fbpx
10/01/2019 slow-internet-turtle

ເປັນຫຍັງຕ້ອງຈຳກັດຄວາມໄວເນັດຊິມ ທັງທີ່ສະມັກແບບບໍ່ຈຳກັດ


ການໃຊ້ງານອິນເຕີເນັດເປັນສິ່ງຈຳເປັນສຳລັບຄົນໃນຍຸກປະຈຸບັນ ທີ່ເໜັງໂຕນ້ອຍໜຶ່ງກໍມີອິນເຕີເນັດ ແລ້ວອິນເຕີເນັດທີ່ທຸກຄົນເຂົ້າເຖິງໄດ້ກໍຄືເນັດຊິມ ຫຼື 3G, 4G, LTE ລວມໄປເຖິງ 5G ທີ່ກຳລັງຈະມີໃນໄວໆນີ້.

ເປັນຫຍັງເວລາເຮົາສະມັກແພັກເກຈຕ້ອງມີແບບຈຳກັດດາຕາ ແລະ ແບບບໍ່ຈຳກັດດາຕາ ແຕ່ໄປຈຳກັດຄວາມໄວແທນ ທັງທີ່ບໍລິສັດໂທລະຄົມອອກຈະລວຍ ຄືບໍ່ເຮັດເນັດໃຫ້ມັນແຮງໆເລີຍ ແລ້ວປ່ອຍໃຫ້ທຸກຄົນໄດ້ໃຊ້ ມັນຊິຂາດທຶນປານນັ້ນພຸ້ນຫວາ?

ກ່ອນອື່ນໝົດ ທຸກຄົນຕ້ອງເຂົ້າໃຈຄຳວ່າ FUP – Fair Usage Policy ຫຼື ນະໂຍບາຍການນຳໃຊ້ແບບສະເໝີພາບເທິງເຄືອຂ່າຍອິນເຕີເນັດທີ່ບັນດາບໍລິສັດໂທລະຄົມກຳນົດໄວ້ ໃຫ້ຜູ້ໃຊ້ໄດ້ໃຊ້ງານເປັນໄປຕາມຂໍ້ກຳນົດຂອງແພັກເກຈດນັ້ນໆ ທີ່ເຮົາສະມັກໄວ້.

ເປັນຫຍັງຕ້ອງ FUP

FUP ເປັນກົດລະບຽບບັງຄັບທີ່ມີໃຫ້ຜູ້ໃຊ້ງານອິນເຕີເນັດ 3G/4G/LTE ຕ້ອງໄດ້ປະຕິບັດຕາມ ເຊິ່ງຫຼາຍໆປະເທດກໍນຳໃຊ້ ເພື່ອຫຼີກຫຼ່ຽງການນຳໃຊ້ອິນເຕິເນັດ 3G/4G/LTE ໃນທາງທີ່ຜິດວັດຖຸປະສົງຂອງອິນເຕີເນັດປະເພດນີ້ ເຊັ່ນການໂຫຼດ BitTorrent ຫຼື ການໃຊ້ທີ່ໜັກໜ່ວງເຊັ່ນການ Streaming ແບບໜັກໆ ເປັນຕົ້ນ ເຊິ່ງການໃຊ້ງານແບບນັ້ນເໝາະກັບເນັດສາຍຫຼາຍກວ່າ.

ຖ້າບໍ່ມີ FUP ຈະເກີດຫຍັງ?

ນຶກພາບເບິ່ງວ່າເວລາເຮົາແຊອິນເຕີເນັດໃຫ້ຄົນອື່ນໃຊ້ຜ່ານ Pocket Wifi ຂອງເຮົານັ້ນລະ ຈະສັງເກດເຫັນບໍ່ວ່າອິນເຕີເນັດຈະຊ້າລົງ ເນື່ອງຈາກມີການແບ່ງຊ່ອງສັນຍານໃຫ້ຜູ້ອື່ນໃຊ້ພ້ອມໆກັນ ປຽບທຽບໄດ້ກັບເສັ້ນທາງເສັ້ນດຽວທີ່ມີລົດແລ່ນເຂົ້າອອກຫຼາຍຄັນ. ສະນັ້ນຜູ້ໃຫ້ບໍລິການກໍຈະຈຳເປັນຕ້ອງໄດ້ກຳນົດປະລິມານການໃຊ້ງານໃຫ້ຜູ້ໃຊ້ແຕ່ລະຄົນຕາມແພັກເກຈທີ່ສະມັກ ເພື່ອໃຫ້ທຸກໆຄົນໄດ້ນຳໃຊ້ຊ່ອງສັນຍານທີ່ສະເໝີພາບ ແລະ ເທົ່າທ່ຽມກັນ.

