົວແຕກກັນແນ່ນອນກັບ Chipset ໃໝ່ Exynos 9825 ໃຊ້ແລ້ວມື່ນປືດໆ ປັດໄປ ປັດມາບໍ່ມີສະດຸດ ມາພ້ອມ RAM 12GB.

ທັງການຖ່າຍພາບ, ຕົກແຕ່ງພາບ, ຕັດຕໍ່ວິດີໂອໄປຈົນຮອດການໃຊ້ງານດ້ານບັນເທີງແບບຈັດເຕັມ, ທັງເກມ ແລະ ວິດີໂອ 4K ແມ່ນຕອບສະໜອງໄດ້ທັນທີ ບໍ່ມີອາການແລັກໃຫ້ເຫັນເລີຍ.

3. Dex – ປະທັບໃຈໃນ ການໃຊ້ງານແທນຄອມພິວເຕີ້ໄດ້ເລີຍ

Galaxy Note 10 | 10+ by Yaklao ຢາກເລົ່າ
Dex ຕໍເຂົ້າຈໍ ໃຊ້ເປັນຄອມໄດ້ເລີຍ ຫຼື ສຽບຕໍ່ຄອມແລ້ວໃຊ້ smartphone ໃນຄອມກໍໄດ້

ໂຕນີ້ເປັນສິ່ງທີ່ແອັດຮູ້ສຶກໂດນທີ່ສຸດ ເຫັນໃນມື້ງານ Unpacked ກໍຄືວ່າຊິທຳມະດາ ແຕ່ມາທົດລອງໃຊ້ຈິງນີ້ຕ້ອງບອກວ່າໂປຣແກຣມນີ້ສົມບູນແບບຫຼາຍ.

ສາມາດເຊື່ອມຕໍ່ໂທລະສັບເຂົ້າກັບຄອມ ແລ້ວໃຊ້ງານມືຖືຂອງເຮົາໃນຄອມຂອງເຮົາເລີຍ (Inception ດີເນາະ). ໃຜທີ່ເຮັດວຽກເອກະສານຫຼາຍໆນີ້ຈົບໄດ້ໃນເຄື່ອງດຽວເລີຍ.

ອີກຢ່າງແມ່ນການນຳເອົາມືຖືໄປຕໍ່ໃສ່ຈໍ ຫຼື ໂປຣເຈັກເຕີ ເພື່ອນຳສະເໜີງານ ຫຼື ເພື່ອການບັນເທີງກໍໄດ້. ສາມາດສະແດງຜົນໜ້າຈໍແບບ Mirror Mode ຄື ໜ້າຈໍຄອມ ແລະ ໜ້າຈໍທີ່ສາຍອອກເປັນແບບດຽວກັນ. ສ່ວນແບບ Dex ແມ່ນການສະແດງຜົນອອກເທິງໜ້າຈໍໃນຮູບແບບລວງນອນຄືກັນກັບຄອມພິວເຕີ ແລ້ວສາດນຳເອົາ Mouse / Keyboard Bluetooth ເຊື່ອມຕໍ່ກັບມືຖືແລ້ວໃຊ້ງານໄດ້ເລີຍທັນທີ.

Galaxy Note 10 | 10+ by Yaklao ຢາກເລົ່າ
ສາມາດນຳສະເໜີ PowerPoint ໄດ້ດ້ວຍໂທລະສັບມືຖືກ Note 10

ໃຜທີ່ຕ້ອງເດີນທາງໄປນັ້ນໄປນີ້ ແລ້ວຕ້ອງໄປນຳສະເໜີງານຕ່າງໆ ກໍພຽງແຕ່ຈັບໂທລະສັບໄປໜ່ວຍດຽວກໍຖືວ່າຈົບໄດ້ໃນໜ່ວຍດຽວ ອັນນີ້ແອັດໂດນໃຈທີ່ສຸດ ເພາະຕອບໂຈດໃນວຽກງານການສິດສອນພໍດີເລີຍ.

4. Live Focus – ປະທັບໃຈໃນ ໜ້າຊັດຫຼັງເບຼີ

Galaxy Note 10 | 10+ by Yaklao ຢາກເລົ່າ
ຮູບນີ້ເປີດເຜີຍໜ້າແອັດມິນ… ຫຼໍ່ບໍ່?

ຫຼາຍໆລຸ້ນກໍມີໜ້າຊັດຫຼັງເບີ ແຕ່ລຸ້ນນີ້ໄວ ແບບໄວກັນສຸດໆໄປເລີຍ. ຂໍພຽງແຕ່ຈັບໃບໜ້າໄດ້ ກໍສາມາດເບຼີໄດ້ທັນທີ Realtime ກັນໄປເລີຍ.

ແຖມດ້ວຍ Video Live Focus, ອັນນີ້ໃຜທີ່ເປັນ VDO Content Creator ຕ້ອງມັກແນ່ນອນ, ຖ່າຍໄປນຳ ຫຼັງເບຼີໄປນຳ ປັບໄດ້ຕະຫຼອດເວລາ. ສາຍ Live ຫ້າມພາດ ປານໄດ້ ລຸງໜວດ ແກ້ວຄຸງ ມາຖ່າຍຮູບໃຫ້ເລີຍ.

5. Stabilizer – ປະທັບໃຈໃນ ການກັນສັ່ນປານມືອາຊີບຖ່າຍເອງ

ພຽງແຕ່ທ່ານເປີດໂໝດກັນສັ່ນ Stabilizer ເທົ່ານັ້ນ, ວິດີໂອຂອງທ່ານກໍຈະ Smooth ບານໄດ້ຜູ້ກັບກຳ Lee ມາຖ່າຍໃຫ້ເລີຍ.

ອີກຢ່າງທີ່ໜ້າສົນໃຈແມ່ນໃນລຸ້ນ Note ນີ້ສາມາດເປີດກັນສັ່ນໄດ້ທັງເລັນກວ້າງ ແລະ ເລັນປົກກະຕິ ເຊິ່ງໃນລຸ້ນອື່ນໆແມ່ນເປີດກັນສັ່ນໄດ້ສະເພາະເລັນກວ້າງເທົ່ານັ້ນ.

Galaxy Note 10 | 10+ by Yaklao ຢາກເລົ່າ
ຜູ້ກຳກັບລີ ແລະ ແກ້ວຄຸງ

6. AR Doodle – ປະທັບໃຈໃນ ຄວາມຟຸ້ງຟິ້ງມຸ້ງມິ້ງ

ສາຍ Live ທີ່ມັກ ຮູບຟຸ້ງມຸ້ງມິ້ງກຸ້ງກິ້ງດຸກດິກມຸກມິກ ໂອ້ຍພໍແລ້ວ.

AR Doodle ແມ່ນຮູບປະເພດ AR ທີ່ມັນຈະເກາະທີ່ໜ້າຂອງເຮົາເວລາເຮົາເຄື່ອນໄຫວໜ້າໄປມາ. ສ່ວນໃນ Note 10 ແລະ 10+ ທີ່ປີປາກກາມາແບບນີ້ກໍຕ້ອງໃຊ້ປາກກາໃຫ້ເປັນປະໂຫຍດ.

ເຮົາສາມາດທີ່ຈະແຕ້ມຮູບໃສ່ໃນໃບໜ້າຂອງເຮົາ ແລະ ຜູ້ອື່ນໄດ້ ເຊິ່ງໂທລະສັບຈະຈົດຈຳໃບໜ້າແລ້ວຈື່ໄວ້ວ່າໜ້າໃດແມ່ນຮູບໃດ.

ຖືເປັນລູກຫຼິ້ນທີ່ມຸ້ງມິ້ງດີ ແອັດມັກຫຼາຍຄິດວ່າລູກໆແອັດຕ້ອງມັກນຳແຫຼະ.

7. S Pen – ປະທັບໃຈໃນ ໄມ້ຄະທາເວດມົນ

Galaxy Note 10 | 10+ by Yaklao ຢາກເລົ່າ
ປາກກາ S Pen ປຽບສະເໝືອນໄມ້ຄະທາ

ໄມ້ກາຍາສິດ ສາມາດສັ່ງການໄດ້ທຸກຢ່າງດ້ວຍປາກກາພຽງດ້າມດຽວ, ດັ່ງທີ່ຮູ້ວ່າ S Pen ລຸ້ນໃໝ່ນີ້ມາພ້ອມກັບ ເຊັນເຊີວັດແທກການເຄື່ອນໄຫວຈຶ່ງມີປະໂຫຍດຫຼາຍສາມາດ ຊູມພາບ, ປ່ຽມໂໝດກ້ອງ, ເພີ່ມຫຼຸດ ສຽງ, ເລື່ອນວິດີໂປໄປໜ້າກັບຫຼັງໄດ້ ພຽງແຕ່ທ່ານປັດຂຶ້ນ ປັດລົງ ປັດຊ້າຍ ປັດຂວາ ປັດໜ້າ ປັດຫຼັງ (ອັນໜ້າຫຼັງ ນິຍັງບໍ່ມີ ແອັດຕື່ມເອງ)

ນັ້ນຄື 7 ຄວາມປະທັບໃຈແລກພົບ ຮັບແລກພົບຂອງແອັດທີ່ມີຕໍ່ Note 10 ແລະ Note 10+ ບອກເລີຍວ່າຫຼົງຮັກຕັ້ງແຕ່ເຫັນຈົນໄດ້ລອງເປີດເຂົ້າໄປໃນ, ລອງລູບ, ລອງຈັບ, ລອງບາຍ, ລອງສຽບເຂົ້າຖອດອອກ (ໝາຍເຖິງ S Pen)

ສ່ວນຂໍ້ອື່ນໆກໍຢາກວ່າຖອດແບບ S10 S10+ ອອກມາເລີຍລະ. ສະຫຼຸບຄືແອັດປະທັບໃຈແຮງ ເນື່ອງຈາກເປັນ Galaxy Note User ຢູ່ແລ້ວຕັ້ງແຕ່ Note 2, Note 8 ມາບາດນີ້ Note 10 ກໍບໍ່ນ່າຈະພາດ (ຖ້າການເງິນຄອບຄົວອະນຸມັດ)

Galaxy Note 10 | 10+ by Yaklao ຢາກເລົ່າ
ປຽບທຽບໃຫ້ເຫັນຄວາມແຕກຕ່າງລະຫວ່າງ Note 10 ແລະ 10+

Specification ສະເປັກໂດຍລວມ ປຽບທຽບລະຫວ່າງ Note 10 ແລະ Note 10+

ສິ່ງທີ່ຄືກັນ

ຂຸມພະລັງ: Exynos 9825

ຄວາມຈຳ: 8GB ແລະ 12GB

ຄວາມຈຸ: 256GB ສຳລັບ Note 10 ແລະ 512GB ສຳລັບ Note 10+ (ທີ່ນຳເຂົ້າມາຂາຍໃນລາວມີພຽງ 256GB ເທົ່ານັ້ນ)

ກ້ອງໜ້າ: 10ລ້ານພິກເຊວ

ສິ່ງທີ່ຕ່າງກັນ

ກ້ອງຫຼັງ: Note 10: ມີ 3 ກ້ອງ, ສ່ວນ Note 10+ ມີ 4 ກ້ອງ.

  • 16ລ້ານພິກເຊວ (ເລັນກວ້າງ)
  • 12ລ້ານພິກເຊວ (ເລັນປົກກະຕິ)
  • 12ລ້ານພິກເຊວ (ເລັນຊູມ)
  • ໃນ Note 10+ ມີ ToF ເຊັນເຊີ້ ສຳລັບຊັດໜ້າເບີຫຼັງ

ແບັດ: 3500mAh (Note 10), 4300mAh (Note 10+)

ຂະໜາດຈໍ: 6.3ນິ້ວ (Note 10), 6.8ນິ້ວ (Note 10+)

ດ້ານລາຄາກໍເປີດໂຕໃນລາວດັ່ງນີ້:

  • Galaxy Note10+ ລາຄາແນະນຳ 9,790,000 ກີບ
  • Galaxy Note10 ລາຄາແນະນຳ 8,490,000 ກີບ

ຖ້າຫາກທ່ານສັ່ງຈອງ ຈະໄດ້ອັບເກຣດເປັນ 512GB ໃນລາຄາດຽວກັນກັບ 265GB ສຳລັບ Note 10+

ສ່ວນໃນ Note 10 ແມ່ນຈະໄດ້ຮັບ Samsung Galaxy Buds ຟຣີ

ພິເສດສຸດ:

ໃນ Galaxy Note 10 ແລະ Note 10+ ຈະມີແອັບ Adobe Rush ເຊິ່ງເປັນໂປຣແກຣມຕັດຕໍ່ວິດີໂອມາໃຫ້ໃຊ້ຟຣີ 1 ເດືອນ. ຫຼັງຈາກນັ້ນ ຖ້າຫາກສົນໃຈໃຊ້ງານກໍສາມາດຈ່າຍລາຍເດືອນໄດ້ ໂດຍສະເພາະຜູ້ໃຊ້ Note 10 ແລະ Note 10+ ແມ່ນຮັບສ່ວນຫຼຸດໄປເລີຍ.

ສາຍງານ Content Creator ຕ້ອງຫ້າມພາດໂດຍເດັດຂາດ ເພາະ Adobe Rush ປຽບສະເໝືອນ Adobe Premiere ໃນເວີຊັ້ນມືຖື ສາມາດຕັດຕໍ່, ໃສ່ເອັບເຟັກ ແລະ ອັບຂຶ້ນ Creative Cloud ຈົບໃນໂຕດຽວ. ມີສະເພາະໃນ Galaxy Note 10 | 10+ ເທົ່ານັ້ນ.

ໝາຍເຫດ:

ເທົ່າທີ່ໃຊ້ງານມາໃນງານມື້ນີ້ຕັ້ງລອງໃຊ້ງານໜັກໆ ເປີດຈໍສະຫວ່າງສຸດ ໃຊ້ງານຫຼາຍໆແອັບສັບໄປໆມາ ກໍສັງເກດເຫັນວ່າຢາກຮ້ອນໄວເປັນພິເສດ ໂດຍສະເພາະເວລາເປີດພວກ Live Focus ເພາະມັນຕ້ອງປະມວນຜົນໜັກພໍສົມຄວນ.

ອີກຢ່າງທີ່ນ່າເສຍດາຍຄື Galaxy Note 10 ທີບໍ່ມີຊ່ອງໃສ່ເມັມເສີມຄືກັນກັບ Note 10+

ໃນລຸ້ນ Note 10 | 10+ ນີ້ແມ່ນຖືກຕັດເຊັນເຊີວັດຊີບພະຈອນອອກ ບໍ່ສາມາດວັດອັດຕາການເຕັ້ນຂອງຫົວໃຈໄດ້ອີກຕໍ່ໄປ

ແຕ່ເຮົາສາມາດຊື້ Galaxy Active Watch 2 ມາໃສ່ໄດ້

Galaxy Note 10 | 10+ by Yaklao ຢາກເລົ່າ
Galaxy Active Watch 2 ກໍມາ

ສະຫຼຸບ:

ຄວາມປະທັບໃຈທັງໝົດໃນ Galaxy Note 10 | 10+ ແມ່ນຖືວ່າມີຫຼາກຫຼາຍຢ່າງນັບເກືອບບໍ່ຖ້ວນ ແຕ່ນີ້ຄືສິ່ງທີ່ເຫັນແລ້ວຮັກເລີຍໃນໂທລະສັບເຄື່ອງນີ້

ທັງໃນເລື່ອງຂອງສະເປັກ, ຄວາມສາມາດຂອງ S Pen ແບບໃໝ່, ກ້ອງ ແລະ ໂດຍສະເພາະແມ່ນ Dex ເປັນສິ່ງທີ່ແອັດຕ້ອງການຫຼາຍທີ່ສຸດ

ສຸດທ້າຍກໍຂໍຂອບໃຈ ຊຳຊຸງປະເທດລາວ ທີ່ເຊີນທີມງານເຮົາເຂົ້າຮ່ວມໃນງານ Galaxy First Look ຄັ້ງນີ້ດ້ວຍ.


ປະກອບຄຳເຫັນ

This site uses Akismet to reduce spam. Learn how your comment data is processed.