10/01/2019 dangue-fever-laos

ໄຂ້ຍຸງລາຍຈະກັບມາລະບາດໃນປີ 2019 – ມາຮູ້ຈັກກັບໄຂ້ຍຸງລາຍ ວິທີຮັກສາ ແລະ ປ້ອງກັນ

Spread the love
  • 2
    Shares

ອີງຕາມການລາຍງານຂ່າວຂອງໜັງສືພິມວຽງຈັນໃໝ່ໃຫ້ຮູ້ວ່າ ປີ 2019 ຈະມີຄວາມສ່ຽງສູງທີ່ຈະເກີດລະບາດຂອງພະຍາດໄຂຍຸງລາຍ. ເຊິ່ງຄວນຕ້ອງເຝົ້າລະວັງ ໂດຍສະເພາະແມ່ນເດັກນ້ອຍ ແລະ ຜູ້ອາວຸໂສ ເພາະມີຄວາມສ່ຽງສູງ ເຖິງຂັ້ນເສຍຊີວິດ.

ສະ­ເພາະປີ 2018 ມີ 6.176 ກໍ­ລະ­ນີ ຕາຍ 18 ຄົນ ໃນ 18 ແຂວງ ມີ 17 ແຂວງທີ່ມີລາຍງານໄຂ້­ຍຸງລາຍ ແລະ ແຂວງຫົວ­ພັນ ບໍ່ມີລາຍງານກໍ­ລະ­ນີພະ­ຍາດຍຸງລາຍ ທຽບ­ໃສ່ປີ 2013 ເພີ່ມຂຶ້ນກວ່າປີອື່ນໆຜ່ານມາ ໂດຍສະ­ເພາະ Den2 ແລະ Den4 ອ່ານເພີ່ມໄດ້ທີ່ນີ້

ສາຍພັນຂອງໄຂ້ຍຸງລາຍ

ໄຂ້ຍຸງລາຍ ຫຼື ໄຂ້ເລືອດອອກ ເປັນໄຂ້ທີ່ມີພາຫະຈາກຍຸງລາຍໂຕແມ່ ດູດກິນເລືອດຄົນ ແລ້ວປ່ອຍຈຸລະໂລກ ຫຼື ເຊື້ອພະຍາດເຂົ້າສູ່ຮ່າງກາຍຂອງຄົນເຮົາ ເຊິ່ງແບ່ງອອກເປັນ Den1, Den2, Den3 ແລະ Den4 ບໍ່ວ່າຈະຮັບເຊື້ອສາຍພັນໃດກໍມີໂອກາດເປັນໄຂ້ເລືອດອອກທັງນັ້ນ ແຕ່ຖ້າຫາກຮ່າງກາຍໄດ້ຮັບເຊື້ອສາຍພັນໃດ ຮ່າງກາຍກໍຈະສ້າງພູມຕ້ານທານສະເພາະສາຍພັນນັ້ນ ແລະ ຈະບໍ່ຕິດເຊື້ອສາຍພັນນັ້ນຕະຫຼອດຊີວິດ ແຕ່ຈະມີໂອກາດຕິດຈາກສາຍພັນອື່ນ

ອາການຂອງໄຂ້ຍຸງລາຍ

ອາການຂອງຄົນເຈັບຈະຄ້າຍຄືກັນກັບໄຂ້ຫວັດທົ່ວໄປ ໂຕຮ້ອນ ເຈັບຫົວ ປວດຮາກ ບາງຄົນກໍມີຄວາມດັນຕໍ່າ (ຕັ່ງຊົງຕໍ່າ) ອ່ອນເພຍ ປວດເມື່ອຍຕາມຕົນໂຕ ຕາມຂໍ້ ຕາມກະດູກ ເຈັບຕາ ຕາມົວ ແລະ ຖ່າຍເປັນນໍ້າ.

ອາກາດທີ່ບອກໃຫ້ຮູ້ວ່າເປັນໄຂ້ເລືອດອອກຮຸນແຮງແມ່ນຈະມີພາວະເລືອດອອກຕາມບໍລິເວນຜິວໜັງ ມີເລືອດເປັນຈຸດໆ ກະຈາຍຕາມແຂນຂາ ລຳໂຕ ຂີ້ແຮ້ ລວມເຖິງອາໄວຍະວະພາຍໃນ ເຊັ່ນທາງເດີນອາຫານ ບາງຄົນຮາກ ແລະ ຖ່າຍເປັນເລືອດ. ຄົນເຈັບຈະມີອາການຕັບໃຫຍ່ ແລະ ຮູ້ສຶກເຈັບ ມີເລືອດອອກທີ່ຕັບ ມ້າມ ຫຼື ມີອາການໄຕວາຍ ເຖິງຂັ້ນຊ໊ອກ ເຊິ່ງອັນຕະລາຍຫຼາຍ.

ສິ່ງທີ່ແຕກຕ່າງຈາກໄຂ້ທົ່ວໄປແມ່ນມີດັ່ງນີ້

  1. ມີໄຂ້ສູງຢ່າງກະທັນຫັນ ບໍ່ມີຂີ້ມູກ ຫຼື ບໍ່ໄອ
  2. ມີຈຸດເລືອດອອກຕາມຜິວໜັງ
  3. ກໍລະນີຮຸນແຮງແມ່ນມີເລືອດອອກ ເລືອດດັງອອກ ເລືອດອອກຕາມເຟັນແຂ້ວ ຖ່າຍເປັນເລືອດ ຮາກເປັນເລືອດ

ຂໍ້ສັງເກດ

  1. ຄົນເຈັບຈະມີໄຂ້ສູງແບບທັນທີປະມານ 2-7 ມື້ ໄຂ້ສູງເຖິງ 38.5 ອົງສາເຊວຊຽດ ຫຼື ເຖິງ 40-41 ອົງສາເຊວຊຽດ ບາງຄົນອາດຊ໊ອກໄດ້ ໂດຍສະເພາະແມ່ນເດັກ.
  2. ຄົນເຈັບມີເລືອດອອກ ພົບເຫັນຫຼາຍທີ່ສຸດແມ່ນບໍລິເວນຜິວໜັງ ເຫັນວ່າມີເສັ້ນເລືອດບາງ ແຕກງ່າຍ ມີເລືອດອອກເຈັນຈຸດໆຕາມແຂນ ຂາ ເລົາຄີງ ຂີ້ແຮ້ ອາດຈະມີເລືອດດັງອອກ ເລືອດອອກຕາມເຟັນແຂ້ວ ຖ້າຮຸນແຮງກໍຖ່າຍ ແລະ ຮາກເປັນເລືອດ
  3. ຄົນເຈັບຈະມີອາການຕັບບວມ ແລະ ຮູ້ສຶກເຈັບເມື່ອກົດ ໂດຍເຫັນໄດ້ວ່າຕັບຈະບວມໃນຊ່ວງວັນທີ 3-4 ນັບຕັ້ງແຕ່ເລີ່ມປ່ວຍ
  4. ຄົນເຈັບມີພາວະເລືອດໄຫລວຽນບົກຜ່ອງ ເຊິ່ງປະມານ 1 ໃນ 3 ຂອງຄົນເປັນໄຂ້ເລືອດອອກຈະມີອາການຮຸນແຮງເຖິງຊ໊ອກ ເນື່ອງຈາກມີການຮົ່ວຂອງພລາສມາອອກໄປຊ່ອງປອດ ຫຼື ຊ່ອງທ້ອງ ເກີດເປັນ Hypovolemic Shock ສ່ວນຫຼາຍຈະເກີດຂຶ້ນພ້ອມໆກັບໄຂ້ທີ່ລຸດລົງຢ່າງກະທັນຫັນ. ອາດຈະຊ໊ອກວັນທີ 3 ຫຼື ວັນທີ 8 ຂອງວັນທີ່ເລີ່ມລົ້ມປ່ວຍ
  5. ອາການຂອງຄົນເຈັບໃນໄລຍະມີໄຂ້ ກະມະຈອນຈະເຕັ້ນເບົາ ຕີມືເຢັນ ຄວາມດັນຕໍ່າຜິດປົກກະຕິ ມີອາການອົນອວຍ
dengue-fever-infographics-vector-8329289
info graphic ໂລກໄຂ້ຍຸງ

ການຮັກສາ ແລະ ການເບິ່ງແຍງ

ໃນຂະນະນີ້ຍັງບໍ່ມີຢາຊະນິດໃດທີ່ສາມາດຕໍ່ຕ້ານໄວຣັສທີ່ມີລິດສະເພາະສຳລັບໄຂ້ຍຸງ ຫຼື ໄຂ້ເລືອດອອກ ໄດ້ແຕ່ຮັກສາອາການແບບປະຄັບປະຄອງໄປກ່ອນເທົ່ານັ້ນ ຖ້າຫາກຄົນເຈັບມີໄຂ້ສູງກໍໃຫ້ກິນຢາລົດໄຂ້ ຄືຢາ ພາຣາເຊຕາມໍ ຖ້າຫາກຄົນເຈັບຮາກ ແພດກໍຈະໃຫ້ຢາແກ້ປວດຮາກ ໃຫ້ດື່ມນໍ້າເກືອຊະນິດດື່ມ ອາດຈະໃຫ້ນໍ້າເກືອທາງຫຼອດເລືອດນໍາ

ບໍ່ຄວນຮັກສາໂຕເອງຢູ່ບ້ານ ເພາະເຊືອດມີການກາຍພັນ ອາດຈະເຮັດໃຫ້ຮຸນແຮງຂຶ້ນກວ່າເກົ່າ ຄວນພົບແພດເພື່ອດູແລຢ່າງໃກ້ຊິດ ເນື່ອງຈາກໄຂ້ຍຸງ ຫຼື ໄຂ້ເລືອດອອກມີຄວາມສ່ຽງສູງທີ່ຈະເສຍຊີວິດໄດ້

ຫ້າມໃຊ້ຢາແອສໄພຣິນກັບຄົນເຈັບໄຂ້ເລືອດອອກໂດຍເດັດຂາດ ຫຼື ຢາກໃນກຸ່ມ NSAIDS ເພາະຢາກໃນກຸ່ມນີ້ ມີຄຸນສົມບັດຈັບຕົບກັນເປັນກ້ອນເລືອດ ເຊິ່ງຢາກນີ້ອາດໄປກະຕຸ້ນອາການເລືອດອອກໃຫ້ຫຼາຍກວ່າເກົ່ານັ້ນເອງ ໃຫ້ໃຊ້ຢາພາຣາເຊຕາມໍໃນການລົດໄຂ້ແທນ

ຖ້າຫາກໄຂ້ລົດລົງ ຄົນເຈັບຈະມີຄວາມຮູ້ສຶກເບີກບານ ກິນອາຫານໄດ້ ເຄື່ອນໄຫວຮ່າງກາຍໄດ້ງ່າຍຂຶ້ນ

  1. ເມື່ອມີໄຂ້ສູງກໍໃຊ້ຢາລົດໄຂ້ ພາຣາເຊຕາມ ເທົ່ານັ້ນ ຫ້າມໃຊ້ຊະນິດອື່ນ ເພາະຈະເຮັດໃຫ້ເລືອດອອກຕື່ມ
  2. ຊົດເຊີຍນໍ້າ ໂດຍໃຫ້ດື່ມນໍ້າໃນປະລິມານຫຼາຍກວ່າເກົ່າ ແຕ່ໃຫ້ດື່ມເທື່ອລະໜ້ອຍ ດີສຸດແມ່ນນໍ້າໝັກໄມ້ຄັ້ນສົດ ຫຼື ນໍ້າເກືອແຮ່ ຖ້າຍ່ຽງຍັງເປັນສີເຫຼືອງເຂັ້ມຖືວ່າຍັງຂາດນໍ້າ
  3. ຕິດຕາມອາການຢ່າງໃກ້ຊິດ ເພື່ອປ້ອງກັນການຊ໊ອກ
  4. ຢູ່ໃນເຂດປອດຍຸງ ເພື່ອປ້ອງກັນການແຜ່ລະບາດ
  5. ຢູ່ໃນທີ່ອາກາດຖ່າຍເທສະດວກ
  6. ຜັກຜ່ອນໃຫ້ພຽງພໍ
  7. ໝັ່ນເຊັດໂຕດ້ວຍນໍ້າອຸ່ນ ຮັກສາອຸນຫະພູມບໍ່ໃຫ້ເກີນ 39 ອົງສາເຊວຊຽດ ຫ້າມໃຊ້ນໍ້າເຢັນເດັດຂາດ
  8. ຫ້າມກິນຢາອື່ນໂດຍບໍ່ປຶກສາແພດ ນອກຈາກຢາ ພາຣາເຊີຕາມໍ
  9. ຫ້າມກິນອາຫານສີແດງ ເພາະເວລາຮາກ ຫຼື ຖ່າຍຈະສັງເກດໄດ້ຍາກວ່າເປັນເລືອດ ຫຼື ອາຫານທີ່ກິນ

ການປ້ອງກັນ

  1. ບໍ່ໃຫ້ຍຸງກັດ
  2. ກຳຈັດແຫຼ່ງເພາະພັນຍຸງ
  3. ສີດຢາກຳຈັດຍຸງ (ສາທາເມືອງລົງມາສີດເປັນປະຈຳ)
  4. ເຝົ້າລະວັງຕົນເອງ ຫຼື ຜູ້ອື່ນເມື່ອມີອາການ
  5. ອອກກຳລັງກາຍເພື່ອສ້າງພູມຄຸ້ມກັນ

ຊ່ວງຍາມຝົນເປັນຊ່ວງລະບາດຂອງໂລກໄຂ້ຍຸງລາຍ ສະນັ້ນທຸກຄົນຄວນປ້ອງກັນໂຕເອງ ແລະ ຄົນໄກ້ຊິດໃຫ້ອອກຫ່າງຈາກຍຸງລາຍ ໂດຍການທຳລາຍແຫຼ່ງເພາະພັນຍຸງລາຍໃຫ້ໝົດ

ຂໍ້ມູນຈາກ ໜັງສືພິມວຽງຈັນໃໝ່ ແລະ honestdocs


Spread the love
  • 2
    Shares

Leave a Reply

This site uses Akismet to reduce spam. Learn how your comment data is processed.