fbpx
13/01/2019 ກະກຽມງານແຕ່ງຕ້ອງເຮັດຫຍັງແດ່?

ກະກຽມງານແຕ່ງຕ້ອງເຮັດຫຍັງແດ່?


ຊ່ວງນີ້ເປັນເທດສະການແຕ່ງງານ ແອັດເອງກໍໄດ້ຮັບບັດເຊີນໄປເປັນແຂກໃຫ້ກັບຫຼາຍໆຄົນ ແລ້ວກໍມີປະສົບການກັບງານແຕ່ງມາຫຼາຍງານ ບໍ່ໄດ້ໝາຍເຖິງແຕ່ງຫຼາຍເທື່ອໄດ໋ ແຕ່ໝາຍເຖິງໄດ້ຢູ່ເບື້ອງຫຼັງງານແຕ່ງຫຼາຍໆງານແລ້ວ. ເລີຍຢາກຈະມາເຜີຍເຄັດບໍ່ລັບ ໃຫ້ກັບຄູ່ບາວສາວທີ່ກຳລັງວາງແຜນຈະການກະກຽມງານແຕ່ງຕ້ອງເຮັດຫຍັງແດ່?

ຫາມື້ຫາຍາມ

ແນ່ອນ! ເລື່ອງມື້ດີ ມື້ເລີດມຸງຄຸນ ເປັນສິ່ງທີ່ຄູບ່າວສາວຕ້ອງຄຳນຶງເຖິງ ແຕ່ຢ່າລືມຫາເລີດທີ່ມັນສະດວກພ້ອມເດີ້. ໄດ້ມື້ດີ ແຕ່ບໍ່ສະດວກກະບໍ່ດີຄືກັນໄດ໋

ກຽມເງິນ

ກຽມເງິນກຽມຄຳ ທັງຄ່າສິນສອດ, ທອງຄຳ, ເງິນຄ່ານໍ້ານົມ, ຄ່າຈັດງານຕ່າງໆຕ້ອງມີໃຫ້ພ້ອມ ຄິດໄລ່ປະເມີນແບບລວມໆກ່ອນກໍໄດ້ ແລ້ວຈຶ່ງລົງເລິກລາຍລະອຽດ ເຊິ່ງບັນດາລາຍຈ່າຍທີ່ຈຳເປັນຈະມີຄື

  • ຄ່າສິນສອດ
  • ຄ່າງານລ້ຽງເຊົ້າ
  • ຄ່າງານລ້ຽງແລງ
  • ຄ່າຖ່າຍຮູບ + ຄ່າຖ່າຍວິດີໂອ ທັງ Pre ແລະ ໃນງານ
  • ຄ່າຊຸດ
  • ຄ່າດອກໄມ້
  • ຄ່າພາຂວັນ
  • ຄ່າໝໍພອນ
  • ຄ່າເງິນບັ້ງໄວ້ສົມມາ
  • ຄ່າບັດເຊີນ

ຈອງຮ້ານອາຫານ ຫຼື ບໍລິການຈັດງານລ້ຽງ

ອັນນີ້ສຳຄັນ ເພາະມັນມັກຈະເຕັມກ່ອນ ສະນັ້ນເມື່ອໄດ້ມື້ແລ້ວກໍຮີບຈອງໄວ້ເລີຍ ຖ້າຢາກຈັດຢູ່ພັດຕະຄານກໍຮີບໄປຈອງໄວ້ເລີຍ ສາມາດຈອງຂ້າມປີໄດ້ ຫຼື ຢາກຈັດຢູ່ບ້ານແລ້ວຈ້າງບໍລິການຈັດງານລ້ຽງກໍຕ້ອງຈອງເຂົາເຊັ່ນກັນ.

ຊຸດດອງ

ກໍລະນີທີ່ຈະຕັດຊຸດກໍຕ້ອງຮີບຊອກແພ ແລ້ວໄປຕັດຊະ ຢ່າປ່ອຍໃຫ້ໃກ້ຮອດມື້ແລ້ວຈຶ່ງໄປຕັດ ມັນຈະຊ້າເຮົາ ແຕ່ຖ້າຈະເຊົ່າ ກໍຄວນໄປເບິ່ງຊຸດໄວ້ ແລ້ວເລືອກຊຸດທີ່ຖືກໃຈເຮົາ ຖ້າໂຊກດີກໍຈະເຈິຮ້ານທີ່ຫາກໍເອົາຊຸດມາໃໝ່ ເຂົາຈະຕັດໃສ່ໂຕເຮົາເລີຍ

ບັດເຊີນ

ເມື່ອໄດ້ມື້ທີ່ແນ່ນອນແລ້ວກໍຕ້ອງຊອກພິມບັດເຊີນ ຈັດການໄວ້ແຕ່ຫົວທີໂລດ ຈຶ່ງບໍ່ມາຫຍຸ້ງຍາກ. ສິ່ງສຳຄັນຄືຕ້ອງມີມື້ ແລະ ລາຍຊື່ເຈົ້າພາບທັງສອງຝ່າຍ ທີ່ສຳຄັນຄືຊື່ແຂກ ໂດຍສະເພາະແຂກຂອງຜູ້ໃຫຍ່ຕ້ອງຮີບເອົານຳເພິ່ນມາໃຫ້ຄົບ ແລ້ວຢ່າລືມເວລາສັ່ງຈຳນວນພິມບັດໃຫ້ເພື່ອໄວ້ໂລດອີກຢ່າງໜ້ອຍ 100ບັດ. ແຂກຜູ້ໃຫຍ່ນິມັກມາເທື່ອລະໜ້ອຍ ບຶກລະຕື່ມນີ້ໃຫ້ພໍ່ແດ່ ເພີ່ມຜູ້ນີ້ໃຫ້ແມ່ແດ່ ມັນຍາກນຳແຂກຜູ້ໃຫຍ່ນິລະ

ຖ່າຍຮູບໜ້າງານ

ກໍແລ້ວແຕ່ສະດວກເລີຍວ່າມັກຮ້ານໃດ ມັກຮູບແບບໃດກໍຈັດໄປຕາມງົບທີ່ມີ ສາມາດເບິ່ງໄດທີ່ 4 ສະຕູດີໂອຖ່າຍຮູບທີ່ຕ້ອງໃຊ້ບໍລິການ

ເອກສານຕ່າງໆ

  • ໃບສູ່ຂໍ ໄວ້ເປັນຫຼັກຖານຕົກລົງເລື່ອງຄ່າສິນສອນ ສາມາດເອົານຳນາຍບ້ານ ຫຼື ໄປຊື້ຢູ່ຫ້ອງການເມືອງ
  • ໃບທະບຽນແຕ່ງງານ ສາມາດໄປຂໍຈົດທະບຽນແຕ່ງງານໄດ້ ຫຼັງຈາກຕົກລົງການທັງສອງຝ່າຍແລ້ວ ເພື່ອໃຫ້ຖືກຕ້ອງຕາມຈຳນວນ ສາມາດໄປຂໍຈົດໄດ້ນຳຫ້ອງການເມືອງ ໂດຍຕ້ອງມີພະຍານສອງຝ່າຍໄປນຳ
  • ຂໍຈັດງານນຳທາງບ້ານ ໃນກໍລະນີທີ່ຕ້ອງກວມເສັ້ນທາງ ຫຼື ຕ້ອງໃຊ້ກຳລັງ ປກສ ຂອງບ້ານມາຊ່ວຍ

ຈອງໝໍພອນ

ຂໍ້ນີ້ສຳຄັນບໍ່ແພ້ຂໍ້ອື່ນ ໝໍພອນເປັນຜູ້ໃຫ້ພອນແກ່ຄູ່ບ່າວສາວ ສະນັ້ນພໍ່ໝໍນັ້ນເທົ່າກັບເປັນ MC ໃນງານສູ່ຂວັນ ສະນັ້ນທັງຄູ່ບ່າວສາວ, ເຈົ້າພາບ ແລະ ແຂກຄວນໃຫ້ກຽດພໍ່ໝໍໃຫ້ຫຼາຍທີ່ສຸດ

ດອກໄມ້ ແລະ ດົນຕີ

ອັນນີ້ກໍສຳຄັນ ເພາະເປັນສີສັນຂອງງານ ທັງດອກໄມ້ ແລະ ວົງດົນຕີ ເຊິ່ງກໍຂຶ້ນກັບງົບນີ້ລະ ມັກອາລັງກໍຈັດໄປເລີຍ ຖ້າງົບໜ້ອຍກໍເລືອກແບບເບົາໆ

ຄຸມລາຍຈ່າຍ

ອັນນີ້ສຳຄັນທີ່ສຸດ ເພາະການກະກຽມງານລ້ຽງທີ່ຕ້ອງເຊີນແຂກເປັນຈຳນວນຫຼາຍນີ້ ແມ່ນຕ້ອງໄດ້ຄູມລາຍຈ່າຍດີໆຢ່າໃຫ້ບານປາຍ ແຕ່ກໍຢ່າຂີ້ຖີ່ຈົນເກີນໄປ ແບບແຂກໄປດອງແລ້ວບໍ່ມີອາຫານກິນ ບໍ່ມີໂຕນັ່ງນິມັນກະໂພດແລ້ວ ສຳຄັນຄືແຂກຕ້ອງກິນອີ່ມມ່ວນຊື່ນ.

ເປັນຈັ່ງໃດ ຫວັງວ່າງບົດຄວາມນີ້ຈະໃຫ້ຄວາມຮູ້ບໍ່ຫຼາຍກໍໜ້ອຍ ເພື່ອເປັນກຳລັງໃຈໃຫ້ແອັດ ກໍຂໍແຊຫຼາຍໆແດ່ເດີ້


ປະກອບຄຳເຫັນ

This site uses Akismet to reduce spam. Learn how your comment data is processed.