ຢາກໃຊ້ເນັດແບບເຕັມສະປີດຈະເຮັດແນວໃດ

ແນ່ນອນວ່າຈະໃຊ້ອິນເຕີເນັດ 3G/4G/LTE ແບບບໍ່ຈຳກັດດາຕາເລີຍຄົງຈະເປັນໄປບໍ່ໄດ້ ສະນັ້ນຜູ້ໃຊ້ງານກໍຄວນຫັນໄປໃຊ້ອິນເຕີເນັດແບບອື່ນເຊັ່ນວ່າ

  • ADSL – ລາຄາຖືກມາພ້ອມກັບໂທລະສັບສາຍ ບໍ່ໄວ
  • Leased Line – ລາຄາແພງ(ຫຼາຍ) ເໝາະກັບອົງກອນ ມີຄວາມໄວສູງ
  • FTTH (Fiber to The Home) – ລາຄາປານກາງເໝາະສົມແກ່ການໃຊ້ງານທົ່ວໄປ ມີຄວາມໄວປານກາງ-ສູງ
  • Wifi – ປະຈຸບັນມີແຕ່ຂອງ Lao Telecom ແລະ ຍັງມີເປັນບາງຂົງເຂດ ມີຄວາມໄວປານກາງ-ສູງ

ສະຫຼຸບ

ການໃຊ້ງານອິນເຕີເນັດນັ້ນຄວນໃຊ້ໃຫ້ຖືກວັດຖຸປະສົງຂອງແຕ່ລະປະເພດ ໂດຍຄຳນຶງເຖິງປະລິມານການໃຊ້ງານຂອງເຮົາ ຖ້າເຮົາໃຊ້ໜ້ອຍ ເປັນຄັ້ງຄາວກໍຄວນໃຊ້ເປັນພວກເນັດຊິມ ແຕ່ຖ້າການໃຊ້ງານໜັກໜ່ວງ ມີການໂຫຼດເປັນຈຳນວນຫຼາຍ ກໍເໝາະສົມທີ່ຈະຕ້ອງຕິດຕັ້ງ FTTH ດີກວ່າ

ຫວັງວ່າຜູ້ໃຊ້ອິນເຕີເນັດຫຼາຍໆຄົນຈະເຂົ້າໃຈແລ້ວເນາະ ວ່າເປັນຫຍັງຕ້ອງມີຈຳກັດຄວາມໄວ ແບບທີ່ເຮົາເຫັນໃນໂຄສະນາຂອງບໍລິສັດໂທລະຄົມຫຼາຍໆບໍລິສັດນັ້ນລະ ແລ້ວຜູ້ໃຫ້ບໍລິການເອງກໍຄວນຊີ້ແຈງເລື່ອງນີ້ຕື່ມໃຫ້ຜູ້ໃຊ້ເຂົ້າໃຈນຳ ເຖິງມັນຈະເປັນເລື່ອງເກົ່າແລ້ວ ແຕ່ຫຼາຍໆຄົນກໍຍັງບໍ່ທັນເຂົ້າໃຈຄັກ ເວັບ Yaklao.com ກໍຂໍເປັນອີກໜຶ່ງກະບອກສຽງຊ່ວຍອະທິບາຍໃຫ້ປະຊາຊົນລາວໄດ້ຮູ້ຕື່ມ.

ແລ້ວເນັດ 5G ຊິເປັນແນວໃດນໍ້?

ປະກອບຄຳເຫັນ

This site uses Akismet to reduce spam. Learn how your comment data is processed.