25/01/2019 ເປັນຫຍັງຕ້ອງຊຸດແດງ ຍາມກຸດຈີນ

ຍາມກຸດຈີນ ເປັນຫຍັງຕ້ອງຊຸດແດງ?

ເຄີຍຖາມບໍ່ວ່າເປັນຫຍັງຄົນຈີນ ຫຼື ຄົນຫວຽດຕ້ອງນິຍົມໃສ່ສີແດງໃນຊ່ວງກຸດຈີນ?

ກຸດຈີນ ຫຼື ການສະຫຼອງປີໃໝ່ຕາມປະຕິທິນຈີນ ຈະຈັດຂຶ້ນປະມານຊ່ວງທ້າຍເດືອນໜຶ່ງ ຫຼື ຕົ້ນເດືອນສອງຕາມປະຕິທິນສາກົນ ແຕກຕ່າງຕາມແຕ່ລະປີໄປ. ຊ່ວງກຸດຈີນເປັນຊ່ວງເວລາທີ່ສຳຄັນທີ່ທຸກໆຄົນໃນຄອບຄົວ ຈະໄດ້ກິນເຂົ້າຄົບໜ້າຄົບຕາກັນ ເປັນມື້ທີ່ທຸກຄົນໆຕ້ອງໄດ້ກັບມາບ້ານເກີດເພື່ອມາຢ້ຽມມາຢາມພໍ່ແມ່ພີ່ນ້ອງ ເພາະວ່າຄົນຈີນໃນສະໄໝກ່ອນ ຈະເດີນທາງອອກໄປທຳມາຫາກິນທີ່ຕ່າງແດນ ແລ້ວກໍຫວນຕ່າວກັບມາບ້ານໃນຊ່ວງປີໃໝ່ ກໍຄ້າຍໆກັບບ້ານເຮົາທີ່ພາກັນລາວຽກກັບບ້ານຊ່ວງບຸນສົງການ.

ມາຮອດປະຈຸບັນ ເທດສະການປີໃໝ່ຂອງຄົນຈີນກໍໄດ້ແຜ່ຂະຫຍາຍໄປທົ່ວໂລກ ເພາະຄົນຈີນໄດ້ຍົກຍ້ານຖິ່ນຖານໄປອາຫານຢູ່ໃນສະຖານທີ່ຕ່າງໆ ກໍເລີຍໄດ້ເຜີຍແຜ່ວັດທະນະທຳໃຫ້ຊາວໂລກໄດ້ຮູ້ໄປທົ່ວ.

ເປັນຫຍັງຕ້ອງຊຸດສີແດງ?

ຊ່ວງປີໃໝ່ ກໍເໝາະກັບການໃສ່ເສື້ອຜ້າໃໝ່ ເຊັ່ນດຽວກັບການເລີ່ມຕົ້ນສິ່ງໃໝ່ໆ. ໃນນີ້ຊຸດສີແດງ ໝາຍເຖິງສີແຫ່ງໂຊກ ເພາະຄົນຈີນເຊື່ອວ່າສີແດງ ຄືສີນຳໂຊກ ຈະນຳພາສິ່ງດີໆເຂົ້າມາໃນຊີວິດ ແລະ ປັດເປົ່າສິ່ງຊົ່ວຮ້າຍອອກໄປ. ສ່ວນສີອັບປະມົງຄຸນແມ່ນສີດຳ ແລະ ສີຂາວ.

ເປັນຫຍັງຕ້ອງເຊີດມັງກອນ ຫຼື ສິງໂຕ?

ກໍເຊັ່ນກັບຊື່ນັກຮ້ອງປະເທດເພື່ອນບ້ານນັ້ນລະ ສິງໂຕ ນຳໂຊກ…​ບໍ່ແມ່ນລະ…. ມັງກອນ ແລະ ສິງໂຕ ແມ່ນສັດໃນເທບນິຍາຍ ແລະ ເປັນສັດນຳໂຊກຂອງຄົນຈີນ ເພາະສັດທັງສອງຂັບໄລ່ມານຮ້າຍອອກໄປຈາກຊີວິດ.

ເປັນຫຍັງຕ້ອງໃຫ້ອັງເປົ່າ?

ໃຫ້ອັງເປົາປຽບສະເໝືອນໃຫ້ໂຊກໃຫ້ລາບ ຄ້າຍກັບວັດທະນະທຳບ້ານເຮົາທີ່ມັດແຂນ ແຕ່ທາງຈີນຈະໃຫ້ຊອງອັງເປົ່າ ເປັນການອວຍພອນລູກຫຼານ ໃຫ້ເງິນໃຫ້ຄຳເພື່ອເປັນການເລີ່ມຕົ້ນຊີວິດໃໝ່ ໃຫ້ມີຖານະການເງິນທີ່ດີຂຶ້ນກວ່າເກົ່າ. ແລ້ວສາເຫດທີ່ຕ້ອງເປັນຊອງແດງນັ້ນກໍເພາະວ່າ ມານຮ້າຍນັ້ນຢ້ານສີແດງ ເລີຍຕ້ອງເອົາເງິນໃສ່ໃນຊອງສີແດງ ເພື່ອປັດເປົ່າມາຮ້າຍອອກໄປຍາມມອບຊອງອັງເປົ່າ (ຄ້າຍແບບຮ້າຍກວາດໜີ ດີກວາດເຂົ້າ ຂອງບ້ານເຮົານິລະ)

ເປັນຫຍັງຕ້ອງຈູດກະໂພກ ຫຼື ພຸ?

ກະໂພກ ຫຼື ພຸເປັນພຽງການສ້າງບັນຍາກາດໃຫ້ມ່ວນຊື່ນ ໃຫ້ມີຄວາມຄຶກຄື້ນໃນຍາມສະຫຼອງ ແຕ່ໃນເມື່ອກ່ອນຄົນຈີນເຊື່ອວ່າການສ້າງສຽງແຕກ ຫຼື ລະເບີດເປັນການຂັບໄລ່ມານຮ້າຍໃຫ້ອອກຈາກສະຖານທີ່ນັ້ນໆ ສະນັ້ນເວລາເຂົາເປີດຮ້ານໃໝ່ ຫຼື ຂຶ້ນເຮືອນໃໝ່ ເຂົາຈະມີການຈູດກະໂພກ ຫຼື ພຸ.

ເປັນຫຍັງຕ້ອງຫໍ່ເຂົ້າຕົ້ມມັດໃຫຍ່?

ເຂົ້າຕົ້ມມັດໃຫຍ່ນີ້ເປັນຂອງຫວຽດນາມ ບໍ່ແມ່ນຂອງຈີນ ແຕ່ຢູ່ຈີນກໍມີເຊັ່ນກັນ. ສາເຫດທີ່ຕ້ອງເປັນມັດໃຫຍ່ນັ້ນກໍເພາະວ່າໃນສະໄໝກ່ອນນັ້ນ ເຂົາຕ້ອງເດີນທາງໄກ ເລີຍຕ້ອງເຮັດເຂົ້າຕົ້ມໄວ້ໄປກິນຍາມເດີນທາງ ລວມທັງຂອງດອງ ເພາະມັນສາມາດເກັບໄວ້ໄດ້ດົນ. ເມື່ອເດີນທາງກັບມາບ້ານເພື່ອສະຫຼອງປີໃໝ່ແລ້ວ ກໍເຖິງເວລາກັບໄປເຮັດວຽກເຮັດງານ ກໍຕ້ອງຫໍ່ເອົາອາຫານພວກຂອງດອງ ຫຼື ເຂົ້າຕົ້ມໄວ້ໄປກິນນຳ.

ເປັນຈັ່ງໃດ? ບົດຄວາມນີ້ເປັນປະໂຫຍດໃຫ້ແກ່ທ່ານຫຼືບໍ່? ຖ້າເປັນກໍຊ່ວຍແຊໃຫ້ແດ່ເດີ້

ປະກອບຄຳເຫັນ

This site uses Akismet to reduce spam. Learn how your comment data is processed.

%d bloggers like this: