04/02/2019 ບັນຫາ ເວເນຊູເອລາ ທີ່ເຮົາຄວນຖອດຖອນບົດຮຽນ

ບັນຫາ ເວເນຊູເອລາ ທີ່ເຮົາຄວນຖອດຖອນບົດຮຽນ

ເມື່ອກ່າວເຖິງ ເວເນຊູເອລາ ຄົງບໍ່ພົ້ນບັນດາສາວງາມທີ່ຄວ້າຕໍາແໜ່ງນາງງາມໂລກ ນາງງາມຈັກກະວານເປັນປະຈຳ. ປະເທດເວເນຊູເອລາ ຕັ້ງຢູ່ຕອນເໜືອຂອງທະວີບອາເມລີກາໃຕ້ ມີທຳມະຊາດທີ່ສວຍງາມ ແລະ ແຫຼ່ງຊັບພະຍາກອນທຳມະຊາດທີ່ຫຼາກຫຼາຍ ໂດຍສະເພາະແມ່ນນໍ້າມັນເຊື້ອໄຟທີ່ເປັນລາຍໄດ້ 95% ຂອງປະເທດ ເພາະເວເນຊູເອລາສົ່ງອອກນໍ້າມັນດິບເປັນຈຳນວນຫຼາຍຈົນກາຍເປັນປະເທດທີ່ຮັ່ງມີອັນດັບປະເທດໜຶ່ງກໍວ່າໄດ້.

https://www.caracaschronicles.com/2016/06/29/oil-well-never-pump/

ປະຊານິຍົມຢ່າງສຸດຂີດ ຈຸດກຳເນີດຂອງບັນຫາ

ໃນປີ 1999 ທ່ານ ຮິວໂກ ຊາເວຊ ໄດ້ຂຶ້ນເປັນປະທານາທິບໍດີຂອງປະເທດ ເວເນຊູເອລາ ທີ່ເນັ້ນຫຼັກປະຊານິຍົມ ຕັດຂາດສາຍສຳພັນກັບສະຫະລັດອາເມລິກາ ແລ້ວເດີນໜ້າລັດທິຄອມມູນິດເຕັມກຳລັງ ສານສຳພັນກັບປະເທດຈີນ ແລະ ຣັດເຊຍ ແລ້ວກູ້ເງິນຈາກທັງສອງປະເທດເພື່ອມາໃຊ້ຈ່າຍ.

ພາຍໃຕ້ການນຳພາຂອງທ່ານ ຮິວໂກ ຊາເວຊ ໄດ້ເຜົາຜານເງິນຈຳນວນຫຼາຍໄປກັບໂຄງການຕ່າງໆ ທີ່ໄດ້ຮັບຄວາມນິຍົມຊົມຊອບຈາກປະຊາຊົນເຊັ່ນ ໂຄງການສ້າງບ້ານ 2 ລ້ານຫຼັງ, ຢຸດຕິການກະເສດ ແລ້ວຫັນມານຳເຂົ້າສິນຄ້າແທນ ແລະ ຍັງຫຼຸດລາຄາສິນຄ້າລົງຈົນລາຄາຖືກຈົນຜິດປົກກະຕິ.

ປີ 2003 ທ່ານ ຮິວໂກ ຊາເວຊ ຕັດສິນໃຈຄວບຄຸມການເງິນດ້ວຍຕົນເອງ ໂດຍການຄວບຄຸມອັດຕາແລກປ່ຽນເງິນຕາຕ່າງປະເທດ ເຊິ່ງເປັນຈຸດທຳອິດທີ່ເຮັດໃຫ້ເກີດພາວະເງິນເຟີ້ຂັ້ນຮຸນແຮງ ເພາະປະຊາຊົນບໍ່ສາມາດແລກປ່ຽນເງິນຕາເອງໄດ້ ຈົນເຮັດໃຫ້ມີຕະຫຼາດມືດ ແລະ ຄ່າເງິນ ໂບລິວາ ຕົກຕໍ່າຈົນລັດບໍ່ສາມາດຄວບຄຸມໄດ້.

ອີກ 10 ປີຕໍ່ມາ ທ່ານ ຮິວໂກ ຊາເວຊ ກໍໄດ້ເຖິງແຕ່ຊີວິດດ້ວຍໂລກມະລັກ ແລະ ເຂົາກໍໄດ້ເລືອກ ທ່ານ ດູໂຣ ຂຶ້ນມາເປັນຜູ້ສືບທອດ ເຊິ່ງໃນມູມມອງຂອງປະຊາຊົນ ເວເນຊູເອລາແລ້ວ ທ່ານ ຊາເວຊ ຖືວ່າເປັນວິລະບູລຸດທີ່ຊ່ວຍຄົນຈົນໃຫ້ພົ້ນທຸກ ແຕ່ທຸກຄົນກໍບໍ່ຮູ້ວ່າບັນຫາແທ້ໆມັນກຳລັງຈະຕາມມາ

https://www.cbc.ca/news/world/venezuela-crsis-food-electricity-oil-shortage-inflation-1.3643216

ຝັນສະຫຼາຍ ເມື່ອລາຄານໍ້າມັນຕົກ

ດັ່ງທີ່ໄດ້ກ່າວໄວ້ຂ້າງຕົ້ນວ່າລາຍໄດ້ຫຼັກຂອງປະເທດ ເວເນຊູເອລາ ແມ່ນໄດ້ມາຈາກການຂາຍນໍ້າມັນດິບ ແລ້ວໃນປີ 2016 ລາຄານໍ້າມັນດິບກໍດິ່ງລົງເຫວຕົກລົງໄປເຖິງ 30 ໂດລາ ຕໍ່ບາເຣວ ລາຍໄດ້ຂອງປະເທດກໍຈຶ່ງຕົກຕໍ່າລົງໄປນຳ ແລ້ວກາຍເປັນວິກິດລະດັບຊາດໃນທັນທີ

ລາຍໄດ້ຫຼຸດ ຄະແນນຈາກປະຊາຊົນກໍຫຼຸດລົງນຳ ເພາະຜູ້ມີລາຍໄດ້ໜ້ອຍທີ່ເປັນຜູ້ສະໜັງສະໜູນຝ່າຍລັດທະບານຈຶ່ງເລີ່ມເທໃຈໄປຫາຝ່າຍຄ້ານ.

ລາຍໄດ້ໜ້ອຍລົງ ແຕ່ຄ່າໃຊ້ຈ່າຍຂອງລັດທະບານກັບບໍ່ໜ້ອຍລົງຕາມ ລັດຖະບານຈຶ່ງແກ້ໄຂໂດຍການພິມເງິນອອກມາອັດສີດ ແລ້ວລະເບີດເວລາເສດຖະກິດກໍເລີ່ມເຮັດວຽກ ສົ່ງຜົນໃຫ້ເກີດໄພເງິນເຟີ້ສູງເຖິງ 18.000% ຈົນບໍ່ສາມາດໃຊ້ເງິນສົດຊື້ສິ່ງຂອງໄດ້ ປະຊາຊົນເລີຍຫັນໄປແລກປ່ຽນສິນຄ້າກັນໂດຍກົງ.

ບັນຫາເລີຍມາຕົກຢູ່ທີ່ມະນຸດເງິນເດືອນ ເພາະຕ້ອງໃຊ້ຊີວິດຢ່າງລຳບາກ ຄ່າຄອງຊີບພຸ່ງຂຶ້ນສູງ ລັດຖະບານເລີຍຕ້ອງຂຶ້ນຄ່າແຮງຂັ້ນຕໍ່າ ແລະ ພິມເງິນອອກມາເພື່ອຈ່າຍເງິນເດືອນ ເມື່ອແຮງພິມກໍແຮງເຟີ້ ຈາກ 8 ໂບລິວາ ທີ່ແລກໄດ້ 1 ໂດລາ ໃນປີ 2007 ພໍມາປີ 2016 ກໍກາຍເປັນ 8.000 ໂບລິວາ ຕໍ່ 1 ໂດລາ. (ເທົ່າກັບປະເທດລາວດຽວນີ້ເລີຍ)

ປະຊາຊົນກໍຕ້ອງລ້ຽງ ແລະ ໜີ້ກໍຕ້ອງໃຊ້ ເພາະລັດຖະບານໄດ້ໄປກູ້ໜີ້ຢືມສິນຈາກທັງຈີນ ແລະ ຣັດເຊຍເພື່ອມາໃຊ້ຈ່າຍພາຍໃນປະເທດ ແຖມຍັງຕ້ອງນຳເຂົ້າສິນຄ້າເກືອບວ່າທຸກຊະນິດ ເພາະລັດຖະບານໄດ້ປະກາດຍົກເລີກກະສິກຳ ແລະ ການຜະລິດສິນຄ້າ ແລ້ວຫັນມານຳເຂົ້າສິນຄ້າເທົ່ານັ້ນ ປະເທດຈຶ່ງກ້າວເຂົ້າສູ່ບັນຫາຂາດແຄນອາຫານ ແລະ ສິນຄ້າຈຳເປັນເຊັ່ນ ຢາ ແລະ ອຸປະກອນທາງການແພດ ສະນັ້ນຄ່າອາຫານ ແລະ ຄ່າຮັກສາພະຍາບານຈຶ່ງແພງຂຶ້ນຢ່າງມະຫາສານ.

ບັນຫາທາງການເມືອງ ທີ່ກ້າວເຂົ້າສູ່ການປະທ້ວງ

ເມື່ອລາຄານໍ້າມັນຕົກຕໍ່າ ປະຊາຊົນກໍໝົດຄວາມນິຍົມໃນລັດຖະບານ ຕັ້ງແຕ່ປີ 1999 ທີ່ຍາມໃດຝ່າຍລັດຖະບານກໍຊະນະການເລືອກຕັ້ງມາໂດຍຕະຫຼອດ ຈົນມາຮອດປີ 2015 ຝ່າຍຄ້ານກໍໄດ້ຊະນະການເລືອກຕັ້ງເປັນຄັ້ງທຳອິດ.

ແຕ່ຝ່າຍຄ້ານກັບບໍ່ໄດ້ບໍລິຫານປະເທດຕາມກົນໄກ ສານສູງສຸດຂອງເວເນຊູເອລາ ເຊິ່ງຢູ່ອີກຝັ່ງໜຶ່ງກໍໄດ້ສັ່ງຫາມບໍ່ໃຫ້ລັດຖະສະພາຖອດທ່ານ ດູໂຣ ແລ້ວສັ່ງຍຸບສະພາ ໂດຍໃຫ້ທ່ານ ດູໂຣ ຍັງຄົງຄະແນນສຽງ ຈົນເຫດການບານປາຍກາຍເປັນການປະທ້ວງຕໍ່ຕ້ານລັດຖະບານ ເຮັດໃຫ້ມີຄົນເສຍຊີວິດນັບຮ້ອຍ.

ເຖິງວ່າທ່ານ ດູໂຣ ຈະຄົງເຮັດທຸກວິທີເພື່ອຮັກສາອຳນາດໃຫ້ໄດ້ຢູ່ໃນລັດຖະບານ ແຕ່ປະຊາຊົນທີ່ກຳລັງລຳບາກກໍໄດ້ລຸກຮືຂຶ້ນມາຮຽກຮ້ອງຄວາມປ່ຽນແປງ ທີ່ຈະເຮັດໃຫ້ຊາດຫຼຸດພົ້ນຈາກບັນຫານີ້.

ເຫດການປະທ້ວງ, ຊອກກິນໃນຖັງຂີ້ເຫຍື້ອ, ຂ້າກັນເພື່ອຊິງອາຫານ, ໂຮງໝໍບໍ່ມີໝໍ ບໍ່ມີຢາ ທ່ານລອງຄິດເບິ່ງວ່າປະເທດນີ້ພົບກັບວິກິດຊໍ່າໃດ. ປະຊາຊົນເດືອນຮ້ອນພຽງໃດ ຍ້ອນຜົນປະໂຫຍດໄລຍະສັ້ນທີ່ເປັນຈຳນວນມະຫາສານ ແຕ່ກາຍເປັນບັນຫາໃນໄລຍະຍາວ.

http://m.news24xx.com/read/news/9907/Tragic-people-forced-to-eat-rotting-meat-as-Venezuela-economic-crisis-gets-worse—

ການເຄື່ອນໄຫວລ່າສຸດ: ລັດຖະບານຂອງ ເວເນຊຸເອລາ ຍອມຮ້ອງຂໍຄວາມຮ່ວມມືຈາກ ອາເມລິກາ ເຊິ່ງລັດຖະບານອາເມລິກາ ກໍໄດ້ສົ່ງສິ່ງບັນເທົາທຸກເບື້ອງຕົ້ນໃຫ້ກັບເວເນຊຸເອລາເພື່ອເອົາໄປແຈກຢາຍໃຫ້ແກ່ປະຊາຊົນ ຕາມຄຳຂອງຂອງທ່ານ ກວາໂດ ແຕ່ກໍຖືກທ່ານ ດູໂຣ ປະຕິເສດການຊ່ວຍເຫຼືອ ແລ້ວບອກວ່າ “ປະເທດເຮົາບໍ່ແມ່ນປະເທດຂໍທານ”

ປະກອບຄຳເຫັນ

This site uses Akismet to reduce spam. Learn how your comment data is processed.

%d bloggers like this: