02/01/2019 Aquaman

ຣີວິວ Aquaman

ຫຼັງຈາກທີ່ແຟນໆ ໜັງຮີໂຣ່ຂອງຄ່າຍ DC ໄດ້ເບິ່ງໜັງຊຸບເປີ້ຮີໂຣ່ທາງຄ່າຍມາແລ້ວ 4 ເລື່ອງ ບໍ່ວ່າຈະເປັນ Man of steel, Batman Vs Superman, Wonderwoman ແລະ Justice league. ເຖິງເວລາແລ້ວ ທີ່ແຟນໆ ໜັງຄ່າຍ DC ຈະໄດ້ທຳຄວາມຮູ້ຈັກ ແລະ ສຳຫຼວດໂລກໃຕ້ມະຫາສະໝຸດໄປກັບ Aquaman. ອາຄວໍແມນ ຫຼື ອາເທີ້ ເຄີຣີ່ ເປັນເລືອດຜະສົມ ລະຫວ່າງ ມະນຸດ ແລະ ແອທແລນຕິສ ເຫດເກິດຢ້ອນວ່າ ທອມ ເຄີຣີ່ (ພໍ່ຂອງ ອາເທີ້ ເຄີຣີ່) ໄດ້ພົບ ຣາຊິນີ ແອຕແລນນ່າ ທີ່ນອນບາດເຈັບຢູ່ຮິມທະເລ ຫຼັງຈາກນັ້ນ ລາວກະໄດ້ຮັກສາ ຣາຊິນີ ແອຕແລນນ່າ ແລະໄດ້ອາໄສຢູ່ນຳກັນຈົນເກິດຄວາມຮັກ ແລະກະມີລູກ.
ເນື້ອເລື່ອງຕໍ່ຈາກໜັງ Justice league. ເມື່ອ ອາເທີ້ ເຄີຣີ່ ຕ້ອງຈຳໃຈໄປປາບນ້ອງຊາຍຕ່າງພໍ່ຢ່າງ ຣາຊາ ອອມ (King Orm) ເຊິ່ງເປັນຣາຊາເມືອງ ແອທແລນຕິສ ຄົນປະຈຸບັນ ທີ່ໝັ້ນໝາຍຢາກຈະເປິດສົງຄາມກັບມະນຸດເທິງບົກເພື່ອປະກາດສັກດາວ່າຊາວແອທແລນຕິສເໜືອກວ່າ. ສິ່ງທີ່ ອາເທີ້ ຕ້ອງເຮັດຄື ອອກໄປຕາມຫາ ຕຣີສູນແຫ່ງແອຕແລນ ມັນຄືຕຣີສູນໃນຕຳນານທີ່ສາມາດລວມມະຫາສະໝຸດໃຫ້ເປັນໜຶ່ງດຽວ ແລະ ຍັງສາມາດຢຸດຢັ້ງ ຣາຊາ ອອມ ໄດ້.
ຫຼັງຈາກທີ່ເບິ່ງຈົບຢາກຈະບອກວ່າໜັງນີ້ເປັນອິຫຍັງທີ່ມັນ ສຸດຍອດ!!! ຕ້ອງຂໍ ຂອບໃຈ ຜູ້ກຳກັບ ຢ່າງ ເຈມ ວານ ທີ່ສ້າງສັນ ໜັງພະຈົນໄພທີ່ສຸດຍອດແບບນີ່ມາໃຫ້ເບິ່ງ. ນີ້ເປັນໜັງຮີໂຣ່ທີ່ດີທີ່ສຸດໃນປີນີ້. ຖ້າເບິ່ງຈະຄຸ້ມແນ່ນອນ ເພາະໃນໜັງມີຫຍັງຫຼາຍຢ່າງໃຫ້ເບິ່ງກວ່າປາສະຫຼາມ. ເປັນ 2 ຊົ່ວໂມງເຄິ່ງທີ່ຟິນອິຫລີ ແມ້ວ່າການເນື້ອເລື່ອງອາດທຳມະດາ ແຕ່ ຜູ້ກຳກັບ ເພິ່ນໃສ່ອິຫຍັງມາບັກຫຼາຍໆ ຢ່າງ ເຮັດໃຫ້ໜັງບໍ່ໜ້າເບື່ອ. ສາກໃຕ້ນ້ຳທີ່ເຮັດອອກມາກະສົມຈິງສຸດໆ ເຮົາຈະໄດ້ພົບກັບຄວາມສວຍງາມຂອງໂລກໃຕ້ທະເລ. ສ່ວນສາກສົງຄາມທ້າຍເລື່ອງມັນເປັນຫຍັງທີ່ຄັກຈົນຕ້ອງອ້າປາກຄ້າງ ເຮັດໃຫ້ນຶກເຖິງ The Lord of The Ring. ສາກແອກຊັ່ນແຕ່ລະສາກກະໂຄດດີງາມ ເບິ່ງແລ້ວ ສະໃຈ. ສ່ວນທາງດ້ານຕົວເອກ ບອກເລີຍວ່າອ້າຍຄືມາເທ່ແທ້ ກ້າມເປັນມັດໆ. ສ່ວນດ້ານນາງເອກຢ່າງ ອົງຍິງ ເມຣ່າ ກະບໍ່ນ້ອຍໜ້າ ດີງາມຕາມລະບຽບ ອອກມາແຕ່ລະສາກນິ ແອັດບໍ່ໄດ້ເບິ່ງໜ້າເລີຍ ເບິ່ງຢ່າງອື່ນແທນ ຫະຫະ!!
ສະຫຼຸບ ສຳຫຼັບໃຜທີ່ຍັງບໍ່ໄດ້ເບິ່ງ ໄປເບິ່ງສາ ເປັນໜັງທີ່ສຸດຍອດ ເຈົ້າຈະມີຄວາມສຸກ, ຄວາມຟິນ, ຄວາມຕື່ນເຕັ້ນ ຕະຫຼອດ2 ຊົ່ວໂມງເຄິ່ງແນ່ນອນ.
ຄະແນນລວມ 10/10

ປະກອບຄຳເຫັນ

This site uses Akismet to reduce spam. Learn how your comment data is processed.

%d bloggers like this: