17 ບົດຮຽນຊີວິດຂອງ Bill Gates ກ່ອນທີ່ຈະປະສົບຜົນສຳເລັດ - Yaklao.com
04/06/2019 https://www.entrepreneur.com/article/283401

17 ບົດຮຽນຊີວິດຂອງ Bill Gates ກ່ອນທີ່ຈະປະສົບຜົນສຳເລັດ


ບຸກຄົນທີ່ປະສົບຜົນສຳເລັດອັນດັບຕົ້ນໆຂອງໂລກ ຄົງຈະໜີບໍ່ພົ້ນ Bill Gates ຜູ້ກໍ່ຕັ້ງ Microsoft ຕັ້ງແຕ່ປີ 1975 ທີ່ຜະລິດ Windows ອອກມາໃຫ້ເຮົາໄດ້ໃຊ້ມາຫຼາຍປີ. ເຊິ່ງມີນີ້ເຮົາຈະມາເວົ້າເຖິງ 17 ບົດຮຽນຊີວິດຂອງ Bill Gates ທີ່ເຮົາສາມາດນຳມາປະຍຸກໃຊ້ກັບຊີວິດເຮົາໄດ້.

ບົດຄວາມນີ້ແມ່ນໄດ້ອ້າງອີງມາຈາກເວັບໄຊ້ທຸລະກິດຊື່ດັງ https://wealthygorilla.com ເຊິງໄດ້ຮວບຮວມເອົາ 17 ບົດຮຽນທີ່ສຳຄັນຂອງ Bill Gate ມາເຜິຍແຜ່ໃຫ້ເຮົາໄດ້ຮູ້

1. ເລີ່ມຕົ້ນໃຫ້ໄວທີ່ສຸດເທົ່າທີ່ຈະໄວໄດ້

ບົດຮຽນທຳອິດເລີຍແມ່ນໃຫ້ເລີ່ມຕົ້ນໃຫ້ໄວທີ່ສຸດເທົ່າທີ່ຈະໄວໄດ້ ເຊັ່ນວ່າ Bill Gates ແມ່ນໄດ້ເລີ່ມກໍ່ຕັ້ງບໍລິສັດຕັ້ງແຕ່ອາຍຸ 13 ປີ. ໝາຍຄວາມຖ້າເຮົາເລີ່ມໄວເທົ່າໃດ ເຮົາກໍມີໂອກາດປະສົບຜົນສຳເລັດໄວໄດ້ເທົ່ານັ້ນ ໃນຄະນະດຽວກັນເຮົາກໍອາດຈະລົ້ມເຫຼວໄວເຊັ່ນກັນ.

ຖ້າຫາກວ່າມີຄວາມຝັນ ກໍຈົ່ງເລີ່ມມັນຕັ້ງແຕ່ອາຍຸຍັງນ້ອຍ ຕອນທີ່ເຮົາຍັງມີໄຟຢູ່  ເຊິ່ງເຈົ້າອາດຈະໄດ້ຍິນຄົນເວົ້າວ່າເຮົາເຮັດບໍ່ໄດ້ດອກ ແຕ່ພໍເຮົາສ້າງຄວາມຝັນໄປໄດ້ຈັກໄລຍະໜຶ່ງ ເຮົາຈະພົບອຸປະສັກ ແລະ ສິ່ງເຫຼົ່ານັ້ນລະ ຈະກາຍເປັນແຮງພັກດັນເຮົາ.

2. ຊອກເພື່ອນຮ່ວມອຸດົມການ

ການທີ່ Bill Gates ປະສົບຜົນສຳເລັດໄດ້ນັ້ນແມ່ນຍ້ອນມີໝູ່ທີ່ດີ ມີໝູ່ທີ່ດີ ເຊິ່ງຄົນເລົ່ານັ້ນກໍມີອຸດົມການດຽວກັບລາວ. ເຮົາເອງກໍຄວນຊອກຫາເພື່ອທີ່ມີອຸດົມການດຽວກັນ ຍອມຝັ່ນຝ່າອຸປະສັກໄປນຳກັນຈົນພົບກັບຜົນສຳເລັດ.

ເຮົາຄວນສານສຳພັນກັບຄົນຫຼາຍໆຄົນໄວ້ ຍອມທີ່ຈະຈັບມືກັບຂູ່ແຂ່ງ ເພື່ອທີ່ຈະຄໍ້າຈຸນກັນ ຫາມິດຕະພາບກັບຜູ້ຄົນອ້ອມຂ້າງ ເພາະບາງຄັ້ງເຮົາອາດຈະຕ້ອງເອີ້ນຫາຄວາມຊ່ວຍເຫຼືອຈາກຄົນເຫຼົ່ານັ້ນ.

3. ເຈົ້າອາດຈະບໍ່ມີເງິນ 60,000$ ພາຍໃນປີດຽວຫຼັງຈາກຈົບການສຶກສາ

ເອົາຕົງໆເລີຍຄືເຈົ້າບໍ່ສາມາດຫາເງິນ ຫຼື ມີເງິນຂະໜາດນັ້ນໄດ້ໃນເວລາອັນສັ້ນ. ທຸກຢ່າງຕ້ອງມີການຮຽນຮູ້ ຕ້ອງເກັບກ່ຽວປະສົບການ ຕ້ອງພົບເຈິອຸປະສັກ.

ຜູ້ທີ່ນັ່ງຕຳແໜ່ງ CEO ຫຼື ປະທານບໍລິສັດຂະໜາດໃຫຍ່ ແລະ ເຈົ້າຂອງກິດຈະການໃຫຍ່ໆນັ້ນ ບໍ່ແມ່ນວ່າເຂົາມີໃບປະກາດບໍລິຫານທຸລະກິດ ແລ້ວເຂົາຈະໄດ້ເປັນປະທານ ແຕ່ເຂົາມີປະສົບການທີ່ສະສົມມາຍາວນານຫຼາຍປີ.

ຖ້າເຈົ້າຫວັງຈະສ້າງຄວາມຝັນໃຫ້ເປັນຈິງ ເຈົ້າຕ້ອງຕື່ນຈາກຝັນ ແລ້ວໃຫ້ເຂົາເຫັນຜົນງານທີ່ເຈົ້າສ້າງ ພິສູດໃຫ້ຄົນອື່ນເຫັນເຖິງຄຸນຄ່າໃນໂຕເຈົ້າວ່າເຈົ້າກໍເຮັດໄດ້.

4. ເປັນນາຍໂຕເອງ

Bill Gates ເປັນເຈົ້າຂອງບໍລິສັດແຕ່ອາຍຸຍັງນ້ອຍ ລາວກໍເລີຍເປັນນາຍໂຕເອງ ເພື່ອຈະຄວບຄຸມຜົນສຳເລັດຂອງໂຕເອງ. ລາວໄດ້ກ່າວວ່າ ຖ້າເຈົ້າບໍ່ສ້າງຝັນຂອງໂຕເອງ ຄົນອື່ນກໍຈະຈ້າງເຈົ້າໃຫ້ມາສ້າງຝັນຂອງເຂົາ – Bill Gates

5. ຢ່າເສຍໃຈກັບສິ່ງທີ່ຜິດພາດ, ຈົ່ງຮຽນຮູ້ຈາກມັນ

ເປັນຫຍັງໂທດຄົນອື່ນໃນເລື່ອງທີ່ໂຕເອງເຮັດຜິດພາດ? ເຈົ້າຈະຫຼອກໃຜກໍໄດ້ ແຕ່ຫຼອກໃຈໂຕເອງບໍ່ໄດ້. ຄວາມຜິດພາດທີ່ເຮົາກໍ່ ຈັ່ງໃດມັນກໍຄືຄວາມຜິດພາດຂອງເຮົາ. ສະນັ້ນ, ຢຸດໂທດນັ້ນ ໂທດນີ້ໄດ້ແລ້ວ.

ຄວາມຜິດພາດນັ້ນເປັນບົດຮຽນທີ່ລໍ້າຄ່າ ເຮົາອາດຈະເດີນທາງຜິດ ວາງແຜນທຸລະກິດຜິດ ວາງກົນລະຍຸດຜິດ ກໍຊ່າງມັນແລ້ວຮຽນຮູ້ຈັກມັນຊະ ຢ່າເຮັດຜິດພາດຊໍ້າສອງອີກ.

6. ມີຄວາມຕັ້ງໃຈ ແລະ ຫຼົງໄຫຼໃນສິ່ງທີ່ເຮັດ

ຜູ້ປະກອບການຫຼາຍໆຄົນມັກຈະບອກວ່າ ຈົ່ງມີຄວາມຕັ້ງໃຈ ແລະ ມີຄວາມຫຼົງໄຫຼໃນສິ່ງນັ້ນ. ກ່າວຄືຕ້ອງຮັກໃນສິ່ງທີ່ເຮົາເຮັດ ຕັ້ງໃຈເຮັດມັນຢ່າງສຸດຄວາມສາມາດ.

ເມື່ອເຮົາຍ້ອນກັບມາເບິ່ງວ່າເປັນຫຍັງຜູ້ຄົນທີ່ດັງໆຈຶ່ງປະສົບຜົນສຳເລັດໃນຊີວິດ ນັ້ນກໍເພາະວ່າພວກເຂົາຮັກໃນສິ່ງທີ່ເຂົາກຳລັງເຮັດຢູ່ ພວກເຂົາຍັງຫຼົງໄຫຼໃນສິ່ງເຫຼົ່ານັ້ນ. ຖ້າເຈົ້າຮູ້ສຶກວ່າສິ່ງເຫຼົ່ານັ້ນມັນຍາກ ຫຼື ລຳບາກເກີນໄປ, ມັນກໍອາດບໍ່ມັນສິ່ງທີ່ເຮົາຮັກຢູ່ກໍເປັນໄດ້.

7. ຊີວິດຄືໂຮງຮຽນທີ່ດີທີ່ສຸດ

ບໍ່ວ່າເຈົ້າຈະອ່ານປຶ້ມທີ່ດີປານໃດ, ເປັນລູກສິດອາຈານທີ່ດີພຽງໃດ ຫຼື ຈົບຈາກສະຖານບັນທີ່ດັງພຽງໃດ. ສິ່ງທີ່ເຈົ້າຈະພົບໃນໂລກແຫ່ງຄວາມເປັນຈິງນັ້ນລ້ວນແຕກຕ່າງຢ່າງຂາດຂັ້ນ.

ຊີວິດເຮັດວຽກໃນຄວາມເປັນຈິງ ແລະ ການເປັນນາຍຄົນນັ້ນ ເປັນສິ່ງທີ່ບໍ່ສາມາດຮຽນຮູ້ໄດ້ຈາກໂຮງຮຽນໃດໆເລີຍ ເຈົ້າຕ້ອງລົງມື ຕ້ອງປະຕິບັດດ້ວຍຕົນເອງເທົ່ານັ້ນ ບໍ່ຊັ້ນເຈົ້າຈະຖືກໄລ່ອອກຈາກການເປັນເຈົ້າຂອງຊີວິດຂອງຕົນເອງ.

8. ເປັນຄົນດີ ແລະ ເດັກຮຽນ

ຄຳວ່າເດັກຮຽນ ອາດຈະເບິ່ງຄືວ່າເປັນຄົນຮຽນໜັງສືຕະຫຼອດເວລາ ແຕ່ຈົ່ງເຊື່ອເຖາະວ່າພວກເຂົາເລົ່ານັ້ນມີໂອກາດປະສົບຜົນສຳເລັດໃນຊີວິດ.

ການເປັນເດັກຮຽນໃນນີ້ໝາຍເຖິງເປັນຄົນພ້ອມທີ່ຈະຮຽນຮູ້ສິ່ງໃໝ່ ມັກຮຽນຮູ້ ມັກໄຝ່ຫາຄວາມຮູ້ເຂົ້າໂຕເອງຕະຫຼອດເວລາ.

9. ຊີວິດຈິງບໍ່ແມ່ນນິຍາຍ

ເຈົ້າຕ້ອງແຍກໃຫ້ໄດ້ລະຫວ່າງໂລກແຫ່ງຄວາມຈິງ ກັບນິຍາຍທີ່ແຕ່ງຂຶ້ນ, ເພາະຄົນສ່ວນຫຼາຍມັກເບິ່ງຢູ່ໂທລະພາບ ຫຼື ອິນເຕີເນັດກ່ຽວກັບຊີວິດທີ່ສວຍຫຼູ.

ຄົນທີ່ຈະປະສົບຜົນສຳເລັດຈະບໍ່ນັ່ງຈິບກາເຟທີ່ລາຄາແພງ ລົມກັບເພື່ອນໄປເລື້ອຍເປື່ອຍ ແຕ່ເຂົາເລົ່ານັ້ນຈະເຮັດວຽກ ຫາທາງທີ່ຈະຮັບຜິດຊອບກັບລາຍຈ່າຍມະຫາສານ ແລະ ເພີ່ມພູນສະຖານະການເງິນຂອງພວກເຂົາໃຫ້ດີຂຶ້ນ.

10. ຊີວິດບໍ່ຍຸດຕິທຳ

ຊີວິດແຫ່ງຄວາມເປັນຈິງນັ້ນຊ່າງບໍ່ຍຸດຕິທຳ ບໍ່ວ່າເຈົ້າຈະພະຍາຍາມພຽງໃດ ກໍມັກຈະມີສິ່ງທີ່ບໍ່ໄດ້ຕາມໃຈເຮົາປະສົງ ບາງສິ່ງກໍບໍ່ສາມາດຄວບຄຸມໄດ້ ເຖິງເຮົາຈະລົ້ມລົງ ເຮົາກໍຕ້ອງພ້ອມທີ່ຈະລຸກຂຶ້ນມາຕໍ່ສູ້ອີກຄັ້ງ.

ຊີວິດຈິງນັ້ນມັນສ່ຽງ ຖ້າເຮົາລົ້ມລົງແລ້ວບໍ່ຄິດທີ່ຈະຢືນຂຶ້ນຄືນ ເຈົ້າກໍບໍ່ຄູ່ຄວນກັບຄຳວ່າ “ຜົນສຳເລັດ”. ຜູ້ຊະນະເຂົາຈະຮູ້ໂຕຢູ່ສະເໝີວ່າຊີວິດມັນໂຫດຮ້າຍ ແຕ່ເຂົາກໍພ້ອມທີ່ຈະລຸກຂຶ້ນສູ້ຈົນກວ່າຈະຊະນະ.

11.  ພ້ອມທີ່ຈະສ່ຽງ

ຖ້າເຈົ້າອ່ານຮອດຈຸດນີ້ແລ້ວ ແນ່ນອນວ່າເຈົ້າຈະຮູ້ວ່າຊີວິດນັ້ນບໍ່ມີຫຍັງແນ່ນອນ ເຈົ້າອາດຈະເສຍ ອາດຈະຊະນະ. ຂໍພຽງເຮົາຕ້ອງມີແຜນ ມີກົນລະຍຸດທີ່ຈະນຳພາທຸລະກິດ ຫຼື ຊີວິດຂອງເຮົາໄປຈຸດທີ່ປະສົບຜົນສຳເລັດ.

ຜູ້ຄົນອາດຈະຊໍ້າເຕີມ ຫຼື ປະຕິເສດເຈົ້າ ແຕ່ໃນທ້າຍທີ່ສຸດ ຖ້າເຈົ້າກ້າທີ່ຈະສ່ຽງໄປຫາສິ່ງທີ່ດີກວ່າ ເຈົ້າກໍສາມາດກ້າວຂ້າມອຸປະສັກຕ່າງ ແລະ ຈະບໍ່ມີສິ່ງໃດຂວາງທາງເຈົ້າໄດ້.

12. ຢ່າຫວັງນຳທາງລັດ

ສິ່ງໃດທີ່ໄດ້ມາງ່າຍ ກໍຍ່ອມສູນເສຍໄປດ້ວຍງ່າຍ ແລະ ມັນກໍບໍ່ມີທາງລັດໃດທີ່ຈະເຮັດໃຫ້ເຮົາປະສົບຜົນສຳເລັດໃນຊີວິດໄດ້ ທັງ Bill Gates ແລະ Paul Allen ທີ່ຮ່ວມກັນຕັ້ງ Microsoft ກໍລ້ວນແຕ່ຕ້ອງໄດ້ເຮັດວຽກຢ່າງໜັກໜ່ວງ ແລະ ມີຄວາມອົດທົນສູງກວ່າຈະໄດ້ມາເຖິງຈຸດນີ້.

13. ພູມໃຈໃນໂຕເອງ

ຫຼາຍຄົນມັກທີ່ຈະນັ່ງທໍ້ແທ້ເພາະໂຕເອງບໍ່ເກັ່ງ ບໍ່ມີຄວາມສາມາດ ບໍ່ຮັ່ງມີຄືຄົນອື່ນ ແຕ່ເຮົາຕ້ອງຍອມຮັບຄວາມຈິງທີ່ວ່າຄົນເຮົານັ້ນລ້ວນແຕ່ເກີດມາຕ່າງກັນ.

ແຕ່ລະຄົນ ລ້ວນແຕ່ມີຄວາມສາມາດທີ່ແຕກຕ່າງກັນອອກໄປ ຈົ່ງນໍາໃຊ້ສິ່ງເຫຼົ່ານັ້ນສ້າງຄວາມສຳເລັດແກ່ໂຕເອງ. ຖ້າເຮົາເຮັດໃນສິ່ງທີ່ເຮົາຖະນັດ ເຮົາກໍຈະມີຄວາມໝັ້ນໃຈຫຼາຍຂຶ້ນ

14. ອ່ອນນ້ອມຖ່ອມຕົນ

ນັກລ່າຝັນທີ່ປະສົບຜົນສຳເລັດທຸກຄົນລ້ວນມີຄວາມອ່ອນນ້ອມຖ່ອມຕົນ. ຄວາມສຳເລັດມັນບໍ່ແມ່ນສິ່ງທີ່ແນ່ນອນ ຖ້າເຈົ້າຄິດວ່າເຈົ້າຢູ່ສູງສຸດແລ້ວ ບໍ່ມີໃຜທຽບເຈົ້າໄດ້ ກໍຖືວ່າເຈົ້າຄິດຜິດ

ມື້ໜຶ່ງເຮົາອາດຈະຢູ່ຈຸດສູງສຸດ ແລະ ມື້ຕໍ່ມາເຮົາກໍອາດຈະຕົກລົງໄປຈຸດທີ່ຕໍ່າກວ່າເກົ່າ. ສິ່ງສຳຄັນຄືຢ່າລືມວ່າສິ່ງໃດແດ່ທີ່ນຳພາເຮົາມາຮອດຈຸດໝາຍປາຍທາງ. ຢ່າຫຼົງໂຕເອງຈົນເກີນໄປ ຈົ່ງມີຄວາມອ່ອນນ້ອມຕໍ່ທຸກໆຄົນໃນຊີວິດຂອງເຮົາ

15. ຄິດບວກ ແລະ ຮຽນຮູ້ເລື້ອຍໆ

ເມື່ອທຸກໆຄົນໄດ້ຍິນຄຳຕິຈາກຄົນອື່ນ ກໍມັກຈະໝົດຄວາມໝັ້ນໃຈ ແລະ ໝົດກຳລັງໃຈທີ່ຈະເຮັດໃນສິ່ງນັ້ນຕໍ່ໄປ ແລ້ວຝັນຂອງເຮົາທີ່ກຳລັງກໍ່ສ້າງໂຕນັ້ນກໍພັງທະລາຍລົງດ້ວຍຄຳເວົ້າຂອງຄົນ.

ຖ້າເຮົາເບິ່ງໃນທາງກົງກັນຂ້າມ ໃຫ້ນຳເອົາຄຳຕິຊົມເຫຼົ່ານັ້ນມາພັດທະນາຈຸດດ້ອຍຂອງເຮົາໃຫ້ດີຂຶ້ນ ແລະ ຮຽນຮູ້ຈາກສິ່ງທີ່ເຄີຍເຮັດຜິດພາດມາແລ້ວ.

16. ຍອມຮັບຄວາມຜິດພາດ ແລະ ກ້າວຕໍ່ໄປ

ໃນຫຼາຍໆຄັ້ງທີ່ຄວາມຜິດພາດມັກຈະມີຜົນຕໍ່ຈິດໃຈຂອງເຮົາ ແຕ່ເຈົ້າຮູ້ບໍ່ວ່າມັນມີຄວາມສຳຄັນຫຼາຍກວ່າຄວາມສຳເລັດອີກ. ໃນບົດຮຽນຊີວິດ ແລະ ອົງຄວາມຮູ້ຕ່າງໆລ້ວນແຕ່ມີຢູ່ໃນຄວາມຜິດພາດຂອງເຮົາ.

ລອງນຶກຍ້ອນກັບໄປເບິ່ງວ່າໃນເວລາທີ່ເຮົາປະສົບຜົນສຳເລັດອັນໃດອັນໜຶ່ງນັ້ນ ເຮົາຈະມີຄວາມສຸກ ແລະ ທຸກຢ່າງຊ່າງສວຍງາມ. ແຕ່ຍາມທີ່ເຮົາກ້າວຜິດພາດ ຫຼື ເຮັດຫຍັງຜິດ ກໍກາຍເປັນສິ່ງດຳມືດຊອກຫາທາງອອກບໍ່ເຫັນ ທຸກຄົນຈະເລີ່ມເຜີຍທາດແທ້ ແລະ ເຮັດໃຫ້ເຮົາເຫັນວ່າໃຜກັນແທ້ທີ່ຄຽງຂ້າງເຮົາ ແລະ ໃຜທີ່ເປັນຄົນຫຼອກລວງ.

ເຮົາສາມາດສະຫຼອງໄຊຊະນະໄດ້ ແຕ່ຈົ່ງໃຫ້ຄວາມສຳຄັນກັບສິ່ງທີ່ຜິດພາດນຳ – Bill Gates

17. ແບ່ງປັນຜົນສຳເລັດໃຫ້ຄົນອື່ນ

ກ່ອນທີ່ຈະປະສົບຜົນສຳເລັດໄດ້ນັ້ນ ມັນເປັນສິ່ງທີ່ທ້າທາຍຫຼາຍ ເຈົ້າຕ້ອງພົບກັບອຸປະສັກຕ່າງໆນາໆ ບັນຫານານັບປະການ ແລະ ເຮົາກໍໄດ້ຮັບບົດຮຽນທີ່ຫຼາກຫຼາຍຮູບແບບ.

ຜູ້ທີ່ປະສົບຜົນສຳເລັດນັ້ນມັກຈະແບ່ງປັນຄວາມຮູ້ ແລະ ແນວທາງຊີວິດກ່ອນທີ່ຈະມາຮອດຈຸດສູງສຸດ. ຜັກດັນ, ໃຫ້ກຳລັງໃຈ ແລະ ຈຸດປະກາຍຄວາມຝັນໃຫ້ຄົນອື່ນ

ສະຫຼຸບແບບຫຍໍ້

  1. ເລີ່ມຕົ້ນໃຫ້ໄວທີ່ສຸດເທົ່າທີ່ຈະໄວໄດ້
  2. ຊອກເພື່ອນຮ່ວມອຸດົມການ
  3. ເຈົ້າອາດຈະບໍ່ມີເງິນ 60,000$ ພາຍໃນປີດຽວຫຼັງຈາກຈົບການສຶກສາ
  4. ເປັນນາຍໂຕເອງ
  5. ຢ່າເສຍໃຈກັບສິ່ງທີ່ຜິດພາດ, ຈົ່ງຮຽນຮູ້ຈາກມັນ
  6. ມີຄວາມຕັ້ງໃຈ ແລະ ຫຼົງໄຫຼໃນສິ່ງທີ່ເຮັດ
  7. ຊີວິດຄືໂຮງຮຽນທີ່ດີທີ່ສຸດ
  8. ເປັນຄົນດີ ແລະ ເດັກຮຽນ
  9. ຊີວິດຈິງບໍ່ແມ່ນນິຍາຍ
  10. ຊີວິດບໍ່ຍຸດຕິທຳ
  11. ພ້ອມທີ່ຈະສ່ຽງ
  12. ຢ່າຫວັງນຳທາງລັດ
  13. ພູມໃຈໃນໂຕເອງ
  14. ອ່ອນນ້ອມຖ່ອມຕົນ
  15. ຄິດບວກ ແລະ ຮຽນຮູ້ເລື້ອຍໆ
  16. ຍອມຮັບຄວາມຜິດພາດ ແລະ ກ້າວຕໍ່ໄປ
  17. ແບ່ງປັນຜົນສຳເລັດໃຫ້ຄົນອື່ນ

ແຕ່ລະຄົນມີຄຳຄິດເຫັນແນວໃດກັບບົດຄວາມນີ້ ສາມາດສົ່ງຄິດເຫັນກັນເຂົ້າມາໄດ້.

ຖ້າຄິດວ່າບົດຄວາມນີ້ດີ ກໍຊ່ວຍໆກັນ Share ແດ່ເດີ້

ສາມາດຕິດຕາມ YakLao Podcast ໄດ້ທີ່ https://yaklao.podbean.com
ສຳລັບຜູ້ທີ່ບໍ່ມີເວລາອ່ານ ກໍຟັງໄດ້ທີ່ດ້ານລຸ່ມນີ້ເລີຍ


Leave a Reply

Your email address will not be published.

This site uses Akismet to reduce spam. Learn how your comment data is processed.