fbpx
04/02/2019 J J - Net Idol

ສຳພາດ ເຈເຈ Net Idol ຄົນໃໝ່ຂອງລາວ ນາຍ(ນາງ)ແບບ Feb Fest 2019


ສະບາຍດີໄວລຸ້ນ ວຸ້ນຮັກທັງຫຼາຍ ມື້ນີ້ຢາກເລົ່າຈະມາແນະນຳໃຫ້ຮູ້ຈັກກັບເນັດໄອດໍຄົນໃໝ່ຂອງວົງການແຟຊັ້ນໃນບ້ານເຮົານັ້ນກໍຄື ເຈເຈ – ວິລະວຸດ ພົມມະຫາໄຊ. ນາຍແບບຫຼາກຫຼາຍຄວາມສາມາດ ປະຈຸບັນເປັນ Freelance ຮັບງານທົ່ວໄປ ຟ້ອນ ຖ່າຍແບບ, ເຈົ້າຂອງທຸລະກິດເສື້ອຜ້າ ເຄີຍເປັນນັກກິລາເຊຍລີດເດີ້ຕິດອັນດັບທ໊ອບຂອງການແຂ່ງຂັນທຸກປີ.

ຈຸດເລີ່ມຕົ້ນທີ່ເຮັດໃຫ້ມັກແຟຊັ້ນແມ່ນຫຍັງ?

ຈຸດເລີ່ມຕົ້ນແມ່ນມາຈາກເຈເປັນຄົນທີ່ມັກແຟຊັ້ນຄື ສີຜົມ ເຈມັກຍ້ອມສີຜົມໃໝ່ ເຫັນສີໃດເດັດໆກໍຈະຈັດເລີຍໂລດ ເວລາທີ່ເຈເຮັດສີຜົມເດັ່ນຄືເສື້ອຜ້າກະຊິທຳມະດາບໍ່ໄດ້.

ຄວາມຝັນສູງສຸດຂອງເຈໃນວົງການແຟຊັ້ນແມ່ນຫຍັງ?

ຄວາມຝັນໃນວົງການແຟຊັ້ນຂອງເຈຫວາ….. ອືມ….ກະຕອບຍາກເນາະ ແຕ່ສິ່ງທີ່ເຈຫວັງຫຼາຍທີ່ສຸດແມ່ນເວລາທີ່ຄົນອື່ນຄິດຫາເລື່ອງແຟຊັ້ນ ກະຢາກໃຫ້ເຂົາຄິດຫາເຈເປັນຄົນທຳອິດ ແບບວ່າຝັງເຂົ້າໄປໃນຄວາມຄິດເຂົາເລີຍ ຄິດຈະແຟຊັ້ນ ຕ້ອງຄິດເຖິງເຈ.

ຄິດວ່າວົງການແຟຊັ້ນໃນລາວເປັນແນວໃດ?

ເຈກະເຫັນຫຼາຍໆຄົນເລີ່ມເຫັນຄວາມສຳຄັນຂອງແຟຊັ້ນຫຼາຍຂຶ້ນ. ສຳລັບວົງການແຟຊັ້ນຂອງໄວລຸ້ນລາວກະເຫັນເລີ່ມໆກະໂດດຂັ້ນໄປເທື່ອລະຫນ້ອຍ ແຕ່ຈະເຫັນເດັ່ນໆແມ່ນເວລາມີເທດສະການທີ່ມີຄອນເຊັບກະຊິເປັນແຫຼ່ງລວມແຟຊັ້ນທີ່ດີເລີຍ. ຖືວ່າພັດທະນາໄກຫຼາຍ ແລະ ຂັ້ນເທິງເພິ່ນກໍເປີດໂອກາດໃຫ້ໄວໝຸ່ມລາວໄດ້ສະແດງອອກຫຼາຍກວ່າເກົ່າ ເຮັດໃຫ້ໄວໜຸ່ມໄດ້ກ້າຄິດກ້າສະແດງອອກ.

ມາເປັນແບບໃຫ້ງານ Feb Fest ໄດ້ແນວໃດ?

ມາເປັນແບບໃຫ້Feb Fest ຍ້ອນທາງຜູ້ໃຫຍ່ເພິ່ນເຫັນເຈແຕ່ງເປັນ ຢູນິຄອນ ມື້ງານ Vangvieng Fest ສົງໄສໄປຕ້ອງຕາຕ້ອງໃຈເພິ່ນ ເຈກໍເລີຍໄດ້ຮັບໂອກາດໃຫ້ມາເປັນແບບໃຫ້ກັບງານ Feb Fest ນີ້. ແລ້ວເຈກະຕ້ອງຂອບໃຈທາງທີມງານເພິ່ນທີ່ໃຫ້ໂອກາດດີແບບນີ້ແກ່ເຮົາ.

ແຟຊັ້ນແນວໃດທີ່ເຈມັກທີ່ສຸດ?

ຕອບງ່າຍໆເລີຍຂໍ້ນີ້ນະ ເຈຄິດວ່າເຈໄດ້ທຸກແນວຂຶ້ນກັບອາລົມ ກັບ ສະຖານທີ່ ຫຼື ເທດສະການນັ້ນໆ.

ມີວິທີວາງທ່າຖ່າຍຮູບແນວໃດຈຶ່ງອອກມາດູດີ ມີ Style ທຸກຮູບ?

ທ່າຖ່າຍຮູບແຕ່ລະທ່າມັນກະອອກມາຈາກອາລົມທາງໃນຄືກັນ ເຄີຍຄິດໄວ້ວ່າຊິຖ່າຍທ່ານິຢູ່ບ່ອນນິ ແຕ່ບາດຖ່າຍແທ້ໆກະຄືມັນບໍ່ຄືກັບສິ່ງທີ່ຄິດໄວ້ ແຕ່ກະອອກມາເປັນຕາເບິ່ງຢູ່ ອຸ່ນເຄື່ອງໄປຈັກ 2-3 ຮູບແລ້ວທ່າຕ່າງໆມັນກະຊິຄ່ອຍໆໄຫລອອກມາ. ໝັ່ນຖ່າຍໄປເລື້ອຍໆຫາຈະເຫັນມູມ ເຫັນທ່າທີ່ໂຕເອງຖະໜັດ ແລ້ວກໍໂພສທ່ານັ້ນເປັນປະຈຳໂລດ. ແຕ່ຢ່າມາກ໊ອບເຈໄດ໋ ດຽວເຈບໍ່ມີທ່າຫາກິນ.

ຢາກຝາກຫຍັງເຖິງຜູ້ທີ່ກຳລັງຕິດຕາມຢູ່ບໍ່?

ເຈກະບໍ່ຮູ້ວ່າມີຄົນຕິດຕາມເຈຫນ້ອຍຫລາຍປານໃດ ແຕ່ກະຂອບໃຈຫຼາຍໆຄົນແລະຫມູ່ເພື່ອນທີ່ຍອມຮັບແບບທີ່ເຈເປັນ ແລະ ໃຫ້ກຳລັງໃຈເຈຕະຫຼອດມາ. ສຸດທ້າຍເຈກະຢາກຝາກຕິດຕາມຕິຊົມຜົນງານເຈໄປເລື້ອຍໆແນ່ເດີ້


ປະກອບຄຳເຫັນ

This site uses Akismet to reduce spam. Learn how your comment data is processed